Dhilebiwe na Luka
18 Mmalelani Yezu ohawaddela yoladdaniha modha mwaha wa ofuneya wa olobela mudhidhi wotene, ahilemaga, 2 alogaga: “Musidadi dhahi mwahikala namattonga wahamova Mulugu nne vina wahamuriha muttu. 3 Musidadimwa mpo mwakala vina muyana dhahi wa mamukwela, oddoyá wandidela odhowa ogumana na namattongayá amukumbirhaga: ‘Kaddittongeni miyo vamodha na mwiddanaga.’ 4 Ovira mudhidhene iyene ahifunaga ottonga muladduyá, mmaleliye namattongayá ohubuwela yeka dhahi, ‘Miyo kaddinimova Mulugu, vina kaddinimuriha muttu, 5 mbwenyi mamukwela oddo onkala oddinyonyavi, ddinele ottonga muladdu waye wila anadhegevi oddinyonya na yokumbirha yaye ofiyedha miyo omulemana.’” 6 Venevo Nabuya ohiloga: “Kewani elogile namattonga ole, masiki valiyevi muttu wabure. 7 Txibarene, Mulugu kanakamihedhe abale àsakuliliye animunlela mutana na mattiyu wila akoseliwe oligana, oku iyeneyá àvilelaga? 8 Ddinouwaddelani, iyene onele okosiha wi ereliwe dholigana momaguva. Vano Mwana-muttu agadha onele wafwanya attu anna nroromelo* ninga ntti velaboni ya vati?”
9 Iyene ohawaddela vina yoladdaniha eji, abale avyona ninga attu oligana murima vina ahariha akwawa: 10 “Alobwana eli adhowa mumparhani wi alobele, mmodha wali Mfarizi, mwina wali namapitxiha musoko. 11 Mfarizi ohimela oroma olobela mmurimani mwaye alogaga: ‘Eh Mulugu, ddinoutamalelani vowi kaddili ninga ena otene: Ambava, ohiligana murima, anamalupa matelo nne vina ninga namapitxiha musoko oddu. 12 Ddinottuga dila bili vasumanani vina ddinompitxa n’ekumi wa dhotene dhinkanemina.’ 13 Mbwenyi namapitxiha musoko wemelile wolapela-wene nne kawodha wang’ana wirimu, vano wanvada vapetoni alogaga: ‘Eh Mulugu, muddeddele ttagaraga, miyo muttegi.’ 14 Ddinouwaddelani, mulobwana ole ohiyelela vatakulu vaye oniwaga ninga muttu woligana murima ompitta Mfarizi oddule. Sabwani wotene onvittukulela onele okurumutxiwa, mbwenyi onvikurumutxa onele ottukuwihiwa.”
15 Attu annattukulela aima vàli Yezu wi iyene àtapulele mada, mbwenyi anamasunza aye mwawonelani aroma wasaddeya. 16 Yezu ohakuwelela vàliye aimayá alogaga: “Kaattiyeni aima adhe vali miyo, vina kamwakoddihe sabwani Omwene wa Mulugu bwa abale ankala ninga awene. 17 Ddinouwaddelani ebaribari, oddule ohinakela Omwene wa Mulugu dhahene ninga mwana, txipo kanavolowe Mumwenenimwa.”
18 Munddimuwa mmodha wa Ayuda ohinvuza, alogaga: “Namasunziha Wapama, ddikose eni wi ddakele egumi yohimala?” 19 Yezu omwakula: “Onddikuwelelani wapama? Kawo wapama ahili mmodha bahi, Mulugu. 20 Weyo onoziwa malamuloyá: ‘Kulupe matelo, kumpe muttu, kuwiye, kuvahe onamoona wottambi, omurihe babo na mayo.’” 21 Venevo iyene ohiloga: “Miyo ddinovirihagamo dhotedhene eso ovenyana muzombweni mwaga.” 22 Mmaleliye wiwa esodhá, Yezu omwakula, “Enoujombela elobo modha: Wagulihe dhotene dhinna weyo, kobiridhá wagawele ayelegi, onele okaana nifumo wirimu; ogamala odhe okale namafwara waga.” 23 Mwiwaliye eso, iyene okubanya venjene vowi warela vaddiddi.
24 Yezu omwang’ana vina ohiloga: “Enele warutxa abale anna kobiri dhinji ovolowa Mumweneni mwa Mulugu! 25 Txibarene, akala enorutxa kamelo ovolowa munintoni mwa singano, yottabwetxayá ja mureli ovolowa Mumweneni mwa Mulugu.” 26 Abale ewale esodhá, ahiloga: “Bani onawodhe ovuneya?” 27 Yezu ohiloga: “Dhilobo dhihinwodheya na attu, mwa Mulugu dhinowodheya.” 28 Vano Pedro ohiloga: “Moone! Iyo nittiya dhilobo dhotedhene dhanehuna vina nihufwarani.” 29 Yezu ohawakula: “Txibarene miyo ddinouwaddelani, kawo ottiyile nyumba yaye, omuttiyile mwadhiye, abalaye, amambalaye obe anaye sabwa ya Omwene wa Mulugu 30 ohinakele esidhá vopitta ovanene vina elabo* endha egumi yohimala.”
31 Venevo iyene ohakuwelela vawa-vene anamasunza aye 12 vina ohawaddela: “Kewani! Iyo nindhowa o Jeruzalemi vina dhotedhene dhilebiwe na anamavuhulela mwaha wa Mwana-muttu dhinele wakwanihedheya. 32 Motagiha, iyene onele operhekiwa mmadani mwa attu a malogo, awene anele ombedda, omutabutxa vina omuturela mara. 33 Agamala ombubudda anele ompa, mbwenyi siku nanoraru onele ovenyihiwa mukwani.” 34 Vano awene kaziwelamo yatapulela esidhá, sabwani ahiviteliwa yatapulela mazuyá wi ahinonelemo.
35 Yezu addamelaga mu Jerikó, ohinfwanya muliba ohona dhahi wagilatile nikome na rampa, akumbirhaga esmola. 36 Mwiwaliye muttitti wa attu oviraga, iyene ovuza txini yapadduwa. 37 Amwaddela: “Ddi Yezu Munazareti onvira!” 38 Venevo iyene okuwa dhahi: “Yezu, Mwana Davidi, muddeddele ttagaraga!” 39 Abale àli osogorho annimusaddeya, ammalihaga, vano iyene wankuwavi: “Mwana Davidi, muddeddele ttagaraga!” 40 Yezu ohimela vina oruma wi mulobwanayá, adhiwena. Mfiyedhe mulobwana ole vakuvi na Yezu, ohinvuza dhahi: 41 “Weyo onfuna wi miyo ddukosele eni?” Iyene ohiloga: “Nabuya, kaddikamihedheni wiyelela wona.” 42 Venevo Yezu ohiloga: “Keyelela wona; nroromelo nawo niuvulumutxa.” 43 Mudhidhene obule iyene ohiyelela wona vina oroma onfwara, amuttittimihaga Mulugu. Venevo attu otene onile esidhá, aroma vina omuttittimiha Mulugu.