LESEN 49
Jiowa Epwe Pélúweni Ái Kewe Iótek?
“Oupwe köriei, oupwe feito o iotek ngeniei, nge ngang üpwe aüselingakemi.”—JER. 29:12.
KÉL 41 Aúselinga Ai Iótek
MINNE SIPWELE KÁÉa
1-2. Eli pwata sipwe meefi pwe Jiowa ese pélúweni ach kewe iótek?
“EWE Samol mi Lapalap i chök epwe om pwapwa, nge i epwe ngonuk mochenin lelukom.” (Kölf. 37:4) A ifa me amwararen ena pwon! Nge itá sipwe ekieki pwe Jiowa epwe chék mwittir ngenikich minne sia tingorei? Pwata a mmen aúchea ena kapas eis? Áwewe chék ren ekkeei pwóróus. Emén Chón Kraist fefin mi lipich a ióteki an epwe ketiw ngeni ewe Sukulen Chón Afalafala ewe Mwú. Nge mwirin fitu ier, ese mwo ketiw. Emén alúwél Chón Kraist a tingorei Jiowa an epwe chikar seni an semmwen mi chou pwe epwe tongeni alapaaló an álillis lón ewe mwichefel. Nge ese chikar. Sam me in Chón Kraist ra ióteki án néúr we epwe chék nónnóm lón ewe enlet. Nge a filaatá an esap chúen angang ngeni Jiowa.
2 Eli ka pwal tingorei Jiowa och mettóch, nge ese fis. Iwe, eli kopwe ekieki pwe Jiowa a kan pélúweni án ekkewe ekkóch iótek nge ese pélúweni óm. Are eli kopwe ekieki pwe ka tipis. Emén fefin Chón Kraist itan Janiceb a meefi ena. I me pwúlúwan we ra ióteki ar mochen angang lón Bethel. A erá: “Úa fókkun lúkú pwe ekiseló chék áúpwe ketiw.” Nge fite ier mwirin, ena pean pwúpwúlú rese mwo ketiw. Janice a erá: “Úa fókkun letipengaw me osukosuk. Úa ekieki iká met ewe úa féri pwe Jiowa a letipechou rei. Úa fen tichik lón ái ióteki ám áúpwe angang lón Bethel, nge pwata ese pélúweni ái iótek?”
3. Met sipwele pwóróus wóón lón ei lesen?
3 Fán ekkóch eli sia kan ekkekieki iká Jiowa a aúselinga ach kewe iótek. Pwal mwo nge ekkóch néún Jiowa kewe chón angang mi túppwél lóóm, ra eáni ena sókkun ekiek. (Hiop 30:20; Kölf. 22:2; Ap. 1:2) Met a tongeni alúkúlúkuk pwe Jiowa epwe aúselinga óm kewe iótek? (Kölf. 65:2) Ren ach sipwe pélúweni ena kapas eis, a lamot sipwe akkomw silei pélúwen ekkeei kapas eis: (1) Met Jiowa a tongeni féri? (2) Met Jiowa a mochen ach sipwe féri? (3) Eli pwata a lamot ach sipwe ekkesiwili minne sia eáni iótek?
MET JIOWA A TONGENI FÉRI?
4. Me ren Jeremaia 29:12, met Jiowa a pwonei an epwe féri?
4 Jiowa a pwonei pwe epwe aúselinga ach kewe iótek. (Álleani Jeremaia 29:12.) Kot a tongei néún kewe chón angang mi túppwél, ina popun esap fókkun tunaaló ar kewe iótek. (Kölf. 10:17; 37:28) Iwe nge, esap weween pwe epwe ngenikich meinisin minne sia tingor. Eli a lamot ach sipwe witiwit tori warotoon ewe ótót séfé me mwen epwe ngenikich ekkóch ekkewe mettóch sia tingor.
