LESEN 28
Pwári Óm Aúcheani Met Jiowa me Jesus Ra Féri fán Itom
Met meefiom atun emén chienom a liffang ngonuk eú liffang mi fókkun múrinné? Ese mwáál, ka fókkun pwapwa me ka mochen pwár ngeni chienom na pwe ka fókkun aúcheani ena liffang. Jiowa me Jesus ra fang ngenikich eú liffang mi kon aúchea seni meinisin. Ifa ena liffang, me ifa usun sia tongeni pwári pwe sia aúcheani?
1. Ifa eú alen ach sipwe pwári pwe sia aúcheani met Kot me Kraist ra féri fán itach?
Paipel a erá pwe “meinisin mi lükü [Jesus]” repwe tongeni kúna manaw esemuch. (Johannes 3:16) Ifa usun sipwe pwári ach lúkú Jesus? A lamot ach sipwe pwári ach lúkú ren minne sia eáni kefil me ren minne sia féri. (James 2:17) Atun sia pwári ach lúkú ren met sia féri me apasa, sia apéchékkúla ewe riri lefilach me Jesus me Seman we, Jiowa.—Álleani Johannes 14:21.
2. Ifa ewe rán mi aúchea epwe álisikich le pwári ach aúcheani minne Jiowa me Jesus ra féri?
Lón ewe pwinin me mwen án Jesus máló, a ereni néún kewe chón káé pwal eú alen ar repwe pwári ar aúcheani an we asor. A ereniir ar repwe chufengen pwe repwe féri eú mwich mi aúchea ewe Paipel a eita ngeni “ewe mongö än ach Samol,” a pwal iteni Áchechchemen án Kraist máló. (1 Korint 11:20) Jesus a mochen pwe néún kewe aposel me meinisin Chón Kraist mi enlet mi manaw mwiriir, repwe chemeni pwe a fangóló manawan fán ásengesich. Ina minne, iei met a allúkú ngenikich: “Oupwe föri ei pwe oupwe chechemeniei.” (Lukas 22:19) Atun ka fiti ewe Áchechchem, ka pwári óm aúcheani án Jiowa me Jesus tong mi lapalap fán itach.
KÚTTAFICHI
Etittina pwal ekkóch alen óm kopwe tongeni pwári óm aúcheani ewe tong mi lapalap Jiowa me Jesus ra pwári ngenikich. Ppii pwata a fókkun aúchea Áchechchemen án Kraist máló.
3. Met sipwe féri pwe sipwe pwári ach kilisou?
Anchangei pwe emén a selánuk atun ka mwalum. Kopwe ménúki met eménna a féri fán itom? Are kopwe kútta alen óm kopwe pwári óm kilisou ngeni ren met a féri?
Sia tufichin eáni manaw esemuch pokiten án Jiowa kirekiréch. Álleani 1 Johannes 4:8-10, me mwirin pwóróusfengen wóón ekkeei kapas eis:
Pwata án Jesus we asor ina eú liffang mi aúchea?
Met meefiom ren minne Jiowa me Jesus ra féri fán itom?
Ifa usun sia tongeni pwári ach kilisou ren met Jiowa me Jesus ra féri fán itach? Álleani 2 Korint 5:15 me 1 Johannes 4:11; 5:3. Mwirin álleaan eú me eú ekkena wokisin, pwóróusfengen wóón ei kapas eis:
Me ren ena wokisin, ifa usun sipwe pwári ach kilisou?
4. Áppirú Jesus
Ach áppirú Jesus, ina pwal eú alen ach sipwe pwári ach kilisou. Álleani 1 Petrus 2:21, me mwirin pwóróusfengen wóón ei kapas eis:
Ifa usun ka tongeni áppirú Jesus?
Jesus a aúcheani án Kot we Kapas, a afalafala ewe kapas allim, me a álisi aramas
5. Fiti Áchechchemen án Kraist máló
Ren óm kopwe silei met a fis lón ewe áeúin Fááfen Ach Samol, álleani Lukas 22:14, 19, 20. Mwirin pwóróusfengen wóón ekkeei kapas eis:
Met a fis atun ewe Fááfen Ach Samol?
Met ewe pilawa me ewe wain ra liosuetá?—Ppii wokisin 19 me 20.
Jesus a mochen án néún kewe chón káé repwe féri ewe Fááfen Ach Samol fán eú iteiten ier lón ewe rán a máló lón. Ina popun, Chón Pwáraatá Jiowa ra mwichfengen iteiten ier pwe repwe féri ena Áchechchem lón ewe esin napanap a allúkú ngeniir. Ren óm kopwe silei pwóróusen ena mwich mi aúchea, fichi ei VIDEO. Mwirin pwóróusfengen wóón ei kapas eis.
Met a kan fis atun ewe Áchechchem?
Ei pilawa me ei wain, a wor met ra liosuetá. Ei pilawa a liosuetá inisin Jesus mi unuséch a fangóló fán itach, nge ei wain a liosuetá chchaan
EKKÓCH RA ERÁ: “Kopwe chék lúkú Jesus, iwe kopwe kúna manaw.”
Ifa usun ka tongeni néúnéú Johannes 3:16 me James 2:17 le pwári ngeniir pwe mi wor met mi lamot repwe pwal féri me lúkún ar eáni lúkú?
MENLAPAN
Sia pwári ach kilisou ren met Jesus a féri fán itach ren ach pwári ach lúkú i, me ach fiti Áchechchemen an we máló.
Enniwili
Ifa usun sipwe pwári ach lúkú Jesus?
Ifa usun kopwe pwári óm aúcheani met Jiowa me Jesus ra féri fán itom?
Pwata a mmen aúchea ach sipwe fiti Áchechchemen án Kraist máló?
PWAL EKKÓCH PWÓRÓUS
Met án Kraist máló a amwékútúkich le féri?
Alapaaló óm silei usun ewe mettóch lúkú me ifa usun ka tongeni pwári óm lúkú.
“Anganga Óm Lúkú án Jiowa Kewe Pwon” (Ewe Leenien Mas, October 2016)
Lón ei lesen itelapan “I Feel Clean, Alive, and Whole,” ppii met a fis lón manawen emén fefin mwirin an káé usun án Kraist we asor.
Ppii pwata ekkóch chék ra mwéngé ewe pilawa me ún ewe wain.