Dhilebiwe na Marko
14 Ahalagawo masiku meli wila ajiwe Paskwa na Mattanga a Pawu Dhotowa Emela, anddimuwa a anamakutta na anamasunziha magano, antamela muladdu womuttiddana n’oswaga,* wila ampe. 2 Vowi anloga oka-oka: “Nihimuttidde mudhidhi wa mattanga ninodha otatamula mbigiddi wa nlogo.”
3 Yezu bali o Betánia, ajaga* vatakulu va Simoni ole wanna maranya, ofiya vàliye muyana wanna garafwa na makura a nardu onukela ahataganyihiwe na elo, a muttengo munddimuwa. Iyene ofugula garafwana mwali makurayá, oroma okuttulela mmusorhoni mwa Yezu. 4 Ena onile anloga muttu na mukwaye: “Makura aba onukela anongeliwe nni ebewene? 5 Makura aba onukela agahigulihiwa okwaranya adenáriyu* 300, wi kobiridhá dhivahiwe ayelegi!” Awene ahinyonyeya venjene na muyana ole.* 6 Yezu ohiloga: “Kamuttiyeni muyana oddu. Munimunyonyela nni? Eddikoseliye japama. 7 Sabwani ayelegi ankalavi na nyuwo mudhidhi wotene, mugafuna munowakosela dhapama, mbwenyi na miyo kamunakalevi mudhidhi wotene. 8 Iyene okosa ewodhiliye, muyana oddu obaza okuttulela makura onukela maningo aga, okoseli osasanyedha wekiwa waga. 9 Ddinouwaddelani ebaribari, mwilaboni mwetemwene munalaleyiwe miselu dhapama, munele olaleyiwa vina dhiddireli muyana oddu, wi obuweliwege.”
10 Juda Iskariote mmodhavo wa Kumi na Eli, odhowa wa anddimuwa a anamakutta wi amperheke mmadani mwawa. 11 Mwiwalani eso, aziveliwa vina alaganela omvaha kobiri dha parata. N’eji Judayá oroma otamela marhe a omperheka mmadani mwawa.
12 Siku noroma na Mattanga a Pawu Dhotowa Emela, naperhekiwa mukutto wa Paskwa, anamasunza a Yezu ahinvuza: “Munfuna nasasanyedhe wuvi mattanga a Paskwa?” 13 Venevo Yezu oharuma anamasunza aye eli, ohawaddela: “Mudhowe musidadi, munogumanana mulobwana opwattelile mukatte wa manje. Mumfware, 14 nyumba enavolowiye, mmwaddele mwinyayá dhahi, ‘Namasunziha ologile: “Mburo wa aleddo oli wuvi wi miyo ddijewo mattanga a Paskwa vamodha na anamasunza aga?”’ 15 Iyene onele outonyihedhani sala enddimuwa eli odhulu, muli mobiliya vina eli yomala-nawale. Musasanyedhe wenewo.” 16 N’eji anamasunzayá adhowa, afiya musidadi, afwanya dhotedhene ninga mwalogeliye, venevo asasanyedha mattangayá a Paskwa.
17 Muribele vati iyene ofiyawo vamodha na anamafwara aye Kumi na Eli. 18 Mudhidhi wagilatilani vameza ajaga, Yezu ohiloga: “Ddinouwaddelani ebaribari: Mmodhavo mwa nyuwo onja na miyo onele oddiguliha.” 19 Awene aroma okubanya vina muttu-muttu wanninvuza: “Txino ddi miyo?” 20 Yezu ohawakula: “Ddi mmodha wa Kumi na Eli, ole oneka nlada naye mutijelani vamodha na miyo. 21 Sabwani Mwana-muttu onodhowa, dhahene ninga mulebeliwani mwaha waye. Vano ntowa nimugwele ole onimuguliha Mwana-muttu! Mwa iyene egamukalela kohibaliwa.”