5. Met Jiowa a ekieki atun a aúselinga ach kewe iótek? Áweweei.
5 Atun Jiowa a aúselinga ach kewe iótek a pwal ekieki ifa ussun a riri ngeni minne a tipeni. (Ais. 55:8, 9) Eú me lein ekkewe mettóch a mochen, ina án ei fénúfan epwe masou ren chókkewe mi pwapwa le álleasochisi an nemenem. Nge Setan a erá pwe aramas repwe kon fen pwapwa iká ra nemeni pwisin iir. (Ken. 3:1-5) Ren án Jiowa epwe ánneta pwe ewe Tefil a chofona, a mut ngeni aramas ar repwe nemeni pwisin iir. Iwe nge, án aramas nemenem a efisi ekkewe chómmóng osukosuk sia kúkkúna lón ei fansoun. (SalAf. 8:9) Sia weweiti pwe Jiowa esap amóeló meinisin ekkena osukosuk iei. Pwe iká a féri ena, ekkewe ekkóch repwe ekieki pwe án aramas nemenem a sópwéch, me a tongeni pwákini ar kewe osukosuk.
6. Pwata a lamot ach sipwe alúkúlúkú pwisinkich pwe Jiowa epwe chék eáni féffér mi pwúng me tong?
6 Eli napanapen án Jiowa pélúweni ekkewe iótek mi léllé epwe sókkofesen. Áwewe chék, atun King Esekaia a fókkun semmwen, a tingormaw ngeni Jiowa an epwe echikara. Iwe, Jiowa a echikara. (2 King 20:1-6) Iwe nge, atun ewe aposel Paul a tingorei Jiowa an epwe amóeló ‘eu samau a fokun metek ren’ eli och apwangapwangen inisin, Jiowa ese amóeló an na osukosuk. (2 Kor. 12:7-9) Ekieki pwal pwóróusen ekkewe aposel Jemes me Piter. King Erot a mochen nireló. Chón ewe mwichefel ra ióteki Piter me ese mwáál ra pwal ióteki Jemes. Iwe nge Jemes a ninniiló, nge emén chónláng a amanawa Piter. (Föf. 12:1-11) Eli sipwe ekieki, ‘Pwata Jiowa a seláni Piter nge esap Jemes?’ Ewe Paipel ese erá pwata.c Nge sia tongeni lúkúlúk pwe ‘esap wor mwälin’ féfférún Jiowa kewe. (Tut. 32:4) Me sia silei pwe Jiowa a tongeer me rúúemén. (Pwär. 21:14) Fán ekkóch, eli Jiowa esap pélúweni ach kewe iótek lón ewe napanap sia mochen. Nge pokiten sia lúkúlúk pwe Jiowa a kan chék pélúweni ach kewe iótek lón ewe napanap mi tong me pwúng, iwe sisap ngúnúngúnúngawa ifa ussun a filaatá le pélúweni ach kewe iótek.—Hiop 33:13.
7. Met sipwe achocho le túmúnúkich seni, me pwata?
7 Sipwe túmúnú ach sisap alélléfengeni nónnómuch ngeni ekkewe ekkóch. Áwewe chék, eli sia fen tingorei Jiowa an epwe álisikich wóón och mettóch, nge ese fis minne sia tingor. Mwirin, sia silei pwe emén a pwal eáni ena esin tingor, me ussun itá me rech Jiowa a pélúweni an tingor. Ina met a fis ngeni emén Chón Kraist fefin itan Anna. A ióteki án pwúlúwan we Matthew epwe chikar seni kanser. Lón pwal chék ena atun, rúúemén Chón Kraist fefin chinnap ra pwal kanser. Anna a fókkun ióteki Matthew me ekkena fefin. Iwe ekkena rúúemén fefin chinnap ra chikarsefál nge Matthew a máló. Me akkomwan, Anna a ekieki iká án ekkena rúúemén chikar pokiten Jiowa a álisiir. Nge iká ina, pwata Jiowa ese pélúweni an ióteki án pwúlúwan we epwe chikarsefál? Pwúngún pwe sise tongeni silei popun ekkewe rúúemén ra chikarsefál. Nge sia silei pwe Jiowa epwe áwesaaló meinisin ach kewe riáfféú, me a fókkun pwosiiti chienan kewe ra fen máló me epwe amanawasefáliir.—Hiop 14:15.
