Dhilebiwe na Marko
12 Iyene oroma wasunziha wili na dholaddaniha: “Mulobwana dhahi wahikana mundda waye wa uva, omaga rhinga orugunuwa munddayá wotene, otiba mwego mwanyigaliwa uvadhá vina omaga muringotti;* mmaleliye ohattiyedha anamalima, okosa oleddo, odhowa elabo yina. 2 Mfiyedhe nsaka nawittwa milimadhá, omurumawo mudhari mmodha wi avahiwewo epaddi wa milima dhaye. 3 Vano, awene amuttidda, ambubudda, amuruma odhowa madavi. 4 Oharumela mudhari mwina, mbwenyi awene anvada musorho vina amutota manyazo. 5 Vano omurumawo mwina, oddu ahimpa vina oharumelawo ena enjene, ena ahabubudda, ena ahapa. 6 Iyene wahikana mwina mmodha, wali mwanaye wokweleya. Omamalelowa omurumawo odduwene alogaga: ‘Awene anele omuriha mwanaga.’ 7 Mbwenyi anamalimayá mmonelani mwanaye, ahiloga oka-oka, ‘Oddu ddinfuna ohalana mundda obu. Ndhoweni nimpe, dhohalana dhaye dhikale dhehu.’ 8 Novenya, awene amuttidda vina ahimpa, amponyedha otakulu wa munddayá. 9 Txini enakose mwinya wa munddayá? Onele wiyela àpe anamalimayá, munddayá àperhekele ena. 10 Nyuwo kamunengesaga yoleba, enloga: ‘Nlugu nikoddile anamamaga nyumba ttidhile okala nlugu ninddimuwa na alsersi. 11 Nlugu ntti nindha wa Yehova, eji kahiyo yotikina vamentoni vehu’?”
12 N’eji anfuna omuttidda, vowi ahinonelamo wi ologile yoladdaniha eji awubuwelaga awene, vano annawova attu a muttitti, nona ahidhowa vyawa.
13 Vasogorhova aharumelawo Afarizi na anamafwara a Herodi wi amuttidde na mazu aye. 14 Mfiyedhani, ahiloga dhahi: “Namasunziha, ninoziwa wi muli webaribari, kamuntamela omuziveliha muttu vina kamunang’ana ekalelo ya attu, mbwenyi munosunziha dila ya Mulugu, mowiwanana na ebaribari. Enokala* obe kinkala ompitxela musoko Sézari? 15 Nipitxege obe nihipitxege?” Anonelagamo ogwarhagwambi wawa, ohavuza: “Munddehela eni? Kaddidhelenina denáriyu modha wi ddone.” 16 Amudhelana modha, iyene ohavuza: “Kove eji na dhilebiwevo s’ani?” Awene amwakula: “Sa Sézari.” 17 Yezu ohawaddela: “Munvahe Sézari dhili dha Sézari, mbwenyi dha Mulugu, munvahe Mulugu.” Awene atikina vaddiddi.
18 Venevo Asaduseu, ahinrumela wi abale akwile anele ovenyihiwa mukwani, amususela vina ahinvuza dhahi: 19 “Namasunziha, Mizé ohinilebela wi akala mulobwana onokwa, amuttiya mwadhiye ahinna aima, mbali wa marafulayá amutele wi ambalele mwana mbalaye okwile. 20 Ahikalawo abali atanu na eli. Woroma omutela muyana, mbwenyi ohikwa ahimuttiyile mwana. 21 Vina wanawili omutela mamukwelayá mbwenyi ohikwa vina ahimuttiyile mwana, yakakene jipadduwile na wanoraru. 22 Mwa otene aba atanu na eli, kavo omuttiyile mwana, omamalelowa okwile ddi muyanayá. 23 Nsaka na ovenyihiwa mukwani, bani onakale mamuneyá? Sabwani wahiteliwa na otene.” 24 Yezu ohawakula dhahi: “Nyuwo munyengetteyeli sabwani kamunnonelamo Malebo nne guru ya Mulugu. 25 Vowi nsaka n’ovenyihiwa mukwani, alobwana kantela nne ayana kantelihiwa, mbwenyi awene ankala ninga anju a wirimu. 26 Mwaha wa ovenyihiwa mukwani wa abale akwile, kamwengesile dhilebiwe munivuruni na Mizé, mudhidhi omuttanyuweli Mulugu vanikupuni na minga nattidda motto, amwaddelaga: ‘Miyo ddili Mulugu wa Abrahamu, Mulugu wa Izaki vina Mulugu wa Jakob’? 27 Nyuwo munyengetteya. Iyene kahiyo Mulugu wa abale akwile, mbwenyi Mulugu wa attu aliwo.”
