Kopwe Tipemecheres Le Alélléfengeni Óm Lúkú Me Ewe Paipel?

EN EMÉN Chón Kraist? Ika ina, iwe en emén me lein ekkewe lap seni 2 billion aramas wóón fénúfan mi apasa pwe iir chón tapweló mwirin Kraist. Lón ei fansoun, mi wor fitengeréú lamalam mi iteni Chón Kraist, nge ra tipefesen wóón ar lúkú mi ú fengen me sókkopaten ekiek. Ina popun, minne ka lúkú mi fókkun tongeni sókko seni lúkúen ekkewe ekkóch mi pwal erá pwe iir Chón Kraist. Nge, mi lamot minne ka eáni lúkú? Ewer, mi lamot ika pwe ka mochen fiti áitien ewe lamalamen Chón Kraist mi tipeeú ngeni Paipel.

Ekkewe popun chón tapweló mwirin Jesus Kraist ra iteni “Chon Kraist.” (Föför 11:26, Testament Mi Fö) Ese lamot an epwe pwal wor ekkóch it aramas repwe esiller ren pún mi wor eú chék mwicheichen Chón Kraist lón ena atun. Ekkewe Chón Kraist ra tipeeúfengen le fiti áitien me emmwenien Jesus Kraist, ewe chón poputááni ena lamalamen Chón Kraist. Nge ifa usun óm na lamalam? Ka lúkú pwe a asukula ngeni aramas minne Kraist a eáni asukul me met ekkewe popun Chón Kraist ra eáni lúkú? Ifa usun kopwe enletin silei ika mi ina usun? A wor eú chék alen óm kopwe silei, ina óm néúnéú ewe Paipel pwe epwe affata ngonuk.

Ekieki ei: Jesus Kraist a fókkun súféliti ewe Paipel pwe ina án Kot we Kapas. Ese pwapwaiti chókkewe mi alamotongawa áitien ewe Paipel ren ar álleasochisi eérenien aramas lap seni Paipel. (Markus 7:9-13) Ina minne sia tongeni apasa pwe chón tapweló mwirin Kraist mi enlet repwe pwal alónga minne ra lúkú wóón ewe Paipel. Ina popun, emén me emén Chón Kraist epwe tongeni pwisin eisini, ‘Áitien ai lamalam a tipeeú ngeni ewe Paipel?’ Ren óm kopwe pélúweni ena kapas eis, pwata kese alélléfengeni met óm lamalam a apasa me met ewe Paipel a wesewesen apasa?

Jesus a apasa pwe mi lamot ach fel ngeni Kot epwe lóngólóng wóón ewe enlet, ewe enlet mi nóm lón ewe Paipel. (Johannes 4:24; 17:17) Ewe aposel Paulus a pwal apasa pwe ach kúna manaw a lóngólóng wóón ach “silei ewe let.” (1 Timoty 2:4) Ina minne, a lamot pwe minne sia lúkú epwe lóngólóng wóón ewe pwóróus mi enlet lón Paipel. Pún ach kúna manaw a lóngólóng wóón!

IEI USUN ACH SIPWE ALÉLLÉFENGENI ACH LÚKÚ ME EWE PAIPEL

Aua etiwok le álleani ekkeei wonu kapas eis lón ei lesen me ppii met pélúwer me ren Paipel. Cheki lón Paipel ekkewe wokisin mi makketiw me ekieki pélúwen ekkena kapas eis. Mwirin pwisin eisinuk, ‘Ifa usun áitien ai lamalam a léllé ngeni are sókko seni met ewe Paipel a apasa?’

Ei asóssót mi mwoch a tongeni álisuk le féri eú etittin mi fókkun tongeni álilliséch ngonuk. Kopwe tipemecheres le alélléfengeni ekkóch áitien óm lamalam me met ewe Paipel a apasa? Chón Pwáraatá Jiowa repwe pwapwa le álisuk le etittina ewe pwóróus mi enlet lón Paipel mi fataffatéch. Pwata kese tingorei emén me leir an epwe káé ngonuk Paipel nge ese kamé? Are, ka tongeni tétá wóón ám we website jw.org.

1 KAPAS EIS: Ié ena Kot?

PÉLÚWAN: Jiowa, i Semen Jesus we. I ewe Kot tori feilfeiló me ewe mi unusen manaman Chón Fératá mettóch meinisin.

IEI MET EWE PAIPEL A APASA:

“Äm aia kilisou ngeni Kot Semen ach Samol Jesus Kraist fansoun meinisin lupwen aia iotek fänäsengesimi.”—Kolose 1:3.

