Met A Fis Ngeniir?
NOPH me No, ikkena ekkewe it ewe Paipel a eita ngeni ruu iolapen Isip mi itefoulo iter Memphis me Thebes. Noph (Memphis) a nom orun 14 mail otiuen Cairo, iwe, a nom notouen ewe chanpupu Nail. Iwe nge, mwirin och fansoun, Memphis ese chuen iolapen Isip. Le poputaan ewe 15 senturi B.C.E., a wor an Isip minefoon iolap, No (Thebes), iwe, a nom orun 300 mail otiuen Memphis. Lein tatiuen ewe imwenfelin Thebes a nom ewe imwenfelin Karnak, ewe imwenfel chommong ra meefi pwe a watte seni meinisin mi for seni ekkewe urelap. Thebes me an we imwenfelin Karnak ra for fan iten ar fel ngeni Amon, ewe koten chon Isip mi lapalap seni meinisin.
Met ewe Paipel a oesini ussun Memphis me Thebes? Kapwung epwe fis ngeni an Isip we Farao me an kkewe kot, akkaeuin ewe kot mi lapalap seni meinisin, “Amon seni No.” (Jeremaia 46:25, 26) Ekkewe chon fel mi kito ikkewe ie repwe kuna “kiteter.” (Isikiel 30:14, 15) Iwe, ina ewe mettoch a fis. Tatiuen ewe imwenfel, ina chok ewe mettoch a chuen nonnom ren ewe fel ngeni Amon. Ikenai, ewe sopw itan Luxor a nonnom ikewe Thebes a pin nonnom ie me lom, iwe, pwal ekkoch kukkun sopw ra pwal nom lein tatiuen ena telinimw.
Iwe, ren Memphis, esorolo mettoch chilon chok an kkewe leenien peias. Emon sou kaeo Paipel itan Louis Golding a apasa: “Ren fitepuku ier ekkewe chon Arap mi akkufu Isip ra aea tatiuen Memphis pwe epwe eu leenien for fau fan iten ar repwe aueta iolaper we [Cairo] pekiloon ewe chanpupu. Pokiten a fokkun unus pwakaken ewe chanpupu Nail me angangen ekkewe chon Arap, esor efou fau a pukuta seni me lon ewe pwul mi chon ren fitu, fitu mail seni ewe telinimw.” Enlet, ussun ewe Paipel a oesini, Memphis a wiliti “eu fanuapo, eu leeni mi tatakis esap so.”—Jeremaia 46:19.
Ekkeei ruu chok poraus mi pwarata pwungun an ewe Paipel kkewe oesini. Kiteterin Thebes me Memphis a ngenikich popun ach sipwe eani lukuluk won an ewe Paipel kkewe oesini resaamwo pwonuta.—Kol Fel 37:10, 11, 29; Luk 23:43; Pwarata 21:3-5.
[Credit Line]
Photograph taken by courtesy of the British Museum