Dhilebiwe na Luka
9 Iyene ohatugumaniha arumiwi aye 12, ohavaha guru na owodha wa ottamagiha muya dhabure vina na owodha w’ovulumutxana viredda. 2 Oharuma olaleya Omwene wa Mulugu vina ovulumutxa. 3 Vina iyene ohawaddela: “Muleddoni mwenyu, kamuttukule nne mukongozo, nne buddu noja, nne pawu, nne kobiri,* nne guwo dhina.* 4 Nyumba ji nyumba enfiyenyu, mukale venevo ofiyedha obudduwavo. 5 Vano muttu ddi muttu ohinauwakeleni, mugabudduwagamo musidadimwá, mugume mbwebwe wa mmanyaloni mwenyu wi ekale ezinddiyelo ya okodda wawa.” 6 Awene avenya adhowa mirudda dha elaboyá alaleyaga miselu dhapama vina àvulumutxaga aredda.
7 Herodi* governador wa distritu ohiwa dhilogiwaga dhotene dhipadduwile, vina otikina venjene vowi ena anloga wi Joau ovenyihiwa mukwani, 8 ena aloga wi ddi Eliya odhile, oku ena aloga wi namavuhulela mmodha wawale ovenyihiwe mukwani. 9 Herodi ohiloga: “Joau miyo ddimugwaddiha nikotti. Kito eso dhiniwemi dhilogiwaga onkosa bani?” Venevo wantamela omona.
10 Arumiwi aye mwiyelelani amwaddela Yezu dhotedhene dhakosilani; mmalelani iyene ohattukula, odhowa sidadi enkuweliwa Betsaida wila akale vawa-vene. 11 Mbwenyi muttittiyá muziwelani ohinfwara. Yezu ohawakela pama, oroma wawaddela sabwa ya Omwene wa Mulugu vina ahavulumutxa areddda otene. 12 Muribele vati, arumiwi aye 12 amususela, amwaddela: “Kapaganyani muttitti, odhowe mmuruddani, mmawani mwawaddamela, atamele vego vosama vina yoja, vowi mburo obuno kunkaliwa.” 13 Vano Yezu ohawaddela: “Nyuwene mwavahe yoja,” awene amwakula: “Kanina elobwene dhihili pawu tanu na oba bili bahi, ngafuna iyo nidhowe nagule yoja navahe attu aba.” 14 Venevale àhikalavo alobwana awakwana 5.000. Vano Yezu ohapanga anamasunza aye: “Kawaddeleni agilati makuru a attu 50.” 15 Awene akosa dhawene, ahawaddela attu wi agilati. 16 Nowidhawo Yezu ottukula pawu eso tanu na oba bili, ohang’ana wirimu, olobelela. Vasogorhova omenya pawudhá, ohagawela anamasunza aye, anamasunzayá agawela muttitti. 17 Dhahene otene aja, ahakwanana, vina addoddela pedaso dha pawu dhahalile, badhakwanela middanga* 12.
18 Mudhidhi mwina alobelaga yekavo, anamasunza aye afiya vàliye, iyene ohavuza: “Muttitti wa attu onloga wi miyo ddili ani?” 19 Awene amwakula: “Joau Batista, mbwenyi ena anloga wi muli Eliya, vina ena anloga wi muli mmodha wa anamavuhulela awale ovenyihiwe mukwani.” 20 Venevo iyene ohavuza: “Kito nyuwo, munubuwela wi miyo ddili ani?” Pedro ohakula: “Kristu wa Mulugu.” 21 Mmaleliye ohiloga na awene àkokomezaga, ohawaddela wi ahimpange muttu, 22 vano ohawaddela: “Mwana-muttu onele otabuwa venjene, onele okoddiwa na anddimuwa a nlogo, na anddimuwa a anamakutta, na anamasunziha magano vina onele opiwa, vina siku nanoraru onele avenyihiwa mukwani.”
23 Yezu ohawaddela anamasunza aye otene dhahi: “Ole onfuna okala namafwara waga, avikodde mwinya, attukule pingirhizi yaye ya goyi* siku na siku vina addifwaregevi. 24 Vowi, ole onfuna ovuna egumi yaye, onele oyelela, vano ole onayelele egumi yaye mwaha waga, oddo onele ovuna. 25 Ngani, txini empura muttu agakana dhotedhene dha elabo ejino, vano ayelela egumi yaye obe avitolotxa mwinya? 26 Sabwani ole onddikanela miyo manyazo vina onkanela manyazo mazu aga, muttu oddo, Mwana-muttu vina onele omukanela manyazo, agadha munttittimihoni na Babe vamodha na anju okoddela. 27 Mbwenyi miyo ddinouwaddelani ebaribari, apa akalavo attu ahinafiyedhe okwa ahinatti wona Omwene wa Mulugu.”