8. (a) Ifa ussun Jiowa a álisikich me ren Aisea 43:2? (b) Ifa ussun iótek a tongeni álisikich atun sia kúna riáfféú? (Ppii ewe video Iótek A Álisikich le Likiitú.)
8 Jiowa epwe álisikich fansoun meinisin. Semach we mi tong Jiowa, ese mochen ach sipwe kúna riáfféú. (Ais. 63:9) Nge ese eppeti senikich osukosuk meinisin, mi ussun chénúpupu are ekkei. (Álleani Aisea 43:2.) Iwe nge, a pwonei ngenikich pwe epwe álisikich le ‘fetal lor.’ Me ese lifilifil sóssót epwe torikich, epwe chék túmúnú pwe ach riri ngeni epwe péchékkúl. Jiowa a pwal ngenikich an we ngún mi fel mi manaman an epwe álisikich le likiitú. (Luk. 11:13; Fil. 4:13, Testament Mi Fö) Iwe, sia tongeni lúkúlúk pwe epwe chék ngenikich met mi lamot ren ach sipwe likiitú me akkamwéchú ach túppwél ngeni.d
MET JIOWA A MOCHEN ACH SIPWE FÉRI?
9. Pwata a lamot ach sipwe lúkúlúk pwe Jiowa epwe álisikich ussun met James 1:6, 7 a pese ngenikich?
9 Jiowa a mochen ach sipwe lúkúlúk wóón. (Ipru 11:6) Fán ekkóch, eli sipwe meefi pwe ach kewe osukosuk ra kon áweires ach sipwe likiitú faar. Eli sipwe pwal mwo nge poputá le tipemwárámwár iká Jiowa epwe álisikich. Nge ewe Paipel a alúkúlúkú ngenikich pwe ren án Kot we manaman sia tongeni “mwet won eu tit.” (Kölf. 18:29) Iwe mi lamot sipwe iótek ngeni Kot me unusen lúkú pwe i epwe pélúweni ach kewe iótek nge sisap fen tipemwárámwár.—Álleani James 1:6, 7.
10. Áweweei ifa ussun emén a tongeni etipeeúfengeni féfférún me an iótek.
10 Jiowa a mochen ach sipwe etipeeúfengeni féfférúch ngeni ach iótek. Áwewe chék, emén Chón Kraist mwán a tingorei Jiowa an epwe álisi lón an tingorei néún we boss pwe esap mwo angang pwe epwe fiti eú mwichelap. Ifa ussun Jiowa epwe tongeni pélúweni ena iótek? Eli epwe apworai ena mwán Chón Kraist an epwe tongeni fós ngeni néún we boss. Nge a chúen lamot ngeni eménna an epwe ló chuuri ewe boss me tingor, me eli epwe tingor fán fite. Eli epwe tongeni tingor an epwe angang lón pwal eú rán. Me iká mi lamot, epwe tongeni ereni néún we boss an esap mwo angang me esap peiof.
11. Pwata a lamot sipwe ikkióteki ekkewe mettóch mi lamot ngenikich?
11 Jiowa a mochen ach sipwe ikkióteki ekkewe mettóch mi lamot ngenikich. (1 Tes. 5:17) Sia kúna seni alon Jises kewe pwe ekkóch ach kewe tingor resap mwittir fis. (Luk. 11:9) Ina popun, sisap fangetá! Sipwe tingormaw me ikkiótek iteitan. (Luk. 18:1-7) Lupwen sia achocho le ikkióteki och mettóch, sia pwáári ngeni Jiowa pwe a fókkun lamot me rech ach na tingor. Sia pwal pwáári pwe sia lúkú an tufichin álisikich.
PWATA ELI A LAMOT ACH SIPWE EKKESIWILI MINNE SIA EÁNI IÓTEK?
12. (a) Ifa eú kapas eis sipwe pwisin eisinikich ussun ach kewe iótek, me pwata? (b) Ifa ussun sipwe túmúnú pwe ach kewe iótek repwe pwáári ach súféliti Jiowa? (Ppii ewe pwóór “Mi Ésúúfél Ái Kewe Iótek Ngeni Jiowa?”)
