Fán Lúkúlúk Féri Kefil mi Múrinné!

1. Met popun Kain a féri ewe kefil mi ngaw, iwe ifa mwirilóón?

A NÓM ren Kain eú kefil mi lamot. A tongeni filatá an epwe nemeni an kewe memmeef mi ngaw, iwe epwe atoto ngeni feiéch. Are a tongeni mut ngeni an kewe memmeef an epwe nemeni an féffér, iwe mwirilóón epwe ngaw. Ewe Paipel a áiti ngenikich pwe Kain a kefilingaw. Minne Kain a filatá a atoto ninniilóón pwiin we Apel me a ta an ririéch ngeni ewe Chón Fératá i.​—Ken. 4:3-16.

2. Pwata a lamot ach sipwe féri ekkewe kefil mi múrinné?

² Pwal ina chék usun kich, mi lamot sipwe féri kefil lón manawach. Ekkóch kefil ra fókkun chou, me ekkóch rese. Nge chómmóng ach kewe kefil mi tongeni fókkun kkúú manawach. Lupwen sia féri ekkewe kefil mi múrinné, manawach epwe kinamwe me neman esap kon chómmóng osukosuk epwe torikich. Nge lupwen sia féri ekkewe kefil mi ngaw, manawach epwe ur ren osukosuk me lichippúng.​—SalF. 14:8.

3. (a) Met itá sipwe lúkúlúk wóón ren ach sipwe tongeni féri ekkewe kefil mi múrinné? (b) Ikkefa ekkewe kapas eis sipwe pwóróus wóón?

³ Met epwe álisikich le féri ekkewe kefil mi pwáraatá mirit? Mi lamot sipwe lúkú Kot, me lúkúlúk pwe I a mochen álisikich me fang ngenikich ewe tipachem epwe atufichikich le féri kefil mi múrinné. Mi pwal lamot ach sipwe lúkú án Kot we Kapas me lúkúlúk wóón an kewe kapasen fén. (Álleani James 1:5-8.) Ach akkarap ngeni Jiowa me akkaúcheani an we Kapas epwe álisikich le lúkúlúk pwe I mi silei met epwe fókkun échitikich. Iwe, sipwe kútta emmwen seni an we Kapas me mwen sipwe féri ach kewe kefil. Nge ifa usun sipwe tongeni ámúrinnééló ach tufich le féri kefil mi múrinné? Epwe wor atun mi lamot sipwe pwal féri ekkesiwil lón met sia fen filatá le féri?

MI LAMOT NGENIKICH MEINISIN ACH SIPWE FÉRI KEFIL

4. Ifa ewe kefil a nóm ren Atam, me ifa mwirilóón?

⁴ Seni lóóm tori ikenái, aramas ra kan féri ekkewe kefil mi lamot. A lamot ngeni Atam, ewe áeménún mwán, an epwe filatá ika epwe aúseling ngeni Jiowa, ewe Chón Fératá i, are epwe aúseling ngeni pwúlúwan we, Efa. Atam a filatá le aúseling ngeni Efa, ewe a etipetipa i le féri eú kefil mi fókkun ngaw. Iwe mwirilóón, Jiowa a atowu Atam seni ewe tánipiin Eten, me mwirin och fansoun a máló. Ikenái, sia pwal kúna riáfféú pokiten án Atam kefilingaw.

5. Itá epwe ifa ach ekiek usun wisach le féri kefil?

⁵ Ekkóch aramas neman ra meefi pwe epwe fen mecheres manawer ika resap pwal féri ekkewe kefil. Eli a pwal ina usun meefiom. Nge a éch ach sipwe chechchemeni pwe Jiowa ese fératá aramas pwe repwe usun chék eú mwesin, ese tongeni pwisin ekiek are féri pwisin an kefil. Nge Kot a ngenikich an we Kapas mi áiti ngenikich ifa usun sipwe tongeni féri ekkewe kefil mi múrinné. Jiowa a mochen ach sipwe féri ekkewe kefil, me ei wis a tongeni álisikich. Ekieki usun ekkeei pwóróus sipwele fós usun.

