Lesen 11

Ekkewe Sokkun Luku me Eoreni Mi Aletipengaua Kot

Ikkefa ekkewe sokkun luku me eoreni ra mwaal? (1)

Ekkewe chon Kraist repwe ita luku pwe Kot eu Trinitas? (2)

Pwata ekkewe chon Kraist mi enlet rese fori ewe apwapwaan Kirisimas, Paska, are apwapwaan ekkewe ranin uputiu? (3, 4)

Ekkewe mi malo repwe tongeni efeiengaua ekkewe mi manau? (5) Jises a malo won efoch irapenges? (6)

Ifa ukuukun watteen lamoten ach sipwe apwapwai Kot? (7)

1. Sap minne ekkewe sokkun luku me eoreni meinisin ra ngau. Nge Kot epwe oput ir kewe mi popu seni lamalam chofona are u ngeni ewe Paipel.​—Mattu 15:6.

2. Trinitas: Ita Jiowa eu Trinitas​—ulumon lon emon chok Kot? Aapwi! Jiowa, ewe Sam, I “ewe emon chok Kot mi enlet.” (Jon 17:3; Mark 12:29) Jises, Noun we mwanichi, iwe, a nom fan nemenien Kot. (1 Korint 11:3) Ewe Sam a lapalap seni ewe Nau. (Jon 14:28) Ewe ngun mi fel esap emon; ina an Kot we manaman.​—Keneses 1:2; Fofor 2:18.

3. Kirisimas me Paska: Jises ese uputiu Tisemper 25. A uputiu orun Oktoper 1, lupwen ekkewe chon masen siip ra nonnom lukun lepwin ren nour kewe siip. (Luk 2:8-12) Jises ese alluku ngeni ekkewe chon Kraist fan eu pwe repwe foffori apwapwaan an uputiu. Iwe nge, a ereni noun kewe chon kaeo ar repwe foffori eu achechchem, are chechchemeni, an we malo. (Luk 22:19, 20) Kirisimas me eorenian kewe ra popu seni ekkewe lamalam chofona loom loom. A pwal ina ussun ekkewe eorenien Paska, awewe chok ren an aramas nounou ekkewe sokun me usangi. Ekkewe popun chon Kraist rese foffori apwapwaan Kirisimas are Paska, iwe, ekkewe chon Kraist mi enlet ikenai resap pwal fori.

4. Ekkewe Ranin Uputiu: Porausen ekkewe ruu chok apwapwaan ranin uputiu mi mak lon ewe Paipel, ir forien aramas rese fel ngeni Jiowa. (Keneses 40:20-22; Mark 6:21, 22, 24-27) Ekkewe popun chon Kraist rese foffori apwapwaan ranin uputiu. Ewe eorenien foffori apwapwaan ranin uputiu a popu seni ekkewe lamalam chofona loom loom. Ekkewe chon Kraist ra liffangfengen me pwapwafengen lon ekkewe ekkoch fansoun lon ewe ier.

5. Niuokkusun Ekkewe mi Malo: Ekkewe mi malo rese tongeni fori are meefi och mettoch. Sisap tongeni alisir, me resap tongeni efeiengauakich. (Kol Fel 146:4; Än Salomon Afalafal 9:5, 10) Ewe ngun a tongeni malo; ese chuen manau mwirin an aramas malo. (Isikiel 18:4) Nge fan ekkoch ekkewe chonlang mi ngau, ekkewe timon, ra mwakeleta pwe ir ngunun ekkewe mi fen malo. Iwe, mei mwaal ekkewe eoreni meinisin mi efisata an aramas niuokkusiti are fel ngeni ekkewe mi malo.​—Aisea 8:19.

6. Irapenges: Jises ese malo won efoch irapenges. A malo won efoch ira. Ewe kapasen Kriik mi affou ngeni “irapenges” lon chommong Paipel a wewe ngeni efoch chok ira. Uluulun ewe irapenges a popu seni ekkewe lamalam chofona loom loom. Ekkewe popun chon Kraist rese nounou are fel ngeni ewe irapenges. Ina minne, kopwe ekieki pwe epwe pwung ach sipwe nounou efoch irapenges lon ach fel?​—Tuteronomi 7:26; 1 Korint 10:14.

7. Epwe tongeni an epwe weires ach sipwe poutalo ekkoch me lein ekkeei sokkun luku me eoreni. Eli mararum me chienom kewe repwe sotun etipetipaok pwe kesap siwili minne ka piin luku. Nge om kopwe apwapwai Kot epwe fokkun lamot lap seni om kopwe apwapwai aramas.​—An Salomon Fos 29:25; Mattu 10:36, 37.

[Sasing lón pekin taropwe 22]

Kot esap eu Trinitas

[Sasing lón pekin taropwe 23]

Kirisimas me Paska ra popu seni ekkewe lamalam chofona loom loom

[Sasing lón pekin taropwe 23]

Ese wor popun ach sipwe fel ngeni ekkewe mi malo are niuokkusitiir