Met Ewe Paipel A Apasa?

Ewe mettóch lamalam ina pwisin chék férien aramas?

EKKÓCH ARAMAS RA LÚKÚ pwe aramas ra chék pwisin fératá lamalam; ekkóch ra lúkú pwe Kot a áeá lamalam le álisi aramas ar repwe arap ngeni. Nge en, met óm ekiek?

PAIPEL A APASA

Mi wor eú “lamalam mi limöch o esap wor limengawan mi tiw me mwen mesen ewe Kot.” (James 1:27, Agapé) Ewe lamalam mi limeliméch are mi let a feito seni Kot.

MET SIA PWAL TONGENI KÁÉ SENI PAIPEL?

• Ren án Kot epwe pwapwaiti eú lamalam, mi lamot epwe lóngólóng wóón ewe pwóróus mi enlet lón Paipel.​—Johannes 4:23, 24.

• Mi lamotongaw ekkewe lamalam mi lóngólóng wóón án aramas ekiek.​—Markus 7:7, 8.

Mi wor lamoten óm kopwe chóni eú lamalam?

MET KOPWE APASA?

• Ewer

• Aapw

• Neman

PAIPEL A APASA

“Ousipwe ekiekifengeni usun ach sipwe tongeni alollolätai chienach ren ach eäni chen me föför mürina. Sisap likiti ach eti ach mwichfengen.” (Ipru 10:24, 25) Kot a mochen pwe chón fel ngeni i repwe mwichfengen, usun eú mwichen aramas mi fen kkótóló.

MET SIA PWAL TONGENI KÁÉ SENI PAIPEL?

• Mi lamot pwe chón eú lamalam repwe tipeeúfengen wóón minne ra lúkú.​—1 Korint 1:10, 11.

• Chón ewe lamalam Kot a pwapwaiti repwe usun eú mwichen pwipwi wóón unusen fénúfan.​—1 Petrus 2:17.