28 Mvirele masiku matanu na mararu balogile mazu aba, Yezu omuttukula Pedro, Joau na Tiago awela vamwangoni wi alobele. 29 Iyene alobelaga okoveni waye osadduwa, dhabalo dhaye dhikala ninga txeza. 30 Vina afiyavo alobwana eli aloga na iyene, aboyá àli Mizé na Eliya. 31 Alobwana abo eli adha na nttittimiho; awene aroma ologa ovenyamo wa Yezu mwilaboni wafuna okoseya o Jeruzalemi. 32 Pedro na ena àli na iyene attiddiwa tturho vaddiddi, vano mvenyelani ahona nttittimiho naye vina na alobwana eli emelile vamodha na iyene. 33 Alobwana aba asusagavo, Pedro ohiloga na Yezu: “Namasunziha, japama iyo okala veneva. Ninele omaga misasa miraru, mmodha wenyu, mmodha wa Mizé, mwina wa Eliya.” Iyene kanonelamo dhalogiye. 34 Oku alogagavi, ohiteya murabo, muraboyá oroma wakunela. Mwakunelelani, awene attiddiwa wova. 35 Venevo mmurabonimwa muhiweya lizu naloga: “Oddu ddi Mwanaga, ole osakuliwe. Mumvuruwanege.” 36 Mmalele lizuna wiweya, Yezu ohala yeka. Vano masikwene abale, awene amalana dhonilani, kamwaddele muttu.
37 Mmangwananimwá mutitelani vamwangoni, ofwareliwa na muttitti mwinjene wa attu. 38 Mulobwana dhahi wali vari va muttittiyá, okuwa: “Namasunziha, ddinouttiddani myeddo kamwang’aneni mwanaga, vowi ddina odduwene mmodha bahi. 39 Okalawo muya wabure ondha bunvolowa, momaguva iyene onokuwa, muyayá ononvokela vati, ononpigiritxa ofiyedha oburutxa maporu mwano, muya obo kunimuttiya ohiromile omutabutxa vina onvoreya. 40 Ddihawunlela anamasunza enyu wila attamagihe muyayá, vano awene kawodhile.” 41 Yezu ohawakula dhahi: “Nyuwo nlogo* notowa nroromelo vina notakala murima, ddinakale na nyuwo vina ddinauvileleni mpaka mudhidhi gani? Muddidhelena okuno mwaninyuyá.” 42 Mwanayá amususelaga Yezu, muya obo wabure onvokela vati, ompigiritxa n’owali. Venevo Yezu osumulela muyayá vina ohinvulumutxa mwanayá, ohimperhekela babe. 43 Otene atikina na owodha onddimuwa wa Mulugu.
Oku atikinaga na dhotene dhakosiliye, Yezu ohawaddela anamasunza aye: 44 “Kavuruwanani n’ofwaseya vina muhidduwale mazu aba, Mwana-muttu onele operhekiwa mmadani mwa attu.” 45 Vano awene kanonelemo dhilogiliye. Txibarene, ahiviteliwa ononelemo dhilobo esi vina annova omvuza makani aba.
46 Venevo aroma opambihana mukalelani, amutamelaga bani wali munddimuwayavo. 47 Yezu aziwaga dhubuwelo dha mmurimani mwawa, omuttukula mwana omuttiya vakuvi na iyene, 48 vina ohawaddela: “Ole onimwakela mwana ninga oddu na nzina naga, onoddakela miyo vina; ole onddakela, onomwakela vina Ole oddirumile. Nona onvikosa mung’ono vari venyu, odduwene ddili munddimuwayá.”
49 Joau omwakula alogaga: “Namasunziha, nimona muttu attamagihaga muya dhabure na nzina nenyu, nitamela omukoddiha sabwani iyene kanedda na nyuwo ninga iyo.” 50 Vano Yezu ohiloga na iyene: “Kamutamele omukoddiha, vowi ole ohinusadduwelani oli na nyuwo.”
51 Naddamelaga* nsaka naye n’ottukuleliwa wirimu, kattiyile elobo ombarela odhowa o Jeruzalemi. 52 Iyene oharuma anamukatti osogorho waye, awene adhowa, afiya murudda wa akadda Samariya wi akose masasanyedho òmwakelana. 53 Vano akadda Samariyayá kamwakelile, vowi iyene wagana odhowa* o Jeruzalemi. 54 Anamasunza aye Tiago na Joau monelani esidhá, ahiloga: “Nabuya, munofuna iyo nikumbirhe motto otite wirimu watolotxe?” 55 Vano iyene ohazugunuwela, ohasaddeya. 56 Nomala adhowa murudda mwina.
57 Awene eddagavi, mmodhavo ohiloga: “Miyo ddinele oufwarani wego-wegovi ondhowa nyuwo.” 58 Vano Yezu omwakula: “Minyinga dhihikana gurugudha dhawa, balame dhodhulu dhikana vinddara dhawa, mbwenyi Mwana-muttu kanna mburo wogona.” 59 Venevo Yezu ohiloga na mwina: “Kakala namafwara waga.” Mulobwanayá ohakula: “Nabuya, karomani oddittiya ddidhowe ddamwinteri babaga.” 60 Venevo Yezu omwakula dhahi: “Wattiye amarafula enterigina amarafulavi, vano weyo odhowe walaleye Omwene wa Mulugu.” 61 Mwinayá ohiloga: “Ddinele oufwarani, Nabuya, mbwenyi karomani oddittiya ddidhowe ddapaganye amudhaga.” 62 Yezu ohawaddela: “Ole onimuttidda txaruwa ang’ana mundduni, kanfwanyela Omwene wa Mulugu.”