Dhilebiwe na Luka

22 Nela waddamela nsaka na Mattanga a Pawu Dhotowa Emela, ankuweliwa Paskwa. 2 Anddimuwa a anamakutta na anamasunziha magano antamela marhe ofwanyelela a ompana Yezu, sabwani annova muttitti. 3 Vano Satana onvolowa Juda onkuweliwa Iskariote wali mmodha wa Kumi na Eli, 4 odduya odhowa ogumana na anddimuwa a anamakutta vamodha na anddimuwa a ang’aneli a mumparhani wi alaganele marhe a omperheka mmadani mwawa. 5 Awene ahiziveliwa vina arumela omvaha kobiri dha parata. 6 Nona iyene orumela vina oroma otamela mudhidhi wofwanyelela wi amperheke mmadani mwawa, vahili muttitti wa attu.

7 Nihifiya siku najiwa Mattanga a Pawu Dhotowa Emela, naperhekiwa mukutto wa Paskwa; 8 venevo Yezu omuruma Pedro na Joau, alogaga: “Kadhowani, mwasasanyedhe mattanga a Paskwa wi nije.” 9 Ahinvuza: “Munfuna wi nasasanyedhe wuvi?” 10 Yezu ohawakula: “Kavuruwanani! Mugavolowaga musidadimwa, munele ogumanana mulobwana ottukulile mukatte wa manje. Mumfware mpaka nyumba enavolowiye. 11 Muloge na mwinya wa ntakuluna: ‘Namasunziha oniruma ouvuzani: “Mburo wa aleddo oli wuvi wi miyo ddijewo Mattanga a Paskwa vamodha na anamafwara aga?”’ 12 Mulobwana oddo onele outonyihedhani sala enddimuwa eli odhulu, muli mobiliya. Musasanyedhe wenewo.” 13 Awene adhowa afwanya dhotedhene dhahene ninga mwaddeliwani na Yezu vina asasanyedha mattangayá a Paskwa.

14 Mfiyedhe mudhidhiyá, iyene ogilati vameza vamodha na arumiwi aye. 15 Vina ohawaddela: “Ddanfuna vaddiddi omuja Paskwa oddu na nyuwo, ddihinatti otabuwa. 16 Miyo ddinouwaddelani dhahi, kaddinamuje vina ofiyedha wakwanihedheya Mumweneni mwa Mulugu.” 17 Iyene ohakela kalisi, omutamalela Mulugu vina ohiloga: “Kakelani kalisi eji, mvirihedhane motene, 18 vowi ddinouwaddelani, oromana ddabuno kaddinamwe vina mulima wa mvidera mpaka vanadhe Omwene wa Mulugu.”

19 Iyene ottukula pawu, olobelela, omenya vina ohavaha alogaga: “Eji entapulela maningo aga, anaperhekeliwe nyuwo. Ejiya mukosegevi muddubuwelaga miyo.” 20 Iyene okosana yakakene na kalisiyá mmalelani oja mattanga, alogaga: “Kalisi eji entapulela nipagano niswa ninawodheye na nikami naga, ninfuna okuttuleliwa nyuwo.

21 “Ziwaní wi ole onfuna oddiguliha oli veneva vameza vamodha na miyo. 22 Pumwenemo, Mwana-muttu onodhowa bari mpimeleliwani. Vano wa ntowa ddule onfuna omuguliha!” 23 Dhahene aroma ovuzana mukalelani wi amuziwe bani wafuna okosa esodhá.

24 Venevo aroma opambihana vaddiddi atamelaga omuziwa bani wali munddimuwayavo. 25 Vano Yezu ohawaddela: “Amwene a malogo anovikosiha anya a attu analamulelani vina abale anna onddimuwa wa attu abo, anowiriwa Anamakosa Opama. 26 Nyuwo kamukale dhawene. Mbwenyi munddimuwayá wenyu, akale ninga mima vina ole onsogorhela akale ninga mwimeleliyá.* 27 Munddimuwayá bani, ddule onja* obe ddule onimelela?* Kahiyo ole onja?* Vano miyo ddili vari venyu ninga ole onimelela.*

28 “Vano ddi nyuwo okalilevi na miyo, muwehiwani mwaga, 29 Miyo ddinokosa na nyuwo nipagano na omwene dhahene ninga mukosele Babaga nipagano na miyo, 30 wi muje, mumwe vameza Mumweneni mwaga vina mugilati mmipaddoni muttonge mahimo 12 a Izrayel.

31 “Simoni, Simoni, kewa! Satana ohifuna wi motene mvettiwe ninga munvetteliwa tirigu. 32 Vano miyo ddinoulobelelaga wa Mulugu wi nroromelo nawo nihobane, vina ogeyela owodhe walibiha abalawo.” 33 Venevo Pedro omwakula: “Nabuya, ddigana odhowa na nyuwo mukambura obe opiwa vamodha na nyuwo.” 34 N’eji Yezu ohiloga: “Ddinouwaddela, Pedro, ddabuno mutubi kunonle, weyo ohinatti oddikodda dila ttaru wi onoddiziwa.”

