Minne Paipel A Apasa Usun Mufesen me Imufesen

Jiowa a mochen pwe ekkewe mi pwúpwúlú repwe tuppwél ngeni ar we pwon. Iei alon Jiowa atun a apwúpwúlúa ewe áeménún mwán me fefin: “Eman mwän epwe . . . pachei ngeni pwülüan, nge ekewe ruoman repwe wiliti eu chök inis.” Mwirin Jesus Kraist a pwal aloni alon Jiowa na me apachaatá ei: “Mine Kot a rifengeni esap wor eman aramas epwe mwütifeseni.” (Keneses 2:24; Mateus 19:3-6) Ina popun, me ren Jiowa me Jesus pwe pwúpwúlú ina eú riri lón unusen manawen ekkewe rúúemén nge epwe chék mu ika emén me leir a máló. (1 Korint 7:39) Pokiten pwúpwúlú ina eú kókkót mi pin, iwe esap mecheres ar repwe mufesen. Ren enletin, Jiowa a oput mufesen ika ese lóngólóng wóón Paipel.​—Malakai 2:15, 16.

Ifa ewe popun a mumutá mufesen me ren Paipel? Jiowa a oput lisowu lúkún pwúpwúlú me lisowumwáál. (Keneses 39:9; 2 Samuel 11:26, 27; Kölfel 51:4) Pokiten a ánioput me ren Jiowa ewe féfférún lisowumwáál ina popun a mutatá pwe epwe ina ewe popun an epwe wor mufesen. (Ren pwal ekkóch áwewe usun lisowumwáál, ppii Sópwun 9, parakraf 7.) Jiowa a mut ngeni ewe emén ese tipis an epwe filatá ika epwe chúen nóm ren pwúlúwan we mi tipis are mu seni. (Mateus 19:9) Ina popun, ika ewe ese tipis a filatá an epwe mu seni pwúlúwan we, iwe Jiowa esap letipengaw ren an mu seni. Nge chón ewe mwichefelin Chón Kraist, resap pesei emén an epwe mu seni pwúlúwan we. Ren enletin, mi wor ekkóch popun án ewe emén ese tipis filatá an esap mu seni pwúlúwan we mi tipis, ákkáeúin ika a pwáraatá pwe a enletin aier. Nge chókkewe mi wor ar pwúúng me ren Paipel ar repwe mu seni pwúlúwer kewe, repwe pwisin filatá me tipeeú ngeni met epwe fis ren mwirilóón ar kefil.​—Kalatia 6:5.

Ekkóch Chón Kraist ra filatá ar repwe imu seni pwúlúwer are mu seniir ren ekkóch popun mi kon ssenúk weiresin inaamwo ika pwúlúwer kewe rese féri ewe tipisin lisowumwáál. Ika a fis ena, iwe ewe Paipel a erá pwe eménna “epwe chök nonom lon an lipich, ika epwe chäsefäl ngeni pwülüan.” (1 Korint 7:11) Weween pwe eménna, esap tongeni pwúpwúlúsefál. (Mateus 5:32) Sipwe pwóróusfengen wóón ekkóch popun mi kon ssenúk weiresin, ekkóch ra ekieki pwe ina lóngólóngun ar repwe imu seni are mu seni pwúlúwer.

Eú popun án ekkóch imu seni pwúlúwer, pokiten pwúlúwer kewe rese mochen atufichi manawen chón ar famili. Neman eú famili epwe fókkun osupwang lón pekin aion pokiten án ewe sam ese mochen atufichi an we famili inaamwo ika a tufich ngeni. Ewe Paipel a apasa: “Are eman esap püsin tümwünü . . . chon an famili, a amamäsini an lükülük o an föför a ngau seni föförün eman esap souläng.” (1 Timoty 5:8) Ika ena sókkun mwán ese mochen siwili féfférún, iwe ewe fefin epwe filatá ika a meefi pwe a lamot an epwe pwisin túmúnúúr me néún kewe ren an imu seni pwúlúwan we. Mi lamot ngeni ekkewe Chón Kraist mwán mi ásimaw ar repwe etittinaéchú ika mi pwúng pwe ewe sam Chón Kraist ese mochen atufichi chón an we famili. Emén a tongeni katowu seni ewe mwichefel ika ese mochen atufichi chón an famili.

Pwal eú popun án ekkóch imu seni pwúlúwer, pokiten pwúlúwer kewe ra kon kawetengaw ngeniir. Án emén mi pwúpwúlú féfférún kawetengaw epwe tongeni efeiengawa are pwal mwo nge nieló ewe emén. Ika eménna i emén Chón Kraist, iwe ekkewe mwán mi ásimaw lón ewe mwichefel repwe etittina ika mi pwúng pwe a kan kawetengaw. Ekkewe mi arochoroch me mwááneson repwe tongeni katowu seni ewe mwichefel.​—Kalatia 5:19-21.

Pwal eú popun án ekkóch imu seni pwúlúwer, pokiten a kon ssenúk án pwúlúwer ú ngeni ar lúkú. Eli pwúlúwen emén a kan eppeti an esap fókkun fiti ewe fel mi enlet are eriáfféwú an epwe atai án Kot allúk. Ika ina, iwe ewe emén mi nóm fán ena esin weires epwe filatá an epwe imu seni pwúlúwan ika me ren ina chék ewe alen an epwe ‘aleasochisi Kot lap seni an aleasochisi aramas.’​—Föför 5:29.

Ese wor emén epwe eriáni ewe ese tipis an epwe imu seni pwúlúwan we are nóm ren, atun a fis ekkewe mettóch mi kon ssenúk weiresin usun chék met kewe sia kerán pwóróus wóór. Inaamwo ika chiechian kewe mi péchékkúl lón pekin lúkú me ekkewe mwán mi ásimaw lón ewe mwichefel ra tongeni álisi me awora kapasen fén seni Paipel, nge saminne re silei tichikin meinisin met mi fis lefilen ewe mwán me pwúlúwan we. Jiowa chék a kúna mettóch meinisin. Pwúngún emén Chón Kraist mi pwúpwúlú ese asamolu Kot are ewe kókkótun pwúpwúlú ika a sópweei an apwóróusa choun an kewe osukosuk lón an famili pokiten chék an mochen imu seni pwúlúwan we. Inaamwo ika emén a chék kefisitá met epwe efisi an imu seni pwúlúwan we ren, nge Jiowa a silei inaamwo ika a sótun túkúmaaló. Pwúngún, “förian kana meinisin ra säretä o pwäpwäla mwen mesan. Iwe, kich meinisin sipwe fokun pwärätä ngeni i ach föför meinisin.” (Ipru 4:13) Nge ika ewe mettóch mi kon ssenúk weiresin a kan fis ren langattam fansoun, iwe ese wor epwe esiita án emén Chón Kraist filatá le imu seni pwúlúwan we ika a meefi pwe ina chék met epwe ngaseló ren. Mwirilóón, “kich meinisin sipwe ütä mwen mesen Kot pwe sipwe kapwüng me ren.”​—Rom 14:10-12.