Dhilebiwe na Mateu

27 Muyele vati, anddimuwa a anamakutta vamodha na anddimuwa a nlogo, atugumana wi alogele marhe a ompiha Yezu. 2 Mmalelani ommaga, awene amuttukula vina ahimperhekela governador Pilato.

3 Venevo, Juda wamugulihile Yezu, moneliye wi iyene ohittongeliwa okwa, oribiwa murima, ohawiyihedha anddimuwa a anamakutta na anddimuwa a nlogo kobiridhá 30 dha parata, 4 alogaga: “Ddittega mwa omuguliha muttu ohinna muladdu.” Awene amwakula: “Ejo kili na iyo, eso sawo!” 5 N’eji, ovokela kobiridhá dha parata mumparhani, obudduwamo, odhowa ovihoga. 6 Venevo, anddimuwa a anamakutta, addoddela kobiri esile dha parata, aloga dhahi: “Kinkala iyo okoya kobiri esi mburo onkoyiwa kobiri dha mumparhani, sabwani obu muttengo wa nikami.” 7 Mmalelani olaganela, attukula kobiridhá adhowa ogulana mundda wila venteriwege anawedda. 8 Nona mundda obule ogaromoliwa Mundda wa Nikami ofiyedha siku na ddabuno. 9 Dhahene ahakwanihedheya mazu a namavuhulela Jeremiya ologile dhahi: “Addoddela kobiri 30 dha parata, muttengo wapimeleliwe muttu, obule wewananele ana Izrayel. 10 Agulana mundda dhahene ninga mwaddaddele Yehova.”

11 Yezu bali vamentoni va governador, governadoriyá omvuza dhahi: “Weyo oli Mwene wa Ayuda?” Yezu omwakula: “Ddi nyuwo mwanya munloga.” 12 Vano iyene kakulile elobwene amagedhiwaga na anddimuwa a anamakutta vamodha na anddimuwayá a nlogo. 13 Venevo Pilato ohinvuza: “Kuniwa dhotedhene esi dhinumagedhani?” 14 Vano iyene kamwakulile-wene, nne na nzu nimodha; n’eji governadoriyá ohuma milomo.

15 Vyaka dhotedhene dhajiwa mattanga, governador wahikana elemelelo ya onfurula munyaperhezu odduwene watonyiwa na muttitti wa attu. 16 Awene ahikana munyaperhezu wakuweliwa Barabá wali timbwini wavuwile vaddiddi. 17 Mutugumanelani, Pilato ohavuza: “Nyuwo munfuna wi miyo ddinfurule ani, Barabá obe Yezu, onkuweliwa Kristu?” 18 Vowi Pilato wanziwa wi awene amperhekele sabwa ya ntxiga. 19 Ottiya ejo, bali wogilatene otribunali, mwadhiye omurumela mpaganyo alogaga dhahi: “Kumuddawele muttu oddo wotowa muladdu, sabwani ddabuno dditabuwa vaddiddi murohani sabwa yaye.” 20 Mmalelani anddimuwa a anamakutta na anddimuwa a nlogo ahatujela attu a muttitti wi akumbirhe ofuruliwa wa Barabá, Yezu apiwe. 21 N’eji governador ohavuza: “Munfuna wi ddinfurule ani?” Awene amwakula: “Barabá.” 22 Venevo Pilato ohavuza: “Kito munfuna ddimukosena nni Yezu, onkuweliwa Kristu?” Otene amwakula: “Akomeliwe vapingirhizini!”* 23 Iyene ohavuza: “Sabwaya jani? Obure gani okosiliye?” Awene ankuwavi eraga: “Akomeliwe vapingirhizini!”*

24 Pilato onaga wi kawodha okosa elo, ottiya ejo onaga vina wi onyagula wa muttitti wela winjiva, ottukula manje, onawa mada vamentoni vawa alogaga: “Miyo kaddinna muladdu wa muttu oddu. Muladdu obu bwenyu.” 25 Attu otene a nlogo ahakula dhahi: “Nikami naye ninikuttuwele iyo vamodha na anihuyá.” 26 Iyene onfurula Barabá, vano oruma wi Yezu awasuliwe vina ohimperheka wi apiwe vapingirhizini.

