Dhilebiwe na Marko
1 Omaromo wa miselu dhapama dha Yezu Kristu, Mwana Mulugu: 2 Ninga mulebele namavuhulela Izaiya eraga: “(Moone! Ddinomuruma mwanamukatti waga osogorho wawo* wi ausasanyedhe dila.) 3 Nihiweya lizu na muttu mwiddeddereni nalaleya dhahi: ‘Kasasanyedhani dila ya Yehova! Kogolelani diladhá.’” 4 Joau Batista wali mwiddeddereni alaleyaga obatizo ninga ezinddiyelo ya otxinuwa, wa oleveleliwana dhottega. 5 Attu otene a mirudda dha mu Judeya na otene akala mu Jeruzalemi andhowa vàliye. Awene ambatiziwa* na Joau Mmwinjeni Jordau vina ambweka dhoddawa dhawa. 6 Joau wàbala guwo yaluwiwe na moya wa kamelo vina wammaga muyununi sintu ya ttebe yovadda, vina iyene waja mabalaga na wiyi wa mukokolani. 7 Iyene wanlaleya dhahi: “Mundduni mwaga munodha muttu onna guru opitta miyo, miyo kaddinfwanyela nne omurula sandáliya dhaye. 8 Miyo ddinubatizani na manje, mbwenyi iyene onaubatizeni na muya wokoddela.”
9 Masiku abale, Yezu ovenya o Nazareti elabo y’o Galileya odhowa obatiziwa na Joau mmwinjeni Jordau. 10 Momaguva-mwene abudduwaga mmanjeni, ohona erimu efuguwaga vina muya wa Mulugu omutitelaga n’ekalelo ya kangayiwa. 11 Novenya, nihiweya lizu nadha wirimu naloga: “Weyo oli Mwanaga, wokweleya, vina onimurumelimi.”
12 Mohigonela, muya wa Mulugu omuttukulela mwiddeddereni. 13 Okala mwiddeddereni malabo 40, venevo Satana omweha. Iyene wakala na dhinama dha mwini vina anju animwimelela.
14 Mmalele Joau ofugeliwa, Yezu odhowa o Galileya alaleyaga miselu dhapama dha Mulugu 15 alogaga: “Nifiya nsaka napimeleliwe, Omwene wa Mulugu oli vakuvi, rugunutxaní murima vina roromelaní miselu dhapama.”
16 Eddaga nikome na nyaza y’o Galileya, iyene omona Simoni na André mbale Simoni atuputxedhaga milaba dhawa munyaza, sabwani àli anamattadda. 17 Venevo, Yezu ohawaddela: “Kaddifwareni, miyo ddinouwirani anamattadda a attu.” 18 Mudhidhene obo, awene attiya milaba dhawa, ahinfwara. 19 Adhowagavi, omona Tiago mwana Zebedeu na mbalaye Joau àli mmwanddiyani asasanyedhaga milaba dhawa. 20 Mohigonela ohakuwela. Awene amuttiya babiwa Zebedeu mmwanddiyani na anamalaba, ahinfwara. 21 Adhowa o Kafarnau.
Mfiyedhe siku na Sabuddu, iyene odhowa musinagoga oroma osunziha. 22 Vina awene atikina na masunziho aye vowi iyene wasunziha ninga muttu wavahiwe owodha, ottiya ninga mwakosela anamasunziha magano awa. 23 Mudhidhene obule musinagogamwá,* mwahikala mulobwana wavolowiwe muya wabure, venevo ohikuwa: 24 “Yezu Munazareti, onfuna nni na iyo? Odhele onitolotxa? Miyo txibarene ddinouziwa weyo, oli Mukoddeli wa Mulugu!” 25 Yezu osaddeya muyayá, eraga: “Kamaala, omuttiye muttu oddo!” 26 Muya obo wabure, omugwihedha mulobwana oddo vati ofiyedha obuluguwaga venjene, mmaleliye okuwa mpaka vangomela lizu naye, omuttiya. 27 Àli venevo atikina, alogaga oka-oka: “Ejiya txini? Masunziho maswa! Iyene onolamula muya dhabure, muyadhá badhimwiwelela.” 28 Dhahene dhowira dhaye dhihivuwa momaguva dhipaddi dhotedhene ofiyedha mirudda dhotene dh’o Galileya.
29 Mmalelani obudduwa musinagoga àdhowa vamodha na Tiago na Joau, vatakulu va Simoni na André. 30 Nyezeli wa Simoni wali vakamani wanna febiri, momaguva-mwene amwaddela Yezu. 31 Iyene odhowa vàliye, omuttidda nlada, ohinvenyiha. Febriyá evira, iyene oroma wapiyela.
32 Vati varibaga, nzuwa banimalile oddowela attukuleliwa vàliye aredda otene na attu ena avolowiwe muya dhabure; 33 vina attu otene a musidadimwa atugumana vamusuwo. 34 Dhahene iyene ohavulumutxa enjene atabuwa na viredda dhottiyana-ttiyana vina ottamagiha muya dhinjene dhabure, vano kattiya muyadhá ologa, vowi dhanziwa wi iyene wali Kristu.*
35 Na membesene vati vahinayetxa, iyene odhowa vaye-vene, venevo oroma olobela. 36 N’eji Simoni na ena áli na iyene, adhowa omutamela, 37 munfwanyelani amwaddela: “Otene anoutamelani.” 38 Iyene ohawakula: “Ndhoweni mburo mwina, sidadi dhowaddamela wi ddalaleye wenewo, sabwani jijene edhelemi.” 39 Iyene ohedda elabo yotene y’o Galileya alaleyaga mmasinagoga mwawa vina attamagihaga muya dhabure.
40 Muttu dhahi wanna maranya ofiya vàliye, amuttiddaga myeddo wokokorene, ohiloga dhahi: “Mugafuna kaddivulumutxeni.” 41 Venevo iyene omweddela ttagaraga, otapula nlada naye, omuddiginya, vina omwaddela: “Miyo ddinofuna! Kavulumuwa.” 42 Mudhidhene obo maranyayá amuttiya, iyene ohivulumuwa. 43 Venevo Yezu omuruma odhowa, 44 amwaddelaga dhahi: “Kumwaddele muttu elobo, mbwenyi kadhowa wavyonihe wa namakutta vina waperheke mukutto ninga munrumela Nlamulo na Mizé wi awene aziwe ovulumutxiwa wawo.” 45 Vano mulobwana ole mmaleliye osusavo vang’onovi, oroma olaleya avuwihaga dhotene dhipadduwile. Nona Yezu kawodha ovolowa musidadi oniwaga; mbwenyi wakala otakulu mimburo dhahakaliwa. Masiki dhawenevi attu a dhipaddi dhotene andha vàliye.