Dhilebiwe na Marko

4 Yezu oroma osunziha wili nikome na nyaza, vina muttitti mwinjene wa attu atugumana vàliye. Venevo iyene owela mmwanddiyani vina ogilati osusela vang’onovi mmanjeni, oku muttitti mwinjene buli nikome na nyazayá. 2 Oroma wasunziha dhilobo dhinjene na dholaddaniha, wannasunziha alogaga dhahi: 3 “Kavuruwanani! Namalima dhahi ovenya odhowa owaza beu. 4 Awazagavi, beu dhina dhimottela nikome na dila, balame dhidha, dhija. 5 Dhina dhimottela vamaluguni vahalitxi mattaka, dhimela momaguva sabwani mattakayá àli vadhulu-vadhulu. 6 Mbwenyi mobele nzuwa, dhinyala, dhihuma, sabwani kadhanetxa mitxitxi. 7 Beu dhina dhimottela vamingani, munuwele mingadhá dhihoga, vina kadhibalile milima. 8 Mbwenyi dhina dhimottela vamattakani apama, mmalelani omela vina wunuwa, dhiroma obala milima, dhina opitta dila 30, dhina 60 dhina 100.” 9 Iyene ohenjedhedha dhahi: “Onna maru owiwana, ewe.”

10 Vano Yezu muhaleliye yeka, abale àli na iyene vamodha na arumiwi aye kumi na eli aroma omvuza mwaha wa dholaddanihadhá. 11 Iyene ohawakula: “Nyuwo muvahiwa ononelamo wa dhoviteya dha Mulugu mwaha wa Omwene wa Mulugu, mbwenyi attu ena anaddeliwa na dholaddaniha, 12 wila ang’ane mbwenyi ahone, ewe vano ahinonelemo vina ahitxinuwe adha oleveleliwa.” 13 Ottiya ejo ohavuza: “Akala nyuwo kamunnonelamo yoladdaniha eji munawodhe dhavi ononelamo dholaddaniha dhina?

14 “Namawaza beu ddule onala nzu na Mulugu. 15 Vano beu dhimottele nikome na dila dhinatonya abale aniwa nzu na Mulugu, Satana badha oburutxamo nzuna naliwe mmurimani mwawa. 16 N’ekalelo yakakene, beu dhimottele vamaluguni dhinatonya abale aniwa nzu na Mulugu arumela n’oziveliwa. 17 Aboya kankana mitxitxi anroromela nsaka ning’onovi, vasogorhova agafwanyiwa makattamiho vina ofwara-fwariwa sabwa ya nzu, anokwakwattuwa. 18 Dhikalawo beu dhina dhimottele vamingani. Esi dhinatonya abale aniwa nzu, 19 mbwenyi dhozuzumiha dha elabo ejino na murega wa dhorela, vina dhofuna dhina dhinohoga nzuna, bahibala milima. 20 Oku esile dhimottele vamattakani apama dhinatonya abale aniwa nzu na Mulugu arumela, abo anobala milima—ena opitta dila 30, ena dila 60, ena dila 100.”

21 Ohawaddela vina: “Koddi attu agattiddiha panti anokunela na nyangaserha obe anttiya mutxiddo mwa kama? Kanttiya vadhulu? 22 Nona, kayiwo elobo evitiwe ehinoneye, vina kayiwo elobo evitiwe pama ehinaziwiwe. 23 Ole onna maru owiwana, ewe.”

24 Ohawaddela yina: “Mfwaseyele ovuruwana dhiniwenyu. Na mpimo ompimana nyuwo, munele opimiwana, vina munele wenjedhiwa vopitta. 25 Vowi ole onna onovahiwavi, vano ole ohinna, eng’onovi enna iyene, onele wakiwa.”

26 Iyene ohiloga: “Nona Omwene wa Mulugu onoladdanihiwa na mulobwana walile beu dhaye vamattakani. 27 Iyene onogona na mattiyu onovenya siku nina, mbwenyi beudhá dhinomela vina dhinowunuwa—masiki iyene ahiziwaga munuweloya. 28 Mattaka oka anobaliha milima dhawa, vamaromo nttuku vanawili nigala, omamalelowa nigalana ninobala milima. 29 Milimadhá dhigettwa, iyene onowara na karonga vowi nifiya nsaka n’osinanga.”

30 Iyene ohenjedhedha: “Ninaladdanihe na eni Omwene wa Mulugu obe yoladdaniha gani enatapulelena iyo Omwene wa Mulugu? 31 Onladdana na ttaga ya mostarda, ejuwene egaliwaga enkala yoyeva opitta ttaga dhina. 32 Mbwenyi ttagayá egaliwa enowunuwa bukala muri munddimuwa opitta miri dha milima dhina vina onokana dhirasi dhinddimuwa, mwenemo balame dhodhulu dhinofwanyamo mburo wokala.”

33 Yezu wannasunziha mazu a Mulugu na dholaddaniha, ofiyedha vagomela ononelamo wawa. 34 Txibarene, iyene kasunziha elo ahiladdanihaga, mbwenyi agakala yeka wannatapulela arumiwi aye dhotedhene.

35 Siku-nene nttile vati varibaga, iyene ohawaddela: “Ndhoweni nabuwele kobela yina.” 36 Nona mmalelani opaganya muttitti wa attu, amuttukula mmwanddiyani mwaliye, adhowa, vina myanddiya dhina dhannafwara. 37 Venevo, eroma woba pevo enddimuwa, etatamulile manebe avada mwanddiyayá ofiyedha okala nena nobwina. 38 Mbwenyi Yezu wali mmwanddiyani epaddi ya mundduni agonaga basamelile almofada.* Dhahene awene ahinvenyiha alogaga: “Namasunziha, kamunona wi ninfuna okwa?” 39 Venevo, Yezu ovenya onyanyuwela pevo vina ohiloga na nyaza: “Kamala! Kakurumuwa!” Pevoyá ekurumuwa vina nyazayá emaala noo. 40 N’eji Yezu ohavuza: “Munovela nni dhahene?* Kamunakanavi nroromelo?” 41 Mbwenyi awene attiddiwa wova onddimuwa, vina afiyedha ologa oka-oka: “Mulobwanayá oddu bani? Ofiyedha pevo na nyaza omwiwelela.”