Dhilebiwe na Marko
6 Iyene ovenya venevale odhowa sidadi ebaliwiye, anamasunza aye ahinfwara vina. 2 Mfiyedhe siku na Sabuddu oroma osunziha musinagoga,* attu enjene amwiwa antikina alogaga: “Muttu oddu odhilena wuvi dhilobo esi? Ovahedheliwe eni zelu na owodha wa wirana matikiniho aba? 3 Oddu kahiyo namasema, maye kahiyo Maria ki abalaye kahiyo Tiago, Jozé, Simoni na Juda, arogoriye kahiyo aba otene ali veneva na iyo?” N’eji awene aroma okwakwattuwa mwaha waye. 4 Venevo Yezu ohawaddela: “Kavo namavuhulela onttittimihiwa mmuruddani mwaye, na amudhaye, vina vatakulu vaye.” 5 Mbwenyi Yezu, kakosile matikiniho menjene sidadi ejile, ehili watapulela mada na wavulumutxa aredda ang’onovi bahi. 6 Mwebaribari, otikina venjene na otowa wawa nroromelo. Venevo odhowa mirudda dhowaddamela àsunzihaga attuyámo.
7 Yezu ohatugumaniha anamasunza aye 12, oharuma eli-eli vina ohavaha owodha wowaburutxamo attu muya dhabure. 8 Iyene ohakokomeza wila ahittukule elobo yina muleddoni mwawa—nne pawu, nne buddu mowika dhoja, nne kobiri musintuni mwawa, mbwenyi mukongozo bahi— 9 ohawaddela wila àbale sandáliya vina ahittukule guwo dhina.* 10 Ottiya ejo, ohawaddela vina: “Nyumba ji nyumba enadhowe nyuwo, mukale venevo ofiyedha obudduwavo. 11 Vano vego pa vego vahinakeliwenyu obe vahinavuruwaniwenyu, mugabudduwagavo mugume mbwebwe wa mmanyaloni mwenyu wila ekale ezinddiyelo ya okodda wawa.” 12 Dhahene abudduwa adhowa walaleya attu wi anfwanyela otxinuwa, 13 awene anttamagiha muya dhinjene dhabure, annasigiha aredda enjene makura vina annavulumutxa.
14 Mwene Herodi ohiwa dhalogiwa, vowi nzina na Yezu nahivuwa mwetemwene vina attuyá anloga: “Joau Namabatiza ovenyihiwa mukwani, nona jijene enkoseliye matikiniho menjene.” 15 Ena anloga: “Oddo ddi Eliya.” Oku ena aloga: “Oddo namavuhulela onligana na abale awale.” 16 Mwiwaliye esodhá, Herodi ohiloga: “Oddo ddi Joau ole omugwaddihilemi nikotti, ovenyihiwe mukwani.” 17 Masiku a mundduni Herodi wahimmagiha Joau bamfugeliha mukambura mwaha wa Herodía, sabwani Herodi wamutelile mwadhi mbalaye Filipi. 18 Vowi Joau wannimwaddela Herodi eraga: “Kinrumelihiwa omutela mwadhi mbalinyu.” 19 Sabwa ya ejuwene Herodía wanimukanela ntxiga Joau vina wanfuna ompa, mbwenyi kawodha. 20 Sabwani Herodi wannimova Joau, vowi wanziwa wi muttu woligana murima, ohinna muladdu, nona wannimbarela. Herodi agavuruwana dhaloga Joau wakala wozuzumene, ahikannaga yokosa masiki dhawene wanninvuruwana n’oziveliwa.
21 Mbwenyi nifiya siku nofwanyelela, naja Herodi mattanga a obaliwa waye. Vamattanganivá ohakuwelelavo anddimuwa a anamalaba aye, anddimuwa a anyakoddo aye na attu a ettomo a mu Galileya. 22 Mwana Herodía ovolowa, otxetta, omuziveliha Herodi na otene aja vamodha na iyene. Venevo mwene omwaddela namwaliya: “Kaddikumbirhe enfuniwe, miyo ddinele ouvaha.” 23 Ndde, iyene oddubela alogaga: “Elobo-txilobo enaddikumbirhiwe ddinele ouvaha, masiki ekale yofuneya ogawelana vari omwene waga, miyo ddinele ouvaha.” 24 Iyene obudduwa odhowa omvuza maye: “Ddikumbirhe eni?” Maye omwakula: “Wakumbirhe musorho wa Joau Namabatiza.” 25 Momaguva namwaliyá ottamaga odhowa vàli mwene, omukumbirha alogaga: “Ddinfuna muddivahe mohigonela musorho wa Joau Batista mbandejani.” 26 Masiki ejiya vamukubanyihilani Herodi, iyene kafunile opwaza yokumbirha ya namwaliyá mwaha wa dhopikirhela dhikosiliye vina sabwa ya attu aja vamodha na iyene.* 27 Dhahene Herodi, omuruma munyakoddo mmodha mwa abale amwang’anela na mpaganyo wa odhana musorho wa Joau. Iyene odhowa omugwadda nikotti mukambura mwaliye, 28 odhana musorhoyá mbandejani ohimperhekela namwali, namwaliyá ohinvaha maye. 29 Anamasunza a Joau mwiwalani esodhá, ahidhowela maningoyá ahika mwikuttani.