22 Awene ajagavi, iyene ottukula pawu, olobelela, omenya vina ohavaha anamasunza aye, alogaga: “Kattukulani. Eji enzinddiyeliha maningo aga.” 23 Mmaleliye, ottukula kalisi mwali vinyu, olobelela vina ohavaha anamasunza aye, otene amwa. 24 Vina ohawaddela: “Eji enzinddiyeliha ‘nikami naga na nipagano,’ ninfuna okuttuliwa wi napurihe attu enjene. 25 Ddinouwaddelani ebaribari, kaddinamwe vina vinyu eji, mpaka siku ninamwemi vinyu eswa Mumweneni mwa Mulugu.” 26 Mmalelani wiba jibo* dhomutamalelana Mulugu, awene adhowa Omwangoni wa Olivera.
27 Vina Yezu ohawaddela: “Nyuwo motene munele okwakwattuwa vowi elebiwa: ‘Ddinele onvoreya mukumbuzi, mabilayá abalaleye.’ 28 Mbwenyi ddigamala ovenyihiwa mukwani, ddinele ousogorhelani ddidhowaga o Galileya.” 29 Vano Pedro omwaddela: “Masiki otene akwakwattuwe, miyo kaddinakwakwattuwe.” 30 N’eji Yezu omwakula: “Ddinouwaddela ebaribari wi ddabuno, mattiyabano, mutubi ohinonla dila bili weyo onele oddikodda dila ttaru.” 31 Vano iyene odidelavi: “Masiki efuneye miyo okwa na nyuwo, txipo kaddinauttiyeni.” Ena otene aroma ologa yakakene.
32 Afiya mburo wakuweliwa Jetsemani vina Yezu ohawaddela anamasunza aye dhahi: “Kagilatini veneva oku miyo ddilobelaga.” 33 Omuttukula Pedro, Tiago na Joau, oroma oribiwa murima, vina okubanya venjene. 34 Iyene ohawaddela: “Ddiribiwa murima vaddiddi, ddihalile vang’onovi wi ddikwe. Mukale veneva vina mukale txenjewa.” 35 Mususeliyevo vang’onovi, okokora vina oroma olobela wi egawodheya, mudhidhi obule ohimwaddamele. 36 Iyene ohiloga: “Aba,* Babani, dhotedhene nyuwo munowodha, ddirabelihení kalisi eji. Mbwenyi kikoseye ninga munfunela miyo, mbwenyi ninga munfunela nyuwo.” 37 Iyene ohiyelela vàlani, wafwanyile agonaga, venevo ohiloga na Pedro: “Simoni, onogona? Kuwodhile okala mento, ngafuna-wene wora modha? 38 Mukale txenjewa vina mudidele olobela, wila munagwele munyengetteyani. Txibarene, muya onofuna, vano maningo bawobana.” 39 Iyene osusavo dila yanawili, olobela alogaga yakakene. 40 Mwiyeleliye wili, wafwanyile agonaga, sabwani mento annalemela, nona kaana yomwakula. 41 Ohiyela dila yanoraru vina ohiloga: “Mudhidhi ninga obu, nyuwo munogona vina munovuma! Bahi! Ofiya mudhidhi! Mwana-muttu onele operhekiwa mmadani mwa attegi. 42 Kavenyani, ndhoweni. Mmone! Ole onddiguliha onofiya.”
43 Mudhidhene obule, iyene alogagavi, ofiya Juda, mmodha wa Kumi na Eli, vamodha na muttitti wa attu, wanna masupadda vina miri. Awene arumiwe na anddimuwa a anamakutta, anamasunziha magano vina na anddimuwa a nlogo. 44 Namagulihayá wahavaha ezinddiyelo, alogaga: “Ole onamvahe miyo beju, ddudduwene, mummage vina mmuttukule mudhowena mmwang’anelaga.” 45 Venevo Juda osusavo vàliye, mmwaddameleliye ohiloga dhahi: “Rabi!”* vina ohinvaha beju. 46 Awene amuttidda Yezu vina ahimmaga. 47 Venevo muttu mmodha walivo, ovula supadda naye, ogwadda niyaru na mudhari wa namakutta munddimuwa. 48 Mudhidhene obule, Yezu ohiloga na muttitti: “Nyuwo mudha na masupadda vina miri wi muddimage ninga dda mbava? 49 Masiku otene miyo ddakala na nyuwo mumparhani ddisunzihaga, nyuwo kamuddimagile, vano dhotedhene esi dhipadduwele wi dhakwanihedheye Dhilebiwe.”
