Lesen 12

Pwarata Sufol ngeni Manau me Chcha

Epwe ifa ach ekiek ussun ewe mettoch manau? (1) Nnielo emon monukol lon luken inan? (1)

Ifa ussun ekkewe chon Kraist repwe pwarata pwe ra ekieki ussun ar resap efeiengaua pwisin ir pwal ekkewe ekkoch? (2)

Mei ngau ach sipwe nnielo ekkewe man? (3)

Ikkefa ekkoch foffor mi pwarata sufolungau ngeni ewe mettoch manau? (4) Ifa an Kot alluk ussun chcha? (5)

A pwal kapachelong ewe IV chcha? (6)

1. Jiowa, I ewe Popun manau. Monumanau meinisin ra manau pokiten Kot. (Kol Fel 36:9) Manau a wesewesen pin ngeni Kot. Pwal mwo nge manauen emon monukol lon luken inan we a auchea ngeni Jiowa. An emon nnielo emon monukol mi mammaar lon luken inan we a mwaal mwen mesen Kot.​—Ekistos 21:22, 23; Kol Fel 127:3.

2. Ekkewe chon Kraist mi enlet ra ekkekieki minne epwe tumunur me ekkewe ekkoch. Ra tumunu pwe waar kewe me imwer kewe ra murinno fan iten aramas resap feiengau rer. (Tuteronomi 22:8) Noun Kot kewe chon angang rese fori minne repwe tongeni feiengau are malo ren fan iten chok ar repwe pwapwa. Ina minne resap fiti ewe sokkun urumot mi efeiengaua ekkewe ekkoch. Repwe ti seniir ewe sokkun apwapwa mi apochokkula fofforun akkachofesa.​—Kol Fel 11:5; Jon 13:35.

3. Manauen ekkewe man ra pwal pin ngeni ewe Chon Foriir. Emon chon Kraist epwe tongeni nnielo ekkewe man fan iten anan mongo me ufan are fan iten an epwe tumunu pwisin i seni semmwen me feiengau. (Keneses 3:21; 9:3; Ekistos 21:28) Nge epwe mwaal an emon epwe arochongau ngeni ekkewe man are nniirelo fan iten chok urumot.​—An Salomon Fos 12:10.

4. Ese och ngeni ekkewe chon Kraist ar repwe un suppwa, nunu pu, me un safeien opuchopuch. Ekkeei sokkun foffor ra mwaal pun (1) repwe nemenalo manauach, (2) repwe efeiengaua inisich, me (3) ra limengau. (Rom 6:19; 12:1; 2 Korint 7:1) Epwe tongeni an epwe weires ngenikich ach sipwe poutalo ekkeei sokkun foffor. Nge a lamot ach sipwe fori ena pwe sipwe apwapwai Jiowa.

5. Chcha, ina pwal eu mettoch mi pin mwen mesen Kot. Kot a apasa pwe ewe ngun, are manau, a nonnom lon ewe chcha. Ina minne epwe mwaal an aramas unumi chcha. A pwal mwaal an aramas ochoch fituken man ika ese fen osupwaalo chchaan akkom. Ika emon man a maanfor are a malo lon eu sser, sisap ochoch. Ika emon a posu ren efoch wok are peki, epwe lamot ach sipwe muttir osupwaalo chchaan we ika sipwe ekiekin ochei fitukan.​—Keneses 9:3, 4; Lifitikos 17:13, 14; Fofor 15:28, 29.

6. Mei mwaal ach sipwe angei IV chcha? Chechchemeni mwo pwe Jiowa a alluku ngenikich ach sipwe tumunukich seni chcha. A wewe ngeni pwe a lamot ach sisap walong lon inisich chchaan emon are pwal mwo nge pwisin chchach mi fen isois. (Fofor 21:25) Ina minne ekkewe chon Kraist mi enlet resap angei IV chcha. Repwe angei ekkewe ekkoch sokkun alillis seni ekkewe tokter, awewe chok, pwal eu sokkun IV nge ese for seni chcha. Ra mochen manau, nge resap sotun selani manauer ren ar repwe atai an Kot kewe alluk.​—Mattu 16:25.

[Ekkewe sasing lón pekin taropwe 25]

Ren ach sipwe apwapwai Kot, sipwe tumunukich seni IV chcha, ekkewe foffor mi limengau, me ekkewe foffor sipwe tongeni feiengau are malo ren