Itá Iei Met Kot A Tipeni?

A KATOWU chómmóng pwóróusen ipweri allúk, maun me féfférún furio lón simpung, TV me reitio! Ekieki mwo pwisin óm kewe osukosuk. Eli ka riáfféú ren semmwen are málóón emén attongeom. Eli meefiom a usun chék meefien ewe mwán mi múrinné itan Hiop, a apasa, “Ika ai kewe riaföü repwe kilo, . . . repwe fokun chou seni pien aroset.”—Hiop 6:2, 3.

Kopwe pwisin eisinuk:

Itá iei met Kot a tipeni fán itei me pwal fán iten chón fénúfan meinisin?
Upwe tongeni kúna me ia álillis ren ai kewe osukosuk?
Itá a wor ápilúkúlúk pwe sipwe kúna kinamwe wóón fénúfan?

Ewe Paipel a pélúwenéchú ekkena kapas eis.

EWE PAIPEL A APASA PWE IKKEEI EKKEWE EKKESIWIL KOT EPWE FÉRI WÓÓN FÉNÚFAN.

“Epwe talüpwasei chönün mas seni won meser meinisin. Esap chüen wor mäla ika letipeta ika kechü ika cheuch.”—Pwärätä 21:4

“Chon pechemä repwe mwetemwet usun eman chia.”—Aisea 35:6

“Mesen chon mesechun repwe nela.”—Aisea 35:5

“Ekewe sotup meinisin repwe . . . towu seni peiaser.”—Johannes 5:28, 29

“Esap wor eman chon ewe fanü epwe apasa pwe a samau.”—Aisea 33:24

“Epwe wor chomong wiich lon ewe fanü.”—Kölfel 72:16

Ewe fénúfan mi siwil ngeni minne Kot a tipeni: Chinnap a wiliti sáráfé, mi samau me chúún ra chikar, mi máló ra manawsefál, chómmóng mwéngé

KÚNA ÁLILLIS SENI MET EWE PAIPEL A APASA

Sisap mwittir ekieki pwe áneán chék minne a mak lón ekkena pekin taropwe me mwan. Kot a pwon pwe epwe apwénúetá ekkena mettóch, me ewe Paipel a áweweei ifa usun epwe féri.

Rúúemén mwán ra kákkáé Paipel ren ar néúnéú ewe puk Paipel A Apasa

Nge lap seni ena, ewe Paipel a affata ifa usun kopwe tongeni kúna pwapwa pwal mwo nge lón ei fansoun. Ekieki mwo pwisin óm kewe aúrek, áwewe chék, ren nafangawen moni, semmwen, málóón emén attongeom are osukosuk lón famili. Ewe Paipel a tongeni álisuk le ataweei óm osukosuk me oururuk ren an pélúweni ekkeei kapas eis:

Pwata sia kúkkúna riáfféú?
Ifa usun sipwe ataweei aúrekin manawach?
Ifa usun sipwe alapaaló pwapwaan ach famili?
Met a fis ngeni aramas lupwen ra máló?
Sipwe kúnasefáli attongeach kewe mi fen máló?
Ifa usun sipwe lúkúlúk pwe Kot epwe apwénúetá an kewe pwon fán iten mwachkkan?

Óm álleani ei puk a pwáraatá pwe ka mochen silei met ewe Paipel a apasa. Ei puk epwe álisuk. Nengeni mwo pwe a wor kapas eis fán iten eú me eú parakraf. Fite million aramas ra fen pwapwa le pélúweni ekkena kapas eis lón ar káé Paipel ren Chón Pwáraatá Jiowa. Amwo itá epwe pwal ina usum. Amwo Kot epwe efeiéchuk atun kopwe pwapwaiti óm kákkáé met ewe Paipel a wesewesen apasa!