Ifa Usun Sia Fisitá?

Lón kapas mi mecheres ewe áeúin puk lón Paipel itan Keneses, a áweweei fférútáán unuselapen láng me fénúfan: “Lepopun Kot a föri läng me fanüfan.” (Keneses 1:1) Mwirin án Kot féri ekkewe irá me man, a fératá ekkewe popun aramas Atam me Efa. Nge ra sókko seni ekkewe man pwe aramas ra napanapeni napanapen Kot kapachelong ar eáni ewe tufichin pwisin filatá. Ina minne, mwirilóón ar féffér epwe seni pwisin minne ra filatá. Ika ra álleasochisi án Kot kewe emmwen, iir repwe álisatá minne Kot a tipeni pwe repwe áeménún semelapen me inelapen familien aramas wóón unusen fénúfan me pwapwaesini manaw mi kinamwe me manaw mi unuséch wóón fénúfan tori feilfeiló.

Iwe nge, emén chónláng are emén sise tongeni kúna, a néúnéúmwáálli aramas lón pwisin an tipemmóng. Iwe a wiliti Satan weween “Chón ú ngeni.” Satan a afósa emén serepenit pwe epwe otupu Efa. Iwe a ereni Efa pwe epwe múrinné manawan ika esap nóm fán án Kot emmwen. Atam me Efa ra álleasochisi Satan ren ar atai ewe riri lefiler me ewe Chón fériiretá. Pokiten ar kefilingaw, a péút seni semelapach me inelapach kewe manaw esemuch me a torikich meinisin tipis, sise chúen unuséch, me sise tongeni pépééni máló.

Mwittir chék, Kot a esilei an mochen angang wóón ei mettóch mi alólilen, me ngeni mwirimwirin Atam kewe eú alen ar repwe angei manaw esemuch. Kot a oesini pwe epwe wor ‘mwirimwir’ mi kkóló aúchean epwe nieló Satan me amóeló ekkewe riáfféú meinisin Satan, Atam me Efa ra efisatá. (Keneses 3:15) Iwe ié na ewe ‘mwirimwir’? Fansoun epwap pwisin affata.

Iteitan, Satan a sótuni le eppeti án Kot we kókkót mi múrinné. Tipis me féfféringaw ra mwittir chéúfetál. Kot a apwúngaló pwe epwe nieló ekkewe aramas mi ngaw lón eú noter. A ereni Noa pwe epwe falei ewe waimw usun eú watteen pwóór mi tongeni ppiias pwe epwe amanawa pwisin i me chón an we famili pachelong ekkewe man Kot a ereni epwe uweiirelong lón ewe waimw.

Eú ier mwirin an a fis ewe Noter, Noa me an we famili ra towu lón ei fénúfan nge a limeliméch. Nge esaamwo pwá ewe ‘mwirimwir.’

—A lóngólóng wóón Keneses sópwun 1-11; Jutas 6, 14, 15; Pwärätä 12:9.