• Án Taniel Oesini A Osuni Warotoon ewe Messaia
    Met ewe Paipel a Wesewesen Apasa?

    • PWAL EKKÓCH ÁWEWE

      Án Taniel Oesini A Osuni Warotoon ewe Messaia

      EWE soufós Taniel a manaw lap seni 500 ier me mwen uputiwen Jesus. Iwe nge, Jiowa a pwár ngeni Taniel pwóróus mi atufichi án aramas repwe silei ewe fansoun Jesus epwe kepit me ren ewe manaman mi fel fán iten ewe wis Messaia are Kraist. Iei ewe pwóróus: “Kopwe silei o weweiti ei: Seni fansoun ewe kapas a towu pwe Jerusalem epwe kaüsefäl tori waren ewe sounemenem, ätewe mi kepit, ükükün fisu fän fisu ier repwe la” me pwal “ükükün fisu fän wone me ruu ier.”​—Taniel 9:25.

      Ren an epwe ffat ineet ewe Messaia epwe war, sipwe akkomw silei ineet a poputá le pwénúetá án Taniel oesini usun pwálóón ewe Messaia. Me ren ena oesini, a poputá “seni fansoun ewe kapas a towu pwe Jerusalem epwe kaüsefäl.” Ineet “ewe kapas a towu”? Me ren ewe soumakken Paipel Nehemia, ena kapas a towu pwe epwe fférsefál ttitin Jerusalem “lon rüen ierin mwün ewe king Artaksasta.” (Nehemia 2:1, 5-8) Sou uruwo ra ánneta pwe án Artaksasta nemenem a poputá lón ewe ier 475 B.C.E.a Ina minne, ewe ier 455 B.C.E., iei arúween ierin an nemenem. Iwe, iei sia silei ineet a poputá pwénúetáán án Taniel oesini usun ewe Messaia, weween lón 455 B.C.E.

      Taniel a makkeei ifa úkúkún ttamen ewe fansoun tori epwe war “ewe sounemenem, ätewe mi kepit” are ewe Messaia. Ena oesini a kapas usun “fisu fän fisu ier” me pwal “fisu fän wone me ruu ier,” kapachelaper, 69 ier fán fisu. Chón Jus me lóóm ra silei ena sókkun kókkótun ákkáfisuun ier. Ren chék áwewe, ra pinini ewe ierin Sapat iteiten mwirin fisu ier, usun chék ar pinini ewe ránin Sapat iteiten mwirin fisu rán. (Ekistos 23:10, 11) Ina popun, ekkena 69 ier fán fisu lón ena oesini ra wewe ngeni 483 ier.

      Iei sipwele álleani ekkena ier. Ika sia poputá seni 455 B.C.E., iwe 483 ier epwe much lón 29 C.E. Ina wesewesen ewe ier Jesus a papatais lón me a wiliti ewe Messaia!b (Lukas 3:1, 2, 21, 22) Esap pwe a fókkun amwarar pwénúetáán tichikin ena oesini lón Paipel?

      Chart: Ewe oesini usun 70 ier lón Taniel 9 a osuni usun warotoon ewe Messaia

      a B.C.E. (Before Christian Era) a wewe ngeni ekkewe ier mwen fansoun Jesus, feiló. Iwe, C.E. (Christian Era) a wewe ngeni ekkewe ier poputá seni fansoun Jesus, feito.

      b Seni 455 B.C.E. ngeni 1 B.C.E. ina 454 ier. Seni 1 B.C.E. ngeni 1 C.E. ina eú ier (ese wor ier chero). Iwe, seni 1 C.E. ngeni 29 C.E. ina 28 ier. Ika sipwe apachafengeni ekkena nampa (454+1+28), kapachelaper epwe 483 ier. Iwe, ewe Messaia “a ninnila” lón 33 C.E. leatun ewe efiiken ier. (Taniel 9:24, 26) Ppii ewe puk Pay Attention to Daniel’s Prophecy! sópwun 11 me Insight on the Scriptures, Volume 2, pekin taropwe 899-901. Iir me ruu férien Chón Pwáraatá Jiowa.

  • Jesus Kraist, ewe Messaia mi Pwonetiw
    Met ewe Paipel a Wesewesen Apasa?

    • PWAL EKKÓCH ÁWEWE

      Jesus Kraist, ewe Messaia mi Pwonetiw

      JIOWA KOT a emmweni chómmóng soufós pwe repwe makkeei lón Paipel pwóróusen uputiwen, an angangen afalafal me málóón ewe Chón Amanaw mi pwonetiw fán iten sipwe tufichin esilla ewe Messaia. Meinisin ekkena oesini ra pwénúetá lón manawen Jesus Kraist. Ra wenewenen pwúng me tichik. Ren chék áwewe, sipwe ppii ekkóch oesini usun uputiwen ewe Messaia me manawan me lekúkkúnún.

      Ewe soufós Aisea a osuni pwe ewe Messaia epwe emén mwirimwirin King Tafit. (Aisea 9:7) Iwe, Jesus a uputiw lón tettelin Tafit.​—Mateus 1:1, 6-17.

      Mika, pwal emén néún Kot soufós, a osuni pwe ena át epwe emén sounemenem me epwe uputiw lón “Petlehem Efrata.” (Mika 5:2) Atun Jesus a uputiw a wor ruu telinimw lón Israel mi iteni Petleem. Eú a kkan ngeni Nasaret, ennefenin ena fénú me ewe eú a kkan ngeni Jerusalem lón Juta. Ewe Petleem mi kkan ngeni Jerusalem a iteni Efrata me lóóm. Jesus a uputiw lón ena telinimw, usun minne ewe oesini a apasa!​—Mateus 2:1.

      Pwal eú oesini a apasa pwe Néún Kot we epwe kékkéwu “seni Isip.” Lekúkkúnún Jesus, Josef me Maria ra uwealó Isip. Ra liwin seni Isip mwirin málóón Herotes, iwe ina pwénúetáán ewe oesini.​—Osea 11:1; Mateus 2:15.

      Lón ewe chart itelapan “Ekkewe Oesini Usun ewe Messaia” ekkena wokisin mi mak fán ena itelap “Oesini” ra awora pwóróus mi tichik usun ewe Messaia. Kese mochen apépéfengeniir me ekkena wokisin mi mak fán ena itelap “Pwénúetáán.” Óm féri ena epwe apéchékkúla óm lúkú pwe mi enlet án Kot Kapas.

      Atun kopwe káé ekkena wokisin, kopwe chemeni pwe ekkena oesini ra mak fitepúkú ier me mwen uputiwen Jesus. Iei alon Jesus: “Meinisin mine a mak usi lon än Moses we Allük, pwal lon ekewe puken soufos me Kölfel epwe fokun pwönüetä.” (Lukas 24:44) Iwe, ka tongeni cheki me lón pwisin noum na Paipel pwe ra pwénúetá tichikin ekkena oesini meinisin.