28 Namasunziha magano wamwaddamele wavuruwana makaniyá, moneliye wi ohakula deretu, ohinvuza: “Mwa malamulo otene, noromana ttivi?”* 29 Yezu omwakula: “Noromana ttintti, ‘Kavuruwana, Weyo Izrayel, Yehova Mulugu wehu, ddi mmodha bahi, Yehova. 30 Omukwele Yehova Mulugu wawo, na murima wawo wotene, na omuttu* wawo wotene, na yubuwelo yawo yotene vina na guru dhawo dhotene.’ 31 Nanawili ttintti, ‘Omukwele muttu mukwawo ninga envikweliwe wamwinya.’ Kaniwo nlamulo nina ninddimuwa nimpitta aba.” 32 Namasunzihayá magano ohiloga dhahi: “Namasunziha, muhakula deretu mowiwanana na ebaribari, ‘Mulugu ddi Mmodha bahi, kawo mwina ahili iyene,’ 33 vina omukwela Mulugu na murima wehu wetene, na yubuwelo yehu yotene, na guru dhehu dhotene, vina omukwela muttu mukwehu ninga envikwelihu nanya, jamakamaka opitta mivaho dhotene dhoddumeya na mikuttodhá.” 34 Monele Yezu wi ohakula na ononelamo, omwaddela: “Kuli wolapelana na Omwene wa Mulugu.” Oromana venevale kavo muttu omvuzile vina.
35 Vano Yezu asunzihagavi mumparhani, ohivuza: “Kito anamasunziha magano anlogela nni wi Kristu ddi mwana Davidi? 36 Davidiyá eddihiwaga na muya wokoddela, ohiloga: ‘Yehova ohiloga na Nabuyaga: “Kagilati omononi waga woja ofiyedha miyo wattiya amwiddani awo, mutxiddo mwa manyalo awo.”’ 37 Mwinyene Davidi onimukuwela Nabuya, kito okalile dhavi mwanaye?”
Muttitti mwinjene wa attu anninvuruwana n’oziveliwa. 38 Iyene wannasunziha alogaga: “Porhe-porhe na anamasunziha magano, anziveliwa wabala guwo dholapa vina olejeliwa na nttittimiho vanamwinjini. 39 Anoziveliwa vina ogilati mipaddo dhoroma* agakala mmasinagoga* vina mimburo dhottukuwa agakala vamattangani. 40 Awene anottapatta nyumba* dha amamukwela, vina anokosa malobelo ogonela wila asibiwe.* Awene anele wakela ottongiwa wopitta.”*
41 Yezu ogilati vakuvi va makasha, mwekiwa kobiri; wannawona attu enjene* ekaga kobiri dhawa mukashani, areli enjene anekamo kobiri gwé. 42 Ofiyavo vina mamukwela wa muyelegi wikilemo kobiri bili dha muttengo mung’onovi.* 43 Yezu ohakuwela anamasunza aye ohiloga: “Ddinouwaddelani ebaribari, mamukwela oddu wa muyelegi ohikamo mukashani opitta ena otene. 44 Sabwani otene ekilemo dhohalavo dhawa, vano iyene muyelegani mwaye, wikilemo dhotedhene dhaniyena, wi akalewo.”