Pwata Kopwe Mochen Silei Masouen ewe Paipel?

Ewe Paipel mi kon iteféúló seni puk meinisin wóón fénúfan. Met popun? Pún a mecheres ach weweiti. A masou ren wesewesen pwóróusen manawen aramas me ar ririfengen lefiler me pwal ar riri ngeni Kot. Ekkeei pwóróus ra asukulakich lesen mi álilliséch me a néúnéú kapas mi mecheres me wenechar pwe a tongeni afféú ngeni fite púkú kapasen fénúfan pwe sókkópaten aramas lón sókkópaten fénú meinisin ese lifilifil ineet ra manaw repwe weweiti. Pwal eú, án Paipel kewe kapasen emmwen ra sópwéch fansoun meinisin.

Nge ewe a kon lamot seni meinisin, ewe Paipel esap chék eú puk usun Kot nge ina eú puk seni Kot. A pwári iten Kot we, napanapan kewe, me ewe popun a fférútá fénúfan me aramas esap tongeni siwil. Paipel a pwal apwóróusa usun ewe úfengen seni me lóóm lefilen minne mi pwúng me minne mi ngaw ina ewe pwóróus mi amwarar mi weneiti aramas meinisin wóón fénúfan mi apwapwa lesópwólóón. Kopwe álleani ewe Paipel fán ekiek mi tekison pwe ina lóngólóngun ewe lúkú me ápilúkúlúk.

Mi kawor lón ewe Paipel ekkewe pwóróus sise tongeni kúna seni pwal ekkóch puk. Áwewe chék, ewe Paipel a áitingenikich ewe enlet usun ekkeei pwóróus:

• Ia sia feito me ie me popun sia riáfféú

• Minne Kot a aota pwe epwe méénisefáli aramas

• Minne Jesus a fen féri fán itach

• Minne epwe fis ngeni ei fénúfan me aramas

Pwata kese nengeni ekkewe pekin taropwe mwirin me ekieki ika metekkewe masouen ewe Paipel?