Merelo a Arumiwi
11 Arumiwi na abali ena àli o Judeya, ahiwa wi attu ahali Ayuda arumela vina nzu na Mulugu. 2 Dhahene mufiyedhe Pedro o Jeruzalemi, abale eddana yeddelo yotxetteliwa aroma opambihana na iyene,* 3 alogaga: “Ovolowa mba mwa attu ohitxetteliwa vina oja na awene.” 4 Venevo, Pedro oroma watapulelamo dhotedhene dhapadduwile, alogaga:
5 “Miyo ddali mu sidadi y’o Jope ddilobelaga, venevo ddihikala ninga ddinoroha, murohanimwá ddihona elobo yaligana na lensori ninddimuwa na linyu, nititaga wirimu, ttittiddeliwe dhipaddi dhonayi vina nihifiya vàlimi. 6 Ddifwaseyela wang’ana mwarimwa vina ddihona dhinama dha myeddo minayi dha velaboni ya vati, dhinama dha mwini, dhonyongottowa na balame dha wirimu. 7 Ddihiwa vina lizu naddaddela dhahi: ‘Pedro, kavenya, ope vina oje!’ 8 Mbwenyi miyo ddihakula dhahi: ‘Nabuya, kaddinaje nne vang’onovi, sabwani kaddinekaga mwano mwaga dhilobo dhokwaruliha, dhinkoddihiwa mmalamuloni.’ 9 Lizuna nadha wirimu nihiloga dila yanawili: ‘Kukuwele dhokwaruliha esile dhimalile okoddelihiwa na Mulugu.’ 10 Ejoyá epadduwa dila yanoraru vina dhotedhene dhittukuleliwa wirimu. 11 Ottiya ejo, mudhidhene obule alobwana araru arumiwe o Sezareya wi additamele, afiya vatakulu vàlihu. 12 Venevo, muya wokoddela oddaddela wi ddihikodde odhowa na awene. Abali aba atanu na mmodha adhowa na miyo vina nihivolowa vatakulu va mulobwanayá.
13 “Iyene ohinaddela wi wahimona anju wadhile vatakulu vaye, baloga dhahi: ‘Kàrume attu adhowe o Jope amukuwele Simoni onziwiwa na nzina na Pedro, 14 vina Pedro oddo onele ouwaddelani dhilobo dhotedhene dhinfwanyelela nyuwo na attu otene a vatakulu venyu okosa wila muvuneye.’ 15 Muromelimi ologa, muya wokoddela ohatitela awene dhahene ninga mwanititelani voroma-vene. 16 N’eji ddihubuwela mazu a Nabuya, iyene wanloga: ‘Joau wabatiza na manje, mbwenyi nyuwo munele obatiziwa na muya wokoddela.’ 17 Nona, akala Mulugu ohavaha awene mvaho* wakakene onivahiliye, onimurumela Yezu Kristu, miyo ddali ani wi ddimukoddihe* Mulugu wira ofuna waye?
18 Mwiwalani esodhá, attiya ompambiha,* vina amuttittimiha Mulugu, alogaga: “Ovano Mulugu ohavaha attu a malogo otxinuwa onafwanyiha egumi.”
19 Abale abalaletxiwe sabwa ya ofwara-fwariwa weteyile mwaha wa Estevau, afiya o Fenísia, o Xipre na o Antiokiya mbwenyi àlaleyela miselu dhapama Ayuda bahi. 20 Vano, alobwana ena mwa awene àli akadda Xipre na Sirene adhowa o Antiokiya baroma ologa na attu aloga elogelo ya Egregu, alaleyaga miselu dhapama dha Nabuya Yezu. 21 Nlada na Yehova nàli na awene, enjene anrumela vina anninfwara Nabuya.
22 Mulogo wali o Jeruzalemi ohiwa miselu mwaha wawa, venevo ahimuruma Barnabé o Antiokiya. 23 Mfiyedhe Barnabé, ona mahala a Mulugu, ohagalala vina oroma walibiha otene wi amuroromele Nabuya na murima wotene. 24 Barnabé oddo wali muttu wapama, wodhala muya wokoddela vina wa nroromelo. Muttitti mwinjene wa attu odha omuroromela Nabuya. 25 Dhahene Barnabé odhowa o Tarsu omutamela Saulo. 26 Munfwanyeliye, adhowa vamodha o Antiokiya. Awene atugumana na mulogo mwari mwa yaka modha vina ahasunziha attu enjene. O Antiokiya oko kuromile anamasunza okuweliwa Akristu na nikamihedho na Mulugu.
27 Masiku abale anamavuhulela ena avenya o Jeruzalemi, atitela o Antiokiya. 28 Mmodhayavó wakuweliwa Ágabu, na nikamihedho na muya wokoddela ohiloga wi mwilaboni mwetemwene mugahikala dala enddimuwa. Txibarene dalayá ejo epadduwile nsaka na Kláudio. 29 Anamasunzayá alaganela wakamihedha abali akala o Judeya, muttu-muttu avahaga bari ejile yawodhiye. 30 Awene akosa ejoyá vina amuruma Barnabé na Saulo wi adhowe àperhekele anddimuwa a mmulogoni.