“En Kot, en chök ewe Samol mi Lapalap.a Ka föri läng, ekewe sässärin läng mi fokun tekia, pwal mettochun lon meinisin. Ka föri fanüfan me meinisin mine a nom won.”—Nehemia 9:6.

Pwal ppii Sowel 2:32; 1 Timoty 1:17.

a Ewe kapasen lepoputáán lón ewe Paipel are Testamentin Lom me Testament Söfö, a apasa pwe “lon ewe Testamentin Lom sia nöünöü . . . ‘Samol mi Lapalap’ fän iten Jiowa ika Yahwe.”

2 KAPAS EIS: Ié ena Jesus Kraist?

PÉLÚWAN: Jesus i néún Kot we mwánichi. Mi wor poputáán Jesus pún Kot a fératá i. Jesus a nóm fán án Kot nemenem me a álleasochisi minne a tipeni.

IEI MET EWE PAIPEL A APASA:

“Semei a tekia seniei.”—Johannes 14:28.

“Kraist . . . a lapalapeni lapalapen Kot, ewe sisap tongeni küna. I Nöün we mwänichi, a tekia seni förien Kot meinisin.”—Kolose 1:15.

Pwal ppii Mateus 26:39; 1 Korint 15:28.

3 KAPAS EIS: Met ewe ngún mi fel?

PÉLÚWAN: Ewe ngún mi fel, esap emén, nge ina eú manaman Kot a áeá pwe epwe apwénúetá letipan. Aramas ra tongeni ur ren ena ngún mi fel me ra angei péchékkúl seni.

IEI MET EWE PAIPEL A APASA:

“Lupwen Elisapet a rong ewe kapong seni Maria, ewe mönükol a mwökütüküt me lon lukan. Iwe, Elisapet a ur ren Ngünmifel.”—Lukas 1:41.

“Ämi oupwe angei ewe manaman lupwen Ngünmifel epwe feitiu womi.”—Föför 1:8.

Pwal ppii Keneses 1:2; Föför 2:1-4; 10:38.

4 KAPAS EIS: Met ewe Mwúún Kot?

PÉLÚWAN: Mwúún Kot, ina eú mwú lón láng. Jesus i Kingen ena Mwú. Ekiseló chék ena Mwú epwe apwénúetá letipen Kot wóón unusen fénúfan.

IEI MET EWE PAIPEL A APASA:

“Ewe afümanün chon läng a ettiki nöün rappwa, iwe, a wor chomong möngüngü mi leüömong lon läng, ra apasa, ‘Ewe manamanen nemeni fanüfan, iei a nom ren ach Samol me nöün we Messaia. Iwe, epwe nemenem tori feilfeilachök.’”—Pwärätä 11:15.

Pwal ppii Taniel 2:44; Mateus 6:9, 10.

5 KAPAS EIS: Meinisin aramas mi múrinné repwe feitá láng?

PÉLÚWAN: Aapw. Eú chék kúmiin aramas mi tuppwél mi kaúk chóchóón mi filitá me ren Kot ar repwe feitá láng. A eita ngeni ewe “mwich mi kisikis.” Repwe fiti Jesus lón ewe wis king me nemenem wóón aramasen fénúfan.

IEI MET EWE PAIPEL A APASA:

“Ousap niuokus, ämi mwich mi kisikis, pun Sememi a pwapwa ren an epwe ngenikemi ewe mwü.”—Lukas 12:32.

“Repwe nöün Kot me nöün Kraist souasor, repwe pwal eti Jesus le nemenem.”—Pwärätä 20:6.

Pwal ppii Pwärätä 14:1, 3.

6 KAPAS EIS: Ifa letipen Kot ngeni fénúfan me aramas?

PÉLÚWAN: Fán án Kot we Mwú, ei fénúfan epwe wiliti eú paratis me ekkewe aramas mi tuppwél repwe pwapwaiti péchékkúlen inis mi unuséch, kinamwe fóchófóch, me manaw esemuch.

IEI MET EWE PAIPEL A APASA:

“Chon tipetekison repwe fanüeni ewe fanü o pwapwaäsini ar feiöch me kinamwe mi somwola.”—Kölfel 37:10, 11.

“Epwe talüpwasei chönün mas seni won meser meinisin. Esap chüen wor mäla ika letipeta ika kechü ika cheuch, pun ekewe mettochun lom ra morola.”—Pwärätä 21:3, 4.

Pwal ppii Kölfel 37:29; 2 Petrus 3:13.