Dhilebiwe na Luka
8 Mvirele mudhidhi mung’onovi iyene oroma weddela sidadi na sidadi, murudda na murudda, alaleyaga vina avuwihaga miselu dhapama dha Omwene wa Mulugu. Arumiwi Kumi na Eli àli na iyene, 2 vamodha na ayana ena aburutxiwe muya dhabure vina avulumutxiwe viredda dhawa: Maria wakuweliwa Madalena, oburutxiwe muya dhabure mitanu na minli. 3 Joana mwadhi Kuza, wemelela ntakulu na Herodi, Suzana na ayana ena enjene amukamihedha Yezu vamodha na anamafwara aye, na dhokàna dhawa.
4 Vagumanile muttitti mwinjene wa abale adha sidadi dhottiyana-ttiyana wi agumane na iyene, Yezu oroma ologa na yoladdaniha: 5 “Namalima dhahi, ovenya odhowa owaza beu yaye. Awazagavi, beu dhina dhimottela nikome na dila, dhinyigaliwa vina balame dhodhulu dhidha, dhija. 6 Dhina dhimottela vamaluguni, mmalelani omela, dhihuma sabwani kavali munyetto. 7 Dhina dhimottela vamingani, munuwelani vamodha mingadhá dhihoga. 8 Mbwenyi dhina dhimottela vamattakani apama, mmalelani dhibala milima opitta dila 100.” Mmaleliye wawaddela esi, ohiloga na lizu noliba eraga: “Onna maru owiwana, ewe.”
9 Venevo anamasunza aye anvuza yatapulela yoladdaniha eji. 10 Iyene ohiloga: “Nyuwo muvahiwa ononelamo wa dhoviteya dha Mulugu mwaha wa Omwene wa Mulugu, mbwenyi mwa enjiyá, dhotedhene anaddeliwa na dholaddaniha, wila ang’ane mbwenyi ahone elo, ewe mbwenyi ahinonelemo. 11 Yoladdanihayá entapulela eji: Beu tti nzu na Mulugu. 12 Beu emottele nikome na dila enatonya abale ewale, ngamala Ddiabo badha oburutxamo nzuna mmurimani mwawa wi ahirumele, adhé ovuneya. 13 Beu emottele vamaluguni enatonya abale aniwa nzu na Mulugu arumela n’oziveliwa, vano kanna mitxitxi. Anrumela nsaka ning’onovi mbwenyi nigafiya nsaka n’ofwara-fwariwa anokwakwattuwa. 14 Beu emottele vamingani, enatonya abale ewale nzu, mbwenyi sabwa ya omageya na dhozuzumiha ninga dhorela na dhoziva dha mwilaboni mpuno, anohogeya ofiyedha ohibala milima dhowittwa. 15 Beu emottele vamattakani apama, enatonya abale ani, agamala wiwa nzu na Mulugu na murima webaribari vina wapama anokoya vina anobala milima na ovilela.
16 “Kawo onttiddiha panti bakunela na yobo obe attiya mutxiddo mwa kama, ottiya ejo onttiya vadhulu wi otene anvolowa one txeza. 17 Vowi kayiwo elobo evitiwe ehinoneye, vina kayiwo elobo evitiwe pama ehinadhe oziweya, vina ehinoniwe. 18 Nona mufwaseyele ovuruwana dhiniwenyu, vowi ole onna onovahiwavi, vano ole ohinna ejile enubuweliye wi okaana onele wakiwa.”
19 Maye na abalaye afiya, mbwenyi kawodhile omwaddamela sabwa ya muttitti. 20 Venevo Yezu ohaddeliwa: “Mamayenyu na abalinyu ali oko otakulu, anfuna auwoneni.” 21 Yezu ohawakula: “Mamayaga na abalaga babale aniwa nzu na Mulugu vina anvirihamo.”
22 Siku dhahi iyene vamodha na anamasunza aye awela mmwanddiyani, Yezu ohawaddela dhahi: “Ndhoweni nabuwele kobela yina ya nyaza.” Venevo adhowa. 23 Vano abuwaga iyene oroma ogona, venevo munyazamwa mutatamuwa pevo enddimuwa, mmwanddiyani muroma ovolowa manje bukala nena n’obwina. 24 Dhahene awene ahinvenyiha alogaga: “Namasunziha, Namasunziha, ninfuna okwa!” Iyene ovenya, onyanyuwela pevo na manebeya, dhotedhene dhimaala noo. 25 Venevo iyene ahavuza: “Nroromelo nenyu nili wuvi?” Mbwenyi awene ahova, atikina vina anloga oka-oka: “Mulobwanayá oddu bani? Vowi agalamula pevo na manje, dhinomwiwelela.”