12 Iká ese fis met sia ióteki, eli sipwe eisini pwisinkich ekkeei úlúngát kapas eis: Iei ewe áeúin, ‘Mi pwúng met ewe úa ióteki?’ Fán chómmóng sia kan ekieki pwe sia silei met epwe fókkun échitikich. Nge eli ewe mettóch sia tingor esap ina ewe epwe kon álisikich. Iká sia tingorei Jiowa an epwe féri eú mettóch sia ekieki pwe epwe ataweei ach osukosuk, nge eli met ena sia ekieki, esap ina met epwe wesewesen ataweei ach na osukosuk. Me eli ekkóch mettóch sia tingor rese tipeeú ngeni letipen Jiowa. (1 Joh. 5:14) Áwewe chék ren pwóróusen ekkewe sam me in sia fen fósur me mwan. Ra tingorei Jiowa an epwe álisi néúr we pwe epwe chék nónnóm lón ewe enlet. Ussun mi fich ena tingor. Iwe nge, Jiowa ese tongeni eriánikich ach sipwe angang ngeni. A mochen pwe oukich meinisin, kapachelong ekkewe naw, ach sipwe pwisin filaatá le fel ngeni. (Tut. 10:12, 13; 30:19, 20) Ina minne ekkewe sam me in ra tongeni tingorei Jiowa an epwe álisiir le achchúngú letipen néúr we pwe epwe tongei me wiliiti chiechian.—SalF. 22:6; Ef. 6:4.
13. Ineet Jiowa epwe álisikich me ren Ipru 4:16? Áweweei.
13 Iei ewe oruuen kapas eis: ‘Iei ewe atun mi fich án Jiowa epwe pélúweni ái tingor?’ Eli sipwe meefi pwe mi lamot an epwe mwittir pélú ach kewe iótek. Nge ren enletin, Jiowa a silei ineet ewe fansoun mi fich an epwe pélúweni ach iótek. (Álleani Ipru 4:16.) Atun ese mwittir fis minne sia tingor, eli sia ekieki pwe Jiowa a apasa ‘Aapw,’ nge ren enletin eli pélúwan me ren, ‘Esap mwo iei.’ Ekiekisefáli pwóróusen pwiich we alúwél, ewe a tingor an epwe chikar seni an semmwen. Iká Jiowa epwe echikara ren eú manaman, Setan a tongeni tipi ngeni pwe pwiich na a chék sópweeló le angang ngeni pokiten a echikara. (Hiop 1:9-11; 2:4) Pwal och, Jiowa a fen isettiw ewe fansoun epwe amóeló samaw meinisin. (Ais. 33:24; Pwär. 21:3, 4) Nge ren mwo iei, sise tongeni ekieki pwe Jiowa epwe féri an kewe manaman pwe epwe echikarakich. Ina popun ewe alúwél Chón Kraist a tongeni tingorei Jiowa an epwe fang ngeni eú letip mi kinamwe pwe epwe likiitú le sópweeló an akkangang ngeni fán túppwél.—Kölf. 29:11.
14. Met ka káé seni pwóróusen Janice?
14 Ekiekisefáli pwóróusen Janice, ewe a ióteki an epwe angang lón Bethel. Nimu ier mwirin a weweiti ifa ussun Jiowa a pélúweni an iótek. A erá: “Jiowa a áeá ena fansoun an epwe áiti ngeniei chómmóng me álisiei le émúrinnéló napanapei ussun emén Chón Kraist. A lamot ái lúkú i epwe lapóló. Me a lamot úpwe silei ifa ussun úpwe káéfichi ewe Paipel. A lamot ái úpwe silei pwe ngang mi tongeni pwapwa, ese lifilifil ia úa angang ngeni ie.” Ekiseló mwirin, Janice me pwúlúwan we ra ketiw le fiti ewe angangen sáifetál le chuuri ekkewe mwichefel. Iei alon lupwen a nesékúriti met a fis: “Jiowa a pélúweni ái iótek lón ewe napanap úse pwal tepereni. A ttam me mwirin ái mirititi múrinnéén án Jiowa pélúweni ái iótek, nge úa fókkun kilisou ren ái meefi an tong me úméúméch ngeniei.”