6, 7. Ifa ewe kefil mi lamot ekkewe chón Israel repwe féri, me pwata a weires ngeniir ena kefil? (Ppii ewe sasing lepoputáán ei lesen.)

⁶ Lupwen ekkewe chón Israel ra nóm lón ewe Fénúen Pwon, a nóm rer ewe kefil ika repwe fel ngeni Jiowa are fel ngeni ekkewe ekkóch kot. (Álleani Josua 24:15.) Usun mi chék mecheres ena kefil. Iwe nge, minne repwe filatá epwe atoto ngeniir manaw are máló. Lón fansoun ekkewe Soukapwúng, fán chómmóng ekkewe chón Israel ra filingaw. Ra úkútiw le fel ngeni Jiowa me poputá le fel ngeni ekkewe kot chofona. (Souk. 2:3, 11-23) Mwirin, lón fansoun ewe soufós Elias, mi lamot néún Kot aramas repwe filatá ika ra mochen angang ngeni Jiowa are ngeni ewe kot chofona Paal. (1 King 18:21) Neman sipwe ekieki pwe itá úrúrún epwe chék mecheres ena kefil pún ach sipwe angang ngeni Jiowa, ina ewe alen tipachem me a fókkun échitikich fansoun meinisin. Emén mi mirit esap mochen angang ngeni ewe sókkun kot ese manaw. Nge ekkewe chón Israel rese tongeni filatá. Ewe Paipel a apasa pwe ra “tipemwaramwar won ruu ekiek.” Fán tipachem, Elias a peseer ar repwe filatá le fel ngeni Jiowa, ewe Kot mi enlet.

⁷ Pwata a weires ngeni ekkena chón Israel ar repwe féri eú kefil mi múrinné? Áeúin, rese lúkú Jiowa, me rese mochen aúseling ngeni. Ese wor ar lúkúlúk wóón, me rese awora fansoun le kákkáé usun Jiowa are usun an tipachem. Ika ra féri ena, iwe minne ra káé a fen tongeni álisiir le féri ekkewe kefil mi múrinné. (Kölf. 25:12) Oruuan, ekkewe chón Israel ra tipetipeló ren aramasen ekkewe pwal ekkóch mwú. Ekkena chón ekis ra etipetipa ar ekiek, me ra pwal mwo nge féri kefil fán iter. Iwe mwirilóón, ekkewe chón Israel ra poputá le fitaaló ekkena chón ekis me fel ngeni ar kewe kot chofona. Ina ewe mettóch Jiowa a fen éúréúra ekkewe chón Israel usun fite ier me mwan.​—Eks. 23:2.

ITÁ EKKEWE EKKÓCH REPWE WISEN FÉRI KEFIL FÁN ITACH?

8. Ifa ewe lesen mi lamot sia káé seni pwóróusen chón Israel?

⁸ Pwóróusen chón Israel a áiti ngenikich pwe ika sia mochen féri ekkewe kefil mi múrinné, mi lamot sipwe néúnéú án Kot we Kapas. Kalatia 6:5 a áchema ngenikich pwe wisen emén me emén an epwe pwisin féri an kewe kefil. A ffat pwe mi lamot sisap ngeni pwal emén ewe wis an epwe féri kefil fán itach. Nge itá emén me emén kich sipwe káé án Kot ekiek usun minne mi pwúng, mwirin filatá le apwénúetá.