26 Ahabuwela okobela, murudda wa Ageraseno, epaddi yina y’o Galileya. 27 Yezu mutiteliye mmwanddiyani mulobwana dhahi wa musidadimwa wavolowiwe muya dhabure, omuttamagela. Mwa mudhidhi mwinjene iyene kàbala guwo nne kakala vatakulu, mbwenyi wakala mmasiye. 28 Mulobwana ole mmoneliye Yezu, okokora osogorho waye vina okuwa na lizu noliba: “Onfuna nni na miyo, Yezu Mwana Mulugu Namadhulu-dhulu? Miyo ddinouttidda myeddo, kudditabutxe.” 29 (Yezu walamula wi muya obule wabure omuttiye mulobwanayá. Muyayá wavolowa mwa mulobwana ole dila dhinjene,* iyene wammagiwa na kurenti mada na manyalo dila dhowinjiva, vina wannang’aneliwa, mbwenyi wanttumula kurentidhá vina muyayá wannimuttukulela mimburo dhohikaliwa.) 30 Yezu onvuza: “Nzina nawo olani?” Iyene ohakula: “Ddili Muttitti,” vowi wavolowiwa adomonyo enjene. 31 Muya esile dhabure dhannimukumbirha Yezu wi ahaponyedhe muvayani. 32 Mburo obule wahikala guluwe dhinjidhene dhasapa vamwangoni, venevo dhimuttidda myeddo wi àttiye ovolowa muguluwenimwa, iyene orumeliha. 33 Muya esile dhibudduwa mwa mulobwanayá dhihivolowa muguluweni, guluwedhá dhittamagela munyaza, dhikwela mwenemo. 34 Mbwenyi abale asapiha guluwedhá monelani dhipadduwile, attawa vina adhowa alaleya musidadi na mmuruddani dhapadduwile.
35 Mmalelani attu abudduwa adhowa wona dhapadduwile. Mmwaddamelani Yezu, anfwanyile mulobwanayá waburutxiwe adomonyo babalile guwo, bali waderetu-wene vina bagilatile waddamana na Yezu, venevo attiddiwa wova. 36 Abale onile esodhá, ahawaddela, mvulumutxeliwo wa mulobwana oddule wavolowiwe muya dhabure. 37 Attu enjene a mirudda dho Geraseno na dhowaddamela amukumbirha Yezu wi abudduwemo mmuruddanimwa vowi attiddiwa wova onddimuwa, venevo iyene owela mmwanddiyani wi adhowe. 38 Vano mulobwana ole waburutxiwe muya dhabure wanimukumbirha Yezu wi akalevi na iyene, mbwenyi Yezu omuruma odhowa amwaddelaga: 39 “Keyelela vatakulu, waloge dhotene dhukosele Mulugu.” Iyene odhowa alaleyaga sidadi dhotene esile dhakoseliwiye na Yezu.
40 Mwiyeleli Yezu, ohakeliwa pama na muttitti wa attu vowi otene el’omujedha. 41 Venevo ottanyuwavo mulobwana dhahi wakuweliwa Jairo, mulobwanayá oddu wali munddimuwa wa sinagoga.* Iyene okokora osogorho wa Yezu vina oroma omukumbirha wi adhowe vatakulu vaye, 42 vowi mwanaye wa nammodha wa mwana-muyana wanna vyaka 12 dhobaliwa wali nena n’okwa.
Yezu adhowaga, muttitti walivo waninfinya. 43 Wakalavo muyana watabuwa na eredda y’obudduwa nikami mwari mwa vyaka 12, vina kawo wawodha onvulumutxa. 44 Iyene omususela Yezu mundduni, oddiginya yabalo yaye vina momaguva-mwene nikamina n’abudduwa nihimala. 45 Venevo Yezu ohivuza: “Oddiddiginyile bani?” Vowi otene ela okodda, Pedro ohiloga: “Namasunziha, muttitti ohuzugunuwani vina onoufinyani.” 46 Vano Yezu ohiloga: “Okalawo oddiddiginyile, vowi ddihona guru ebudduwile mwa miyo.” 47 Muyanayá moneliye wi wahizinddiyeliwa, omususela Yezu agurumelaga vina okokora osogorho waye, ohiloga vamentoni va otene emuttukuleli omuttidda Yezu vina mvulumutxeliwo waye momaguva. 48 Vano iyene omwaddela muyanayá: “Mwanaga, nroromelo nawo niuvulumutxa. Kadhowa na murenddele.”
49 Iyeneyá alogagavi ofiya mwimeleli wa munddimuwa wa musinagoga, ohiloga: “Mwanenyu okwa. Munimunyonyela nni Namasunziha.” 50 Yezu ewaga esodhá, omwaddela: “Kuwove, okane nroromele bahi vina iyene onele ovuneya.” 51 Mfiyedhiye vatakulu, kamuttiyile muttu mwina ovolowa na iyene mba, ahili Pedro, Joau, Tiago vina babi na mayi wa mwanayá. 52 Vano otene anunla na okubanya onddimuwa* nona iyene ohiloga: “Kamunle, vowi iyeneyá kakwile, onogona bahi.” 53 N’eji aroma omuteya ampwazaga, sabwani ahiziwa wi mwanayá wahikwa. 54 Iyene omuttidda nlada ohiloga dhahi: “Mwana-muyana wé, kavenya!” 55 Momaguva-mwene mwanayá ohiyelela okalawo, Yezu oruma wi avahiwe yoja. 56 Babi na mayi wa mwanayá aziveliwa vaddiddi, mbwenyi Yezu ohawaddela wi ahimpange muttu dhipadduwile.