Merelo a Arumiwi
14 O Ikónio Paulo na Barnabé avolowa mu sinagoga* ya Ayuda vina ohiloga pama ofiyedha muttitti munddimuwa wa Ayuda na wa Agregu orumela. 2 Vano Ayuda ena aharumelile, ahatujela abale ahali Ayuda baroma wawidda abali. 3 Mbwenyi Paulo na Barnabé akala sumana dhinjidhene mburo obule na owodha wa Yehova alaleyaga miselu na mahala a Mulugu ahovaga elo; awene ankosa vizinddiyelo na matikiniho awumiha milomo. 4 Vano, muttitti wa musidadi wahigaweya; ena àli mpaddi wa Ayuda ena ali mpaddi wa arumiwi. 5 Venevo attu ahali Ayuda vamodha na Ayuda vina alamuleli awa, agana watabutxa vina waponyedha malugu, 6 mwaddeliwani eso, attawela o Listra na o Derbe sidadi dha Likaónia na mirudda dhina dhowaddamela. 7 Wenewo anlaleyavi miselu dhapama.
8 O Listra wahikalawo mulobwana dhahi woragala myeddo, iyene wabaliwe woragalene, mbaleliwiye keddile. Iyene wali wogilatene, 9 avuruwanaga dhaloga Paulo. Venevo Paulo omwang’ana ddo-ddo-ddo, vina onaga wi okaana nroromelo novulumuwana 10 ohiloga na lizu noliba: “Kavenya, kemela.” Venevo mulobwanayá olupa vina oroma wedda. 11 Muttitti wa attu monelani yakosile Paulo akuwa na elogelo ya Likaónika: “Amulugu avikosiha attu vina anititela.” 12 Awene aroma omukuwela Barnabé na nzina na Zeus, Paulo amukuwela na nzina na Hermes, vowi ddi iyene walogetxa. 13 Mparha wa mulugu Zeus waddamelile musuwo wa sidadiyá, vina namakutta wa mulugu Zeus odhana vamusuwo va sidadiyá ng’ombe na kara* dha folori; namakutta ole vamodha na muttitti wa attu afuna amperhekele mukutto Paulo na Barnabé.
14 Vano, arumiwi Barnabé na Paulo muziwelani eso, ataya dhabalo dhawa, attamagela vari va muttitti vina akuwa: 15 “Alobwanani, munkoselani esidhá? Iyo vina nili attu ninotabuwa na dhowobana dhakakene dhinna nyuwo. Ninulaleyelani miselu dhapama wi muttiye dhilobo eso dhohikana ttima, mmwebedhege Mulugu oliwo, opaddutxile erimu, elabo, bara na dhotedhene dhilimo. 16 Wale, Mulugu ohattiya attu a malogo otene wedda dila dhawa, 17 iyene ovaha onamoona na dhilobo dhapama dhikosiliye, ohurubwihedhani muzogwe vina okosiha wi mindda dhenyu dhibale milima dhinjidhene va nsakaniva, onouvahani dhoja ofiyedha nyuwo wakwanana oku azivelihaga mirima dhenyu.” 18 Masiki mulogelani mazu aba, awene ahirutxiwa vaddiddi wattiyiha attu abale waperhekela mukutto.
19 Venevo afiya Ayuda o Antiyokiya na o Ikónio atujelile muttitti wa attu; mmalelani amponyedha malugu Paulo vina amburulela otakulu wa sidadi obuwelaga wi ohikwa. 20 Vano mfiyedhe anamasunza vàliye, Paulo ovenya, ovolowa musidadi. Mmangwananimwá avenya na Barnabé adhowa o Derbe. 21 Mmalelani olaleya miselu dhapama sidadi ejile vina wakosa anamafwara enjene ahiyelela o Listra o Ikónio vina o Antiokiya. 22 Wenewo ahalibiha anamafwara akokomezaga okanavi nroromelo alogaga: “Enofuneya ogumanana makattamiho menjene nihinatti ovolowa Mumweneni mwa Mulugu.” 23 Paulo na Barnabé, mulogo mmodha-mmodha wavirani, annattomamo alobwana ena ninga anddimuwa. Awene anlobela vina anttuga ngamala animperhekela Yehova sabwani awene annimuroromela.
24 Vasogorhova avira o Pizídia afiya o Panfília, 25 mmalelani olaleya nzu na Mulugu o Perge ahititela o Atália. 26 Wenewo awela mmwanddiyani adhowa o Antiokiya, ji sidadi ejene wamukumbirile abali Mulugu wi amururihe Paulo na Barnabé wila akose mabasa aba amalilani wakwaniha.
27 Mfiyedhani vina atugumaniha mulogo ahawaddela dhilobo dhinjene dhakosile Mulugu na mada awa, vina ahawaddela wila Mulugu ohafugulela attu a malogo meena dila* ya nroromelo. 28 Dhahene avira mudhidhi mwinjene na anamasunzayá.