50 Anamasunza aye otene amuttiya vina attawa. 51 Venevo muzombwe dhahi wabalile bahi malaya a linyu yokoddela oroma wafwara, awene afuna amuttidde, 52 mbwenyi iyene ottiya malayayá abaliliye ottawa yovi.*
53 Yezu ottukuleliwa wa namakutta munddimuwa; wenewo wagumanile anddimuwa a anamakutta, anddimuwa a nlogo vamodha na anamasunziha magano. 54 Vano, Pedro wanninfwara wolapela-wene mpaka vatakulu va namakutta munddimuwa; mfiyedhiye, ogilati vamodha na anamalabayá vina baroma wotta motto. 55 Anddimuwa a anamakutta na Sinedriyu* yotene, antamela yommagedhana Yezu wi anfwanyena muladdu wompihana, mbwenyi kanfwanyilena nne muladdu mmodha. 56 Mwebaribari enjene anvaha onamoona wottambi, mbwenyi onamoona wawa kuwewanana. 57 Vina ena àlivo anvaha onamoona wottambi, alogaga: 58 “Iyo nimwiwa alogaga, ‘Ddinele ogujula mparha obu omagiwe n’attu, mwari mwa malabo mararu ddimetxe mwina ohimagiwe n’attu.’” 59 Masiki dhahenevi onamoona wawa kuwewananavi.
60 Namakutta munddimuwa ovenya ohimela vari vawa vina ohinvuza Yezu alogaga: “Kunna-wene yologa? Kuloga kuniwa esi dhinumagedhana attu aba?” 61 Mbwenyi iyene wali womalene ahakulaga elo. Venevo namakutta munddimuwa ohinvuza wili: “Txibarene weyo oli Kristu, Mwana Muttittimihiwi?” 62 Yezu ohakula: “Ddili, vina munele omona Mwana-muttu bagilatile omononi woja wa Mulugu wowodha-wodha vina adhaga mmiraboni dha wirimu.” 63 Nowidhawo namakutta munddimuwa otaya dhabalo dhaye, vina ohiloga: “Ninafunela nni anamoona ena? 64 Nyuwo muhiwa dhonyimula dhilogiliye. Munonamo dhavi?” Otene ahigana wi Yezu apiwe. 65 Ena aroma omuturela mara, omukunela omentoni, vina annimbubudda alogaga: “Kavuhulela!” Ang’aneli otribunali mmalelani onvada, amuttukulavo.
66 Vano Pedro bali mutxiddo, mukintalo, ofiyavo vàliye mudhari wa muyana wa namakutta munddimuwa. 67 Mmoneliye Pedro ottaga, omwang’ana vaddiddi vina ohiloga: “Weyo vina wali vamodha na Yezu, Munazareti.” 68 Mbwenyi Pedro okodda alogaga: “Miyo kaddinimuziwa nne kaddinnonelamo enlogiwe,” mmaleliye obudduwavo, odhowa vamusuwo wa kintalo. 69 Mudhari ole wamuyana omona venevo vina oroma ologa dila yanawili na otene àlivo: “Oddu ddi mmodha wawa.” 70 Iyene okodda dila yina. Vina mvirele mudhidhi mung’onovi, àlivo ahiloga dhahi na Pedro: “Txibarene weyo oli mmodhavo wawa, vowi, oli w’o Galileya.” 71 Venevo iyene oroma ovigwihedha ntowa, addubelaga: “Mulobwana oddo onimuloginyu miyo kaddinimuziwa!” 72 Momaguva mutubi ohunla dila yanawili, n’eji Pedro ohubuwela mazu amwaddele Yezu awi: “Mutubi ohinonla dila yanawili, weyo onele oddikodda dila ttaru.” Venevo iyene obudduwavo, odhowa wunla na okubanya onddimuwa.