9. Pwata a mmen efeiengaw ach sipwe mut ngeni ekkewe ekkóch le féri ach kewe kefil?

⁹ Ifa usun sia tongeni mut ngeni ekkewe ekkóch ar repwe féri kefil fán itach? Ren ach mut ngeniir ar repwe eriánikich le féri ekkewe kefil mi ngaw. (SalF. 1:10, 15) A mmen efeiengaw ena. Pwisin wisach ach sipwe fiti emmwenien mwelien letipach mi fen káit me ren Paipel. Nge, ika sia mut ngeni ekkóch ar repwe féri ekkewe kefil fán itach, iwe sia fen filatá le tapweló mwiriir. Ena kefil a tongeni emmwenikich ngeni feiengaw.

10. Ifa ewe kapasen éúréúr Paulus a ngeni ekkewe chón Kalatia?

¹⁰ Ewe aposel Paulus a éúréúra ekkewe chón Kalatia ar resap mut ngeni ekkóch ar repwe wisen féri ekkewe kefil fán iter. (Álleani Kalatia 4:17.) Ekkóch pwiich kewe lón Kalatia ra sótun féri ekkewe kefil fán iten ekkóch chón ewe mwichefel. Met popun ra féri ena? Pún chókkana mi ekieki chék pwisin iir, ra mochen pwiir kewe repwe tapweló mwiriir lap seni ekkewe aposel. Rese tipetekison, me rese súféliti án pwiir kewe Chón Kraist pwúúng le pwisin féri ar kewe kefil.

11. Ifa usun sia tongeni álisi ekkewe ekkóch lupwen a wor ar kefil repwe féri?

¹¹ Kich meinisin sia tongeni káé seni án aposel Paulus leenien áppirú mi múrinné. A silei pwe mi wor án pwiin kewe Chón Kraist pwúúng le pwisin féri ar kefil, me a súféliti ar pwúúng. (Álleani 2 Korint 1:24.) Ikenái, ekkewe mwán mi ásimaw ra tongeni áppirú ena leenien áppirú lupwen ra awora fén ngeni pwiich kewe usun och mettóch repwe pwisin féri ar kefil wóón. Ra pwapwa le áiti ngeniir ekkóch pwóróus mi lóngólóng wóón án Kot we Kapas. Nge, ekkewe mwán mi ásimaw repwe túmúnú pwe repwe mut ngeni emén me emén Chón Kraist an epwe wisen féri an kewe kefil pokiten i pwisin epwe kúna lón manawan échún are pwúnúngawen minne a filatá. Iei eú lesen mi lamot: Sia tongeni álisi ekkewe ekkóch le weweiti ekkewe kapasen emmwen lón Paipel mi weneiti ar osukosuk are minne a fiffis lón manawer. Nge mi nóm ren pwiich kewe ar pwúúng me pwal ina wiser le pwisin féri ar kewe kefil. Lupwen ra pwisin féri ar kewe kefil mi múrinné, iwe ra kúna feiéch. A ffat, sisap fókkun ekieki pwe mi wor ach nemenem wóón pwiich kewe pwe sipwe wisen filatá met itá repwe féri.

KOSAP MUT NGENI ÓM MEMMEEF AN EPWE NEMENI ÓM KEFIL

12, 13. Pwata mi efeiengaw ach sipwe féri kefil lupwen sia song are lichippúng?

¹² Ikenái, chómmóng aramas ra fitaaló minne letiper a tipeni lupwen ra féri ekkewe kefil. Nge mi tongeni efeiengaw ena. Ewe Paipel a éúréúrakich ach sisap alónga ach kewe kefil sia féri wóón met letipach ese unuséch a tipeni are wóón ach kewe memmeef. (SalF. 28:26) Sise tongeni lúkúlúk wóón letipach, pokiten “letipen aramas a fokun atuputup lap seni mettoch meinisin, a unusen ingau.” (Jer. 17:9) Mi wor chómmóng pwóróus lón Paipel mi pwáraatá sópwongawen án emén lúkúlúk wóón letipan ese unuséch. (1 King 11:9; Jer. 3:17; 13:10) Iwe, met a tongeni fis ika sia fitaaló letipach lupwen sia féri ach kefil?

