Dhilebiwe na Joau
17 Mmalele Yezu ologa dhilobo esi ohang’ana wirimu, olobela: “Baba ofiya mudhidhi. Kamuttittimiheni mwaninyu wi mwaninyu vina auttittimiheni, 2 dhahene ninga munvahilenyu owodha wowattonga attu otene, wi àvahe egumi yohimala otene abale anvahilenyu. 3 Egumi yohimala jiji: Ouziwani* nyuwo Mulugu mmodha webaribari, omuziwa vina Yezu Kristu omurumilenyu. 4 Ddihuttittimihani mwilaboni vina ddihipuliha mabasa addivahilenyu. 5 Ovano, Baba, kaddittittimiheni vakuvi na nyuwo, na nttittimiho nanna miyo valimi na nyuwo elabo ehinatti ottanddiwa.
6 “Ddihaziwiha nzina nenyu attu addivahilenyu mwilaboni. Awene àli enyu, vina nyuwo muddivaha, vina awene ahiwelela nzu nenyu. 7 Ovano awene anoziwa wi dhotedhene dhiddivahilenyu dhindha mwa nyuwo, 8 sabwani ddihalaleyela nzu niddivahilenyu, vina awene arumela. Txibarene anoziwa wi ddidhile ninga mwimeleli wenyu vina anorumela wi ddi nyuwo oddirumile. 9 Miyo ddinalobelela awene, kaddinalobelela attu a mwilaboni, ddinalobelela abale addivahilenyu, sabwani awene benyu. 10 Dhaga dhotene senyu, dhenyu saga vina miyo ddihittittimihiwa vari vawa.
11 “Miyo ddinobudduwamo mwilaboni, mbwenyi awene ali mwilaboni, miyo ddindha wenewo olinyu. Baba Wokoddela, kawang’aneleni mwaha wa nzina nenyu, nzina niddivahilenyu wi akale mumodhani* dhahene ninga iyo nili mumodhani.* 12 Vàli miyo na awene ddannawang’anela mwaha wa nzina nenyu, nzina niddivahilenyu vina ddihabarela, kavo orimelilevo ahili ole onfuna otolotxiwa; dhahene dhihakwanihedheya dhilebiwe mmaleboni. 13 Ovano ddindha wa nyuwo vina ddinloga esi mwilaboni, wi awene akaane wagalala wowakwana ninga miyo. 14 Ddihavaha nzu nenyu, vano elabo enowawidda sabwani kankosa epaddi ya elabo, dhahene ninga miyo ohinkosa epaddi ya elabo.
15 “Kaddinulobelelani wi mwaburutxemo mwilabonimwa, mbwenyi mwawang’anelege sabwa ya mwiddani.* 16 Awene kankosa epaddi ya elabo, dhahene ninga miyo ohinkosa epaddi ya elabo. 17 Kàkoddeliheni na ebaribari; nzu nenyu tta ebaribari. 18 Dhahene ninga nyuwo muddirumile mwilaboni, miyo vina ddiharuma mwilaboni. 19 Miyo ddinovikoddeliha sabwa yawa, wi awene vina akoddelihiwe na ebaribari.
20 “Kaddinalobelela awenevi, mbwenyi vina abale anaddiroromele mwa wiwa mazu analaleyani, 21 wi otene akale mmodha* ninga nyuwo Baba, muli mumodhani na miyo, vina miyo ddili mumodhani na nyuwo wila awene vina akale mumodhani na iyo, wi attu a elabo arumele yawi ddi nyuwo oddirumile. 22 Ddihavaha nttittimiho niddivahilenyu, wila awene akale mumodhani dhahene ninga iyo nili mumodhani. 23 Miyo mumodhani na awene, nyuwo mumodhani na miyo, wi wiwanana wawa wakwane vina attu a elabo aziwe yawi nyuwo muddiruma vina muhakwela dhahene ninga muddikwelilenyu. 24 Baba, ddinfuna wi abale addivahilenyu akale na miyo mburo onakalemi, wi one nttittimiho niddivahilenyu, vowi muddikwelile elabo ehinatti ottanddiwa. 25 Baba woligana, elabo txibarene kinuziwani, mbwenyi miyo ddinouziwani, vina attu aba anoziwa wi ddi nyuwo oddirumile. 26 Miyo ddihaziwiha nzina nenyu vina ddinele waziwihavi, wi okwela oddikwelilena nyuwo okale mwa awene, miyo ddikale mumodhani na awene.”