30 Arumiwi a Yezu atugumana vaaliye, amwaddela dhotene dhakosilani na dhasunzihilani. 31 Yezu na anamasunza aye, kakana mudhidhi nne ngafuna woja sabwani àkalavo enjene adha vina adhowa, venevo iyene ohiloga dhahi na anamasunza aye: “Ndhoweni vehu-vene, navume vang’onovi.” 32 Nona awela mmwanddiyani, adhowa otamela mburo wofwasa wi akalevo oka. 33 Mbwenyi attu awonile abudduwagavo, ahiziwa odhowilani, muttitti mwinjene wa attu adhana sidadi dhotene attamagela ofiyawo na myeddo, awene ahinatti. 34 Yezu atitaga mmwanddiyani ohona muttitti mwinjene wa attu, ohaweddela ttagaraga vowi àli ninga mabila ahinna mukumbuzi. Venevo oroma wasunziha dhinjene.
35 Vati vahimala oriba, anamasunza aye amususela vina amwaddela: “Mburo obu kunkaliwa, vati variba. 36 Murome wapaganya attu aba, adhowe mmuruddani vina sidadi dhowaddamela wi agule elobo-elobovi yoja.” 37 Iyene ohawakula: “Nyuwene mwavahe yoja.” Anamasunza aye ahinvuza: “Nidhowe nagule pawu na muttengo wowakwana denáriyu* 200 navahe attu aba aje?” 38 Yezu ohavuza: “Munna pawu ngasi? Kadhowani moone!” Mudhowelani wona, amwakula: “Ninna pawu tanu na oba bili.” 39 Iyene oruma wila attu àlivo, agilati vamanini makuru-makuru. 40 Agilati makuru-makuru meena attu 100 vina meena 50. 41 Ottukula pawu eso tanu na oba bili, ohang’ana wirimu, vina ohilobelela. Vasogorhova omenya pawudhá, ohavaha anamasunza aye wila awene àgawele attuyá, vina omenya oba esile bili bagawela attu otene. 42 Dhahene otene aja, ahakwanana, 43 vina addoddela pedaso dha pawu dhahalile, badhakwanela middanga* 12, vina addoddela oba dhahalile. 44 Ajile pawudhá àli ofiyedha alobwana 5.000.
45 Momaguva-mwene oharuma anamasunza aye wi awele mmwanddiyani, asogorhe, abuwele kobela yina y’o Betsaida, iyene apaganyaga muttitti wa attu. 46 Mmaleliye opaganya muttittiyá, owela vamwangoni wi alobele. 47 Muribele vati mwanddiyayá wali vari va nyaza, oku Yezu balivi yeka otakulu. 48 Moneliye wi anamasunza aye ahikana makattamiho otxapa vowi adhowa wadhela pevo, iyene ohafwarela eddaga vadhulu va manje mudhidhi wa membesi,* vano wakala ninga onfuna àkwaranye. 49 Mmonelani eddaga vadhulu va manje ahiloga dhahi: “Iyoyá kaninoroha!” Vina awene akuwa. 50 Vowi otene amona ahova, momaguva-mwene iyene ohawaddela: “Kalibani murima! Ddi miyo, kamove.” 51 N’eji Yezu owela mmwanddiyani mwalani, pevoyá emaala. Monelani eso ahuma milomo, 52 sabwani kanonelemo matikiniho a pawu. Mirima dhawa dhali dhofugeya-dhene, kawodha ononelamo.
53 Mwabuwelani, afiya elabo ya Jenezareti, amagelela mwanddiya wawa venevale. 54 Mutitelani mmwanddiyanimwa, attu a elaboyá amuzinddiyela Yezu. 55 Awene ahedda elabo ejile yotene, awaddelaga attu, attuyá annattukula aredda vamakani adhowagana dhipaddi dhotene dhewani wi Yezu oli wenewo. 56 Mimburo dhotene dhavirani, mmiruddani, mmasidadi na mimburo dhotene dhafiyani, anttiyiwa aredda mmarampani amulobaga wi ngafuna-wene addiginye yabalo yaye. Otene addiginya, anvulumuwa.