Dhilebiwe na Luka
20 Masiku abale, Yezu àsunzihaga attu mumparhani vina alaleyaga muttaka wapama, anddimuwa a anamakutta, anamasunziha magano vamodha na anddimuwa a nlogo àdha, 2 vina ahinvuza dhahi: “Kanaddeleni, na owodha gani onkosinyuna esidhá? Vina ouvahileni owodhawa bani?” 3 Iyene ohawiyihedha: “Miyo vina ddikaana y’ouvuzani, nyuwo muddakule: 4 Batismu ya Joau, yali ya wirimu obe ya attu?” 5 Venevo aroma wubuwela oka-oka alogaga: “Iyo nigaloga, ‘Yali ya wirimu,’ iyene ononivuza, ‘Kito mukoddele nni omuroromela?’ 6 Mbwenyi nigaloga wi “Ya attu,’ muttitti wotene onele oniponyedha malugu, sabwani awene anorumela wi Joau wali namavuhulela.” 7 N’eji awene amwakula wi kaziwa odhelani. 8 Yezu ohalogana: “Miyo vina kaddinauwaddeleni na owodha gani onkosimina esidhá.”
9 Vasogorhova iyene oroma wawaddela attu a nlogo yoladdaniha eji: “Mulobwana dhahi wahikana mundda waye wa uva, mmaleliye ohattiyedha anamalaba aye, okosa oleddo adhowaga elabo yolapela vina ogonelawo mudhidhi mwinjene. 10 Mfiyedhe nsaka nawittwa milimadhá. Iyene omurumawo mudhari mmodha wa anamalimayá wila amvahe milimadhá dha mmuddanimwá. Vano anamalimayá mmalelani ombubudda, amuruma odhowa madavi. 11 Mbwenyi iyene oharumela mudhari mwina. Oddu awene vina ambubudda, amutota manyazo, amuttiya odhowa madavi. 12 Iyene omurumawo mudhari wanoraru, vano awene anvoreya vina amuttamagiha. 13 Nowidhawo, mwinya wa munddayá wa uva ohiloga, ‘Ddinakose eni? Ddinele omurumawo mwanaga wokweleya. Txino awene anele omuriha oddo.’ 14 Anamalimayá mmonelani aroma wubuwela mukalelani alogaga, ‘Oddu ddinahalena dhotene. Ndhoweni nimpe wi dhinfuna iyene ohalana dhikale dhehu.’ 15 Novenya, awene anvokela otakulu wa munddayá vina ahimpa. Kito mwinya wa munddayá wa uva onakosena eni anamalimayá? 16 Onele wiyela àpe anamalimayá, munddayá àperhekele ena.”
Mwiwalani esodhá ahiloga: “Ejiya txipo kipadduwe!” 17 Vano Yezu odidela wawang’ana vina ohiloga: “Kito txini entapulela yoleba eji: ‘Nlugu nikoddile anamamaga nyumba ttidhile okala nlugu ninddimuwa na alisersi’? 18 Wotene ole ommottela vanluguni ntti, onele otateya. Vano ommotteliwa nluguna onele otatareya.”
19 Mudhidhene obule, anamasunziha magano vina anddimuwa a anamakutta, atamela omuttidda, sabwani ahinonelamo wi walogile yoladdanihayá awubuwelaga awene, vano annova muttitti. 20 Mmalelani omwang’ana n’ofwaseya aharumawo attu alaganilanina moviteyani wi avyonihege ninga attu apama, atamelaga omuttidda na mazu aye wila amperhekele wa anddimuwa a guverno. 21 Awene ahinvuza dhahi: “Namasunziha, ninoziwa wi munologa vina munosunziha dholigana, muhimusakulaga muttu; mbwenyi munosunziha dila dha Mulugu mowiwanana na ebaribari: 22 Enokala* obe kinkala iyo ompitxela musoko Sézari?” 23 Mbwenyi iyene ozinddiyela oswaga wawa vina ohawaddela: 24 “Kaddilagiheni denáriyu* modha. Kove eji na dhilebiwevo s’ani?” Amwakula: “Sa Sézari.” 25 Iyene ohawaddela: “Bahito, munvahe Sézari dhili dha Sézari, mbwenyi dha Mulugu, munvahe Mulugu.” 26 Dhawene kawodhile omuttidda na mazu alogiliye vari va nlogo, vano mwaha wa otikina na yowakula yaye, amalawo.
27 Venevo Asaduseu ena, abuwene ahinrumela wi abale akwile anele ovenyihiwa mukwani, amususela vina ahinvuza dhahi: 28 “Namasunziha, Mizé ohinilebela, ‘Akala mulobwana onokwa, amuttiya mwadhiye ahinna aima, mbali wa marafulayá amutele wi ambalele mwana mbalaye okwile.’ 29 Epadduwile jiji, ahikalawo abali atanu na eli. Woroma omutela muyana vano ohikwa, ahabalile aima. 30 Venevo wanawili 31 vina wanoraru amutela mamukwelayá. Yakakene jipadduwile na otene atanu na eli, ahikwa ahattiyile aima. 32 Omamalelowa okwile ddi muyanayá. 33 Bili dhawene nsaka na ovenyihiwa mukwani, kito mamuneyá onakale ani? Sabwani wahiteliwa na otene atanu na eli.”
34 Yezu ohawakula dhahi: “Attu a nsaka nttino* anotela vina anotelihiwa, 35 mbwenyi abale anoniwa wi anofwanyela okalawo nsaka nindhawo, agavenyihiwa mukwani kantela vina kantelihiwa. 36 Txibarene, awene txipo kankwa, vowi awene ali ninga anju vina sabwa yawi anele ovenyihiwa mukwani, anele okala ana Mulugu. 37 Vano sabwa ya ovenyihiwa mukwani wa abale akwile, Mizé ofiyedha ologa va nipadduwoni na nikupu na minga, mulogeliye wi Yehova ‘Mulugu wa Abrahamu, Mulugu wa Izaki vina Mulugu wa Jakob.’ 38 Iyene kahiyo Mulugu wa abale akwile, mbwenyi Mulugu wa attu aliwo. Sabwani mwa iyene, otene akalawo.” 39 Anamasunziha magano ena ahakula dhahi: “Namasunziha, muhiloga pama.” 40 Sabwani awene kawodha nne ngafuna okosa nivuzo nimodha.
41 Vasogorhova Yezu ohavuza: “Kito awene anlogela nni wi Kristu ddi mwana Davidi? 42 Sabwani mwinyene Davidi ohiloga dhahi munivuruni na Masalmo, ‘Yehova ohiloga na Nabuyaga: “Kagilati omononi waga woja 43 ofiyedha miyo wattiya amwiddani awo, mutxiddo mwa manyalo awo.”’ 44 Davidi onimukuwela Nabuya, kito okalile dhavi mwanaye?”
45 Oku nlogo notene nivuruwanaga, Yezu ohawaddela dhahi anamasunza aye: 46 “Porhe-porhe na anamasunziha magano, anziveliwa wabala guwo dholapa, anziveliwa olejeliwa na nttittimiho vanamwimjini vina anziveliwa ogilati mipaddo dhoroma* agakala mmasinagoga* vina mimburo dhottukuwa agakala vamattangani. 47 Vina aboya anottapatta nyumba* dha amamukwela, vina anokosa malobelo ogonela wila asibiwe.* Awene anele wakela ottongiwa wopitta.”*