¹³ Jiowa a allúkú ngenikich ach sipwe tongei I ren unusen letipach me tongei chón óruch usun pwisin kich. (Mat. 22:37-39) Nge mi lamot sipwe túmúnúéch. Ekkewe wokisin lón Paipel mi mak lón parakraf 12 ra pwáraatá pwe mi efeiengaw ach sipwe mut ngeni ach memmeef an epwe nemeni ach ekiek me féffér. Áwewe chék, epwe weires ngeni emén mi song an epwe féri eú kefil mi múrinné. (SalF. 14:17; 29:22) Epwe pwal weires ngeni emén mi lichippúng an epwe féri eú kefil mi pwáraatá mirit. (Num. 32:6-12; SalF. 24:10) Mi lamot sipwe mut ngeni án Kot allúk an epwe emmweni ach ekiek. (Rom 7:25) Lupwen sia féri ekkewe kefil mi lamot, sisap mut ngeni meefiach an epwe nemeni ach kewe féffér.

INEET KOPWE FÉRI EKKESIWIL LÓN MINNE KA FILATÁ?

14. Ifa usun sia silei pwe mi fich ach sipwe féri ekkesiwil lón ekkóch kefil sia fen féri?

¹⁴ Mi lamot sipwe féri ekkewe sókkun kefil mi pwáraatá mirit. Nge, emén mi tipachem a silei pwe fán ekkóch a lamot an epwe ekiekisefáli minne a fen filatá, mwirin, neman epwe féri ekkesiwil. Jiowa Kot a isetiw eú leenien áppirú mi unuséch fán itach. Nengeni met Jiowa a féri fán iten ekkewe chón Ninifa lón fansoun Sona we: “Lupwen Kot a küna ar ekieksefäl me ar kul seni föförür mi ngau, a siwili an ekiek. Esap chüen ngeniir liwinin ar tipis usun a apasa epwe föri.” (Sona 3:10) Lupwen Jiowa a kúna pwe ekkewe chón Ninifa ra siwili manawer me úkútiw seni ar féri minne mi ngaw, iwe a ekkesiwili minne a fen apwúngaló. Ei mettóch a pwáraatá pwe i a tipepwetete, tipetekison, me tongei aramas. Jiowa esap usun aramas, i ese tongeni mwáálliló lón an apwúngaló mettóch, pwal mwo nge atun a meefi song.

15. Pwata neman epwe lamot ach sipwe féri ekkesiwil lón eú kefil sia fen féri?

¹⁵ Epwe tongeni wor atun epwe éch ach sipwe ekiekisefáli eú kefil sia fen féri, áwewe chék lupwen a wor och ekkesiwil. Chechchemeni pwe fán ekkóch Jiowa a féri siwil lón minne a fen apwúngaló. (1 King 21:20, 21, 27-29; 2 King 20:1-5) Pwal eú atun epwe fich ach sipwe féri ekkesiwil lón minne sia fen filatá, ina ewe atun sia angei mineféén pwóróus. Ekieki usun pwóróusen King Tafit. I a fen apwúngaló mettóch usun néún néún Saul we itan Mefiposet, nge mi lóngólóng wóón och pwóróus mi mwáál emén a apwóróusa ngeni. Mwirin, lupwen Tafit a angei ewe mineféén pwóróus mi pwúng, iwe a ekkesiwili minne a apwúngaló. (2 Sam. 19:24-29) Fán ekkóch, a eú alen tipachem ach sipwe pwal féri ena.

16. (a) Ikkefa ekkewe kapasen pesepes mi álilliséch lupwen sia féri kefil? (b) Pwata a lamot ach sipwe ekiekisefáli minne sia fen filatá, iwe, ifa usun sipwe féri ena?