35 Iyene ohawaddela vina: “Vorumileni miyo muhinna buddu na kobiri, buddu noja nne sandáliya akala yujombeleni?” Awene amwakula: “Nne!” 36 N’eji ohawaddela: “Ovano onna buddu na kobiri vina buddu na dhoja attukule; ohinna supadda agulihe mukumi waye, agulena nimodha. 37 Vowi ddinouwaddelani wi enofuneya wakwanihedheya mwa miyo esile dhilebiwe, ‘Iyene otaganyihiwa na anamalupa malamulo.’ Ndde, ejiya enowakwanihedheya mwa miyo.” 38 Venevo amwaddela: “Nabuya, apa nikanavo masupadda meli.” Iyene ohawakula: “Ahakwana.”

39 Mbudduweliye odhowa Omwangoni wa Olivera ninga mwalemeleliye, anamafwara aye vina ahinfwara. 40 Mfiyedhaniwo, iyene ohawaddela: “Mudidele olobela wila munagwele munyengetteyani.” 41 Osusavo odhowa volapela vang’onovi, okokora oroma olobela, 42 alogaga: “Babani, mugafuna, ddirabelihení kalisi eji, vano kikoseye ninga munfunela miyo, mbwenyi ekoseye ninga munfunela nyuwo.” 43 Venevo ottanyuweliwa anju odhile wirimu omulibiha. 44 Vano iyene okubanya venjene vina odidela olobela, karhuma yaye yammottela vati ninga mattotto a nikami. 45 Mmaleliye olobela, ovenya odhowa wali anamafwara aye, wafwanyile agonaga, okumuwene na okubanya. 46 Iyene ohawaddela: “Mungonelani? Kavenyani vina mudidele olobela wi munagwele munyengetteyani.”

47 Iyene alogagavi, ofiyavo muttitti wasogorheliwa na mulobwana dhahi wakuweliwa Juda, mmodha wa Kumi na Eli, oddoyá omususela Yezu wi ambejari. 48 Vano Yezu ohinvuza: “Juda, onimuguliha Mwana-muttu na beju?” 49 Abale àlivo monelani dháfuna opadduwa, ahinvuza Yezu: “Nabuya, nalupele na masupadda?” 50 Mmodhavo ofiyedha ogwadda niyaru na mono woja na mudhari wa namakutta munddimuwa. 51 Vano Yezu ohiloga dhahi: “Bahi.” Ottidda niyaruna ohinvulumutxa. 52 Yezu ohiloga na anddimuwa a anamakutta, anddimuwa a ang’aneli a mumparhani vamodha na anddimuwa a nlogo adhowile omuttidda: “Nyuwo mudha na masupadda na miri wi muddimage ninga dda mbava? 53 Miyo ddakala na nyuwo mumparhani masiku otene, nyuwo kamuddimagile. Vano obu mudhidhi wenyu vina mudhidhi onlamulela eddima.”

54 Venevo ahimmaga amuttukulela vatakulu va namakutta munddimuwa, mbwenyi Pedro wannafwara wolapela-wene. 55 Muttiddihedhelani motto vakintalo, agilati vamodha-vene, Pedro ogilati valani. 56 Venevo mudhari mmodha wa muyana mmoneliye Pedro bagilatile waddamana na motto, odidela omwang’ana vina ohiloga: “Mulobwana oddo wali vamodha na iyene.” 57 Mbwenyi Pedro okodda, alogaga: “Muyana wé, miyo kaddinimuziwa.” 58 Mvirele mudhidhi mung’onovi, muttu mwina omona, ohiloga: “Weyo vina oli mmodha wawa.” Venevo Pedro ohiloga, “Mulobwana, miyo kaddili.” 59 Mvirele wora modha mulobwana mwina oroma ologa na ntidi: “Txibarene mulobwana oddo vina wali na iyene, vowi, ddwa o Galileya!” 60 Venevo Pedro omwakula: “Mulobwana, miyo kaddinziwa dhinlogiwe.” Mudhidhene obule iyene alogagavi mutubi ohunla. 61 Nowidhawo, Nabuya ozugunuwa odidela omwag’ana Pedro. Pedroyá ohubuwela mazu alogile Nabuya eraga: “Ddabuno, mutubi ohinonla, weyo onele oddikodda dila ttaru.” 62 Venevo iyene obudduwavo odhowa wunla na okubanya onddimuwa.

63 Alobwana ammagile Yezu, aroma ombedda vina onvada, 64 Mmalelani omukunela omentoni, anloga: “Kavuhulela! Bani ouvadile?” 65 Vina annimulogela dhilobo dhinji dhonveyihana.

66 Muyele vati nikuru na anddimuwa a nlogo, anamakutta na anamasunziha magano atugumana, amuttukulela Yezu o Sinedriyu* vina aloga: 67 “Kanaddele akala weyo oli Kristu.” Venevo iyene ohawakula dhahi: “Masiki miyo dduwaddeleni kamunarumele. 68 Ottiya ejo, miyo kouvuzani, nyuwo kamugaddakulile. 69 Vano oromana ovanene mpaka musogorho Mwana-muttu onele ogilati omononi woja wa Mulugu wowodha.” 70 N’eji otene ahinvuza: “Koddi weyo oli Mwana Mulugu?” Iyene ohawakula: “Ddi nyuwene mwanya munloga wi ddili.” 71 Awene aloga: “Ninatamelela eni anamoona ena? Vowi iyo nimwiwa mwinyene alogaga.”