“Äm Aia Küna ewe Messaia”!

Órun fépúkú ier mwirin ewe sáingoon Tesin Ipru a mak, án Mika we oesini usun ewe Messaia a pwénúetá, weween Jesus a uputiw lón Petleem. Arapakkan 30 ier mwirin, lón ewe ier 29, ewe áeúin kinikinin án Taniel oesini usun warotoon ewe Messaia a pwénúetá. Jesus a papatais, me Kot a epiti ren ewe manaman mi fel. Iwe ewe Messaia ina i ewe Mwirimwir a pwá lón ewe chék fansoun mi affat.

Mwittir chék Jesus a poputááni an “afalafala ewe Pworausen Manau usun Mwün Kot.” (Lukas 8:1) Usun met a fen oesini, a pwúng pwe Jesus a kirekiréch, tipepwetete me enletin áfánni ekkewe ekkóch. An asukul a álilliséch me tong, me a apéchékkúla aramas seni “sokopaten samau me apwangapwang.” A pwáraatá pwe Kot a nónnóm ren. (Mateus 4:23) Aramas mi sókkópat ieriir ra rangeto ren Jesus me apasa: “Äm aia küna ewe Messaia”!​—Johannes 1:41.

Jesus a oesini pwe me mwen an we Mwú epwe unusen nemenem, epwe wor maun, chechchechin fénú me ekkewe ekkóch osukosuk wóón fénúfan. A pesei meinisin ar repwe “mamasa.”​—Markus 13:37.

Jesus emén aramas mi unuséch mi amwéchú an tuppwél ngeni Kot, nge ló, ló, ló, chón koputan kewe ra nieló. An we máló a awora ewe asor mi unuséch mi méénisefálikich ren met Atam me Efa ra péútaaló, weween ewe ápilúkúlúkún manaw esemuch lón Paratis.

Ren án Jesus máló a apwénúetá ewe oesini usun án Kot amanawatá mwirin úlúngát rán usun emén sise tongeni kúna nge mi manaman. Iwe Jesus a pwá ngeni lap seni 500 néún kewe chón káé. Me mwen epwe feitá láng a ewisa ngeni néún kewe chón tapweló mwirin ar repwe esilefeili ewe pwóróus allim usun i me an we Mwú ngeni “chon ekewe mwü meinisin.” (Mateus 28:19) Ifa úkúkún ar unusen apwénúetá ena wis?

—A lóngólóng wóón Mateus, Markus, Lukas, Johannes, 1 Korint.