¹⁶ Ewe Paipel a apasa pwe mi lamot ach sisap atapwal lupwen sia féri ekkewe kefil mi lamot. (SalF. 21:5) Mi lamot sipwe awora fansoun le ekiekiéchú meinisin ekkewe pwóróus mi weneiti ach kefil pwe sipwe féri kefil mi múrinné. (1 Tes. 5:21) Me mwen án ewe mékúren famili epwe apwúngaló met epwe féri, mi lamot epwe awora fansoun le kútta pwóróus seni Paipel me néúch kewe puk. Epwe pwal éch an epwe aúseling ngeni meefien chón an famili. Chemeni pwe Kot a pesei Apraham an epwe aúseling ngeni pwúlúwan we. (Ken. 21:9-12) A pwal lamot ngeni ekkewe mwán mi ásimaw ar repwe káé me kútta pwóróus. Lupwen eú mineféén pwóróus a pwáraatá lamoten ar repwe féri ekkesiwil lón eú kefil ra fen apwúngaló, iwe rese lólilen ika pwe ekkóch resap chúen súfélitiir. Mi lamot ekkewe mwán mi ásimaw mi tipemirit me tipetekison repwe mmólnetá le féri ekkesiwil lón ar ekiek me minne ra fen apwúngaló ika mi lamot. Epwe pwal múrinné ach sipwe fiti ar leenien áppirú. Ei mettóch a tongeni álisatá ewe kinamwe me tipeeúfengen lón ewe mwichefel.​—Föf. 6:1-4.

APWÉNÚETÁ MINNE KA FEN FILATÁ LE FÉRI

17. Met a tongeni álisikich ach sipwe sópwéch lón ach féri kefil?

¹⁷ Ekkóch kefil epwe chou lap seni ekkóch. Áwewe chék, a mmen lamot ewe kefil ika kopwe pwúpwúlú are ié kopwe pwúpwúlú ngeni. Pwal eú kefil mi chou, ina ach filatá ineet sipwe poputá le angang ngeni Kot full-time. Me mwen ach féri ekkena esin kefil, mi lamot sipwe ekiekiéchú nónnómuch me tingor án Jiowa álillis lón iótek. Neman epwe lamot och fansoun ach sipwe féri ena, nge ika sia mochen féri kefil mi múrinné, mi lamot sipwe lúkúlúk wóón Jiowa, rongorong ngeni an kewe kapasen éúréúr, me fiti emmwenian. (SalF. 1:5) Jiowa a fen ngenikich kapasen fén mi múrinné seni meinisin, ewe a mak lón an we Kapas. Ina popun, a mmen lamot ach sipwe káé me kútta pwóróus me iótek ngeni Jiowa an epwe emmwenikich. A tongeni fang ngenikich ekkewe napanap mi lamot pwe sipwe féri ekkewe kefil mi tipeeú ngeni letipan. Me mwen ach sipwe féri ekkewe kefil mi lamot, fansoun meinisin mi lamot sipwe pwisin eisinikich: ‘Minne upwe filatá a pwáraatá pwe ua tongei Jiowa? Epwe atoto feiéch me kinamwe lón ai famili? Epwe pwáraatá pwe ua mosonottam me kirekiréch?’

18. Pwata Jiowa a mochen ach sipwe féri pwisin ach kewe kefil?

¹⁸ Jiowa ese eriánikich le tongei i me angang ngeni. Nge a fen fang ngenikich ach pwúúng le pwisin filatá. A súféliti wisach me ach pwúúng le filatá ika sipwe angang ngeni. (Jos. 24:15; SalAf. 5:4) Nge a mochen pwe sipwe apwénúetá minne sia fen filatá mi lóngólóng wóón an we Kapas. Lupwen sia lúkúlúk wóón án Jiowa kewe kapasen éúréúr me apwénúetá ekkewe kapasen emmwen a ngenikich, iwe sia tongeni féri ekkewe kefil mi múrinné. Me sipwe pwal pwáraatá pwe sise wiliwilikkis lón ach féffér meinisin.​—Jas. 1:5-8; 4:8.