Pwata Aramas Ra Erá pwe Kot Emén mi Kirikiringaw?

KA MÁIRÚ ren ewe kapas eis mi mak wóón péén ei puk? Ekkóch ra máirú ren. Nge chómmóng ikenái ra fen tipemwaramwar ika Kot emén mi kirikiringaw are ra chék ekiekietá pwe i mi kirikiringaw. Pwata?

Ekkóch ra manawewu seni ekkewe feiengaw watte mi fiffis, choweán taifun, chechchechin fénú me metakkan, ra eis: “Pwata Kot a mutatá fisitáán ekkeei mettóch? Kot ese áfánni met a fiffis ngeni aramas? Are I emén mi kirikiringaw?”

Ekkóch ra pwal osukosuk atun ar álleani ewe Paipel. Ra álleani ekkóch pwóróus usun pwóróusen Noa me ewe Noter, iwe ra ekieki, ‘Met popun emén Kot mi tong epwe nieló meinisin ekkena aramas? I mi kirikiringaw?’

Ka pwal eáni ena esin kapas eis fán ekkóch? Are ekkóch aramas mi ekieki ika Kot mi kirikiringaw ra fen eisinuk nge a weires ngonuk óm kopwe pélúweni? Ese pwal lifilifil menni leir, nge kopwe ekieki pwal eú kapas eis mi tongeni álisuk.

PWATA SIA OPUT KIRIKIRINGAW?

Popun sia oput kirikiringaw pún sia tongeni mirititi minne mi pwúng me mwáál. Ina met a asokakicheló seni man. Ewe Chón Fératá a férikich “lon püsin lapalapan.” (Keneses 1:27) Met weween ena? Kot a ngenikich ewe tufich ach sipwe napanapeni napanapan kewe me eáni an ekieki usun minne mi pwúng me mwáál. Ekieki ei: Ika pwe sia angei seni Kot ewe tufichin mirititi minne mi pwúng me mwáál me sia kan oputa féffér mi kirikiringaw, iwe itá esap pwáraatá pwe Kot mi pwal oputa?

Ewe Paipel a affata ena pwóróus, Kot a erá: “Ai al ra tekia seni ämi al kana, nge ai ekiek seni ämi ekiek kana.” (Aisea 55:9) Ika pwe sia apwúngaló pwe Kot mi kirikiringaw, iwe esap pwe usun itá sia fen sorei met ewe Paipel a apasa, pwe usun itá me rech ach ekiek a tekia seni án Kot ekiek? Epwe fen eú alen tipachem ach sipwe kútta pwal ekkóch pwóróus me mwen ach sipwe apwúngaló. Neman mi lamot sipwe fen eis, ‘Pwata usun itá ekkóch féfférún Kot mi kirikiringaw?’ lap seni ach sipwe eis ika ‘Kot emén mi kirikiringaw?’ Ren ach sipwe silei ena, sipwe nengeni met wesewesen weween “kirikiringaw.”

Lupwen sia erá pwe emén mi kirikiringaw, sia apwúngaló pwe a eáni ekiek mi mwáál. Emén mi kirikiringaw a pwapwaiti an kúna aramas ar riáfféú, are ese áfánni ar kúna weires. Ina minne, emén sam mi apwúngú néún át pokiten an pwapwaiti le áweiresi meefian, i emén sam mi kirikiringaw. Nge emén sam mi apwúngú néún át ren an epwe emiriti are túmúnú, i ewe sókkun sam mi múrinné. A mecheres ach sipwe wewengaweiti ewe popun ekkóch aramas ra féri ekkóch mettóch. Kopwe fen weweiti weween ena pwóróus ika emén a fen apwúngúmwááluk.

Sipwe nengeni ekkewe ruu popun ekkóch aramas ra ekieki pwe Kot emén mi kirikiringaw. Ikkeei, ekkewe feiengaw watte sia kúkkúna ikenái me ekkewe pwóróus lón Paipel usun án Kot apwúngú aramas. Ekkeei pwóróus ra wesewesen pwáraatá pwe Kot emén mi kirikiringaw?