Dhilebiwe na Luka
10 Mmalelani Nabuya ohattoma ena 70 vina oharuma osogorho waye, eli-eli, sidadi dhotene na mimburo dhotedhene dháfuna iyene odhowawo. 2 Iyene ohawaddela dhahi: “Txibarene, mabasa osinanga ahinjiva, anamalabayá bayevile. Nona mmulobe Mwinya wa munddayá wi àrume anamalaba ena mmunddani mwaye. 3 Kadhowani! Miyo ddinourumani ninga mabila vari va miji. 4 Kamuttukule buddu na kobiri, nne buddu na oja, nne sandáliya dhina vina muganfwanya muttu mudila kammulejele.* 5 Nyumba ji nyumba enafiyenyu, murome ologa: ‘Murenddele okale vatakulu apano.’ 6 Akala vanokala muttu onfuna murenddele, murenddele wenyu onokala na iyene. Vano agahikalevo, murenddeleyá onele owiyelelani mwanya. 7 Dhahene mukale venevo, mujagá, mmwaga dhotene dhinvahiwenyu, sabwani namalaba onottambirha enfwanyelela mabasa aye. Kamukalege omwalavi nyumba na nyumba.
8 “Vina sidadi ji sidadi enavolowenyu, attuyá agawakelani, muje esile dhinavahiwenyu, 9 mwavulumutxe aredda anafwanyenyu, vina mwawaddele: ‘Omwene wa Mulugu oli vakuvi venyu.’ 10 Mugavolowa sidadi ji sidadi attuyámo ahuwakelani, mbudduwemo mudhowe mmarampani, muloge: 11 ‘Iyo ninele oguma mbwebwe wa sidadi yenyu okakamele mmanyaloni mwehu wi ekale ezinddiyelo yawi nyuwo mukaana muladdu. Vano muziwe eji, Omwene wa Mulugu oli vakuvi.’ 12 Ddinouwaddelani wi siku ntto goyi ddinagwele sidadi ejo dhinele ottabwa opitta esile dhinagweliwe Sodoma.
13 “Ntowa nugweleni nyuwo attu o Korazin; ntowa nugweleni nyuwo vina attu o Betsaida; sabwani matikiniho akosiwe mwilaboni mwenyu, kokosiwa elabo y’o Tiro na y’o Sidoni, anyayámo agahaguvela wabala saku vina agavisigiha munddura onihaga otxinuwa wawa. 14 Nona Siku N’ottonga, goyi dhinaugweleni dhinele ottabwa opitta esile dhinagwele akadda Tiro na akadda Sidoni. 15 Kito nyuwo attu o Kafarnau, munubuwela wi nttittimiho nenyu ninele ofiya wirimu? Nyuwo munele ogomela Mmasiye!*
16 “Onuvuruwanani, onoddivuruwana miyo vina. Onupwazani nyuwo, onoddipwaza miyo vina. Ottiya ejo, onddipwaza, onompwaza vina Ole oddirumile.”
17 Abale 70 arumiwe ahiyela n’ohagalala alogaga: “Nabuya, adomonyo vina anoniwelela mwaha wa nzina nenyu.” 18 N’eji Yezu ohiloga: “Ddinomona Satana bamottile wirimu ninga jayi. 19 Kavuruwanani! Miyo ddihuvahani owodha wonyigalana nowa, wenye, na guru dhotene dha amwiddani vina txipo kayiwo elobo enaukoseni yabure. 20 Vano, kamuttabe mwaha wa wiweleliwa na muya dhabure, muttabe sabwa yawi mazina enyu ahilebiwa wirimu.” 21 Mudhidhi obule odhaleliwa ohagalala na guru dha muya wokoddela vina ohiloga: “Babani, Nabuya wa wirimu na wa elabo ya vati, miyo ddinouttittimihani vanamwinjini sabwani muhavitela dha mmirimani mwenyu aziwitxi na attu ononelamo, mbwenyi muhaziwiha aima. Ndde, Babani, mufunile wi dhireye dhahene. 22 Babaga oddiperhekela dhilobo dhotedhene, kavo onimuziwa mowakwana-mwene Mwana ahili Babe; vina kavo onimuziwa mowakwana-mwene Babe, ahili Mwana, vamodha na abale anfuna mwanayá waziwiha.”