Iká ka meefi pwe Jiowa ese mwo pélúweni óm iótek, ekieki óm kopwe ióteki pwal ekkóch mettóch (Ppii parakraf 15)f
15. Pwata eli epwe éch ach sisap kon tichik lón ach kewe iótek? (Pwal ppii ekkewe sasing.)
15 Iei ewe aúlúngátin kapas eis, ‘Itá úpwe ióteki pwal och mettóch?’ A éch ach sipwe tichik lón ach iótek. Nge fán ekkóch eli epwe éch ach sisap kon tichik pwe sipwe tongeni silei met Jiowa a mochen fán itach. Áwewe chék ren pwóróusen ewe Chón Kraist fefin mi lipich a fen ikkióteki an epwe ketiw ngeni ewe Sukulen Chón Afalafala ewe Mwú. A mochen fiti ena sukul pwe epwe tongeni álillis ikewe a wor osupwangen chón afalafal ie. Ina popun atun a sópweeló le ikkióteki ussun ena sukul, a pwal tongeni tingorei Jiowa epwe álisi le kúna pwal ekkóch alen epwe alapaaló an angang ngeni. (Föf. 16:9, 10) Mwirin an ióteki ussun ena, a tongeni eisini ewe chónemmwen mi wisen sáifetál iká mi wor eú mwichefel mi kkan ngeni a osupwangen pioneer. Are a tongeni mak ngeni ewe keangen ofesilap me eis menni leeni a osupwangen chón afalafal.e
16. Met sia tongeni lúkúlúkú?
16 A lamot ach sipwe lúkúlúk pwe Jiowa epwe pélúweni ach kewe iótek lón ewe napanap mi tong me pwúng, ussun met sia fen káé lón ei lesen. (Kölf. 4:3; Ais. 30:18) Fán ekkóch ese pélú ach kewe iótek lón ewe napanap sia ekieki. Nge Jiowa esap fókkun tunaaló ach kewe iótek. A fókkun tongekich, me esap fókkun likitikicheló. (Kölf. 9:10) Ina popun sipwe sópweeló le “lükü Kot fansoun meinisin” me iinaawu masouen letipach ngeni lón iótek.—Kölf. 62:8.
KÉL 43 Eú Iótekin Kilisou
a Ei lesen epwe áweweei pwata sia tongeni lúkúlúk pwe Jiowa epwe chék pélúweni ach kewe iótek lón ewe napanap mi tong me pwúng.
b Ekkóch ekkeei it ra siwil.
c Ppii ewe lesen “Ka Lúkú pwe Minne Jiowa A Féri A Pwúng Fansoun Meinisin?” lón Ewe Leenien Mas minen February 2022, parakraf 3-6.
d Ren pwal ekkóch pwóróus ren ifa ussun Jiowa a tongeni álisikich le likiitú fán riáfféú, katol ewe video Iótek A Álisikich le Likiitú wóón jw.org.
e Iká ka mochen silei ifa ussun kopwe tongeni álillis lón ekkóch leeni, ppii Ach Angangen Afalafala ewe Mwú, minen March 2007 p. 3, parakraf 6; p. 4, parakraf 1-3.
f ÁWEWEEN SASING: Rúúemén fefin Chón Kraist ra iótek me mwen ar apply ngeni ewe Sukulen Chón Afalafala ewe Mwú. Ekiseló mwirin ewe emén a ketiw, nge ewe emén ese. Ewe emén ese ketiw a tingorei Jiowa an epwe álisi le esilla pwal ekkóch alen epwe alapaaló an angangen afalafal, nge esap fen lichippúng ren an ese ketiw. Iwe mwirin a mak ngeni ewe keangen ofesilap an epwe esile ngeniir ussun an mochen álillis ikewe a wor osupwangen chón afalafal ie.