23 Venevo iyene ohazugunuwela anamasunza aye, ohawaddela vawa-vene: “Ohagalala ba mento enyu anona esile dhinoninyu. 24 Miyo ddinouwaddelani, anamavuhulela enjene vamodha na amweneyá anfuna wona dhinoninyu mbwenyi konile, vina anfuna wiwa dhiniwenyu, mbwenyi kewale.”
25 Venevo mulobwana dhahi, muziwitxi wa Nlamulo ovenya wi amwehe, onvuza: “Namasunziha, ddikose eni wi ddakele egumi yohimala?” 26 Yezu onvuza: “Txini elebiwe Munlamuloni? Onengesaga dhavi?” 27 Omwakula alogaga dhahi: “‘Omukwele Yehova Mulugu wawo, na murima wawo wotene, na omuttu* wawo wotene, na guru dhawo dhotene vina na yubuwelo yawo yotene,’ vina omukwele ‘muttu mukwawo ninga envikweliwe wamwinya.’” 28 Yezu ohiloga: “Ohakula pama, odidelevi okosa esene onele ofwanya egumi.”
29 Vano afunaga ovyoniha ninga muligani, mulobwanayá onvuza dhahi Yezu: “Mukwagayá-mukwagayá bani?” 30 Yezu omwakula dhahi: “Mulobwana dhahi wavenya o Jeruzalemi adhowaga o Jerikó, mudila ottiddiwa na ambava, amurula guwo dhaye, ambubudda adhowa vyawa; amuttiya nena n’okwa. 31 Mohijedheleya-mwene namakutta dhahi, wela ovira dila yakakene, mmoneliye omutxatxama ovira epaddi yina ya dila. 32 Yakakene vina Mulevita dhahi mufiyedhiye mburo obule, mmoneliye omutxatxama bavira epaddi yina ya dila. 33 Mbwenyi Musamariya dhahi wavira dila yakakene ohinfwanya, mmoneliye oheddiwa ttagaraga. 34 Venevo omususela, okuttulela makura na vinyu maferidayá vina ohimaga. Mmaleliye omuweliha vamunenamani vaye omuttukulela nyumba ya aleddo, omukoya. 35 Mmangwananimwá, ottukula denáriyu bili ohinvaha namakela aleddoyá, omwaddela: ‘Omukoye vina dhotene dhinanongiwe opitta esi ddinela oupitxela, ddigeyela.’ 36 Mwa alobwana aba araru, bani onimonavo weyo wi ddi mukwaye-mukwaye wa mulobwana ole wattiddiwe ambava?” 37 Iyene ohakula: “Ddule omweddele ttagaraga.” Venevo Yezu omwaddela: “Kadhowa wakose yakakene.”
38 Adhowagavi, ovolowa mmuruddani dhahi. Mwenemo muyana dhahi wakuweliwa Marta omwakela vatakulu vaye ninga muleddo. 39 Odduya wahikana mbalaye wakuweliwa Maria, wagilatile vakuvi na Yezu avuruwanaga dhalogiye.* 40 Vano Marta wahizuzuma na mabasa menjene, venevo iyene omususela Yezu ohiloga: “Nabuya, kamunona wi mbalaga oddittiyana mabasa menjene meka? Kaloganina wi adhe addikamihedhe.” 41 Yezu omwakula: “Marta, Marta, weyo oli wozuzumene vina odhugudheya na dhilobo dhinji. 42 Dhilobo dhing’onovi sili dhofuneya, obe modha bahi. Mbwenyi Maria osakulile yapamayá,* nona esakuliliye kanakiwe.”