27 Anyakoddo a governador amuttukula Yezu, adhowana vatakulu va governadoriyá vina makuru otene a anyakoddo agumana, amuttiya vari. 28 Mmalelani omurula guwo dhaye, amwabaliha mukumi wofila. 29 Aluwa kara* ya minga, amwabaliha mmusorhoni vina attukula murhazi amuttiddeliha nlada naye noja, akokora vamentoni vaye ambeddaga dhahi: “Munolejeliwa, Mwene wa Ayuda!” 30 Amuturela mara, attukula murhaziyá baroma onvadana musorho. 31 Mmalelani ombedda, amurula mukumiyá, amwabaliha guwo dhaye, venevo amuttukula wi amukomele vapingirhizini.

32 Adhowaga, ahinfwanya Mulobwana dhahi w’o Sirene wakuweliwa Simoni, awene ahimmagelela ottukula pingirhiziyá.* 33 Mfiyedhani mburo onkuweliwa Gólgota, kuloga Nigalagadha.* 34 Ahinvaha vinyu yotaganyihiwa na murobwe wa mataba owawa wi amwe, mbwenyi mmaleliye orawurha, okodda. 35 Mmalelani omukomela vapingirhizini, awene agawelana dhabalo dhaye atamelaga oziwa na gari, egattukulile muttu-muttu. 36 Agilati venevale amwang’anelaga. 37 Vadhulu va musorho vaye akomelavo tabwa yalebiwe mazu omusumelana, aloga: “Oddu ddi Yezu Mwene wa Ayuda.”

38 Akomeliwa vina na Yezu ambava eli, mmodha omononi waye woja, mwina omononi waye wemara. 39 Attu avira annimuruwana akutukutaga musorho wawa, 40 alogaga: “Weyo wafuna ogujula mparha vina wimetxa mwari mwa malabo mararu, kavivune-to, akala weyo oli mwana Mulugu, katita-to vapingirhizini!” 41 Vina anddimuwa a anamakutta, anamasunziha magano na anddimuwayá a nlogo annimbedda alogaga: 42 “Iyene ohavuna attu ena, mbwenyi mwinya kanwodha ovivuna; akala Iyene Mwene wa Izrayel, atite ovanene vapingirhizini; iyo ninele omurumela. 43 Iyene omuroromela Mulugu; akala Muluguyá onomurumela, amvune-to ovanene; vowi ohiloga: ‘Ddili Mwana Mulugu.’” 44 Yakakene vina, ambava akomeliwe vamodha na iyene vapingirhizini,* annimuruwana.

45 Oromana mudhidhi wa wora 12,* ofiyedha wora 15,* elabo yotene yahikuneleya n’eddima. 46 Yakwanelaga wora 15,* Yezu okuwa na lizu noliba: “Eli, Eli, lama sabaktani?” Kuloga, “Mulugu waga, Mulugu waga, muddinyanyalele nni?” 47 Mwiwalani ejoyá, ena àlivo, ahiloga dhahi: “Mulobwana oddu onimukuwela Eliya.” 48 Mmodhavo ottamaga momaguva, ottukula esponja, obwiniha mwali vinyu yonyunya, ohika omurhazini vina ohinvaha wi amwe. 49 N’eji, ena anloga: “Kamuttiyeni! Ninfuna none akala Eliya onele odha omvuna.” 50 Yezu okuwa wili na lizu noliba vina ohikwa.*

51 Mudhidhene obule, kurtina na mumparhani niharuwa vari, oroma odhulu ofiyedha mutxiddo. Elabo ettekenyeya; malugu addurumuwa. 52 Dhikutta dhifuguwa, miruttu dhinjene dha akoddeli akwile, dhihiburutxeliwa otakulu, 53 dhihoniwa na attu enjene. (Mmalele Yezu ovenyihiwa mukwani, attu adhana omasiye avolowa sidadi yokoddela.) 54 Vano, mwimeleli wa anyakoddo vamodha na otene àli na iyene amwang’anelaga Yezu, monelani ottekenyeya wa mattaka na dhotene dhapadduwile, ahova venjene vina ahiloga: “Txibarene, oddu wali Mwana Mulugu.”

55 Ahikalavo ayana enjene emelile wolapela-wene ang’anaga; awene anninvelela Yezu oromana o Galileya, amukamihedhaga na mabasa. 56 Mwa aboya wahikalavo Maria Madalena, Maria mayi wa Tiago na Jozéz vina mayi wa ana Zebedeu.

57 Vowi vati vahiroma oriba, ofiya mulobwana dhahi worela, wakuweliwa Jozé w’o Arimateya, wali vina namafwara wa Yezu. 58 Mulobwana oddo odhowa wa Pilato vina okumbirha maningo a Yezu. Pilatoyá oruma wi avahedhiwe. 59 Jozé ottukula maningoyá, opopottela na guwo eswa ya linyu. 60 Oheka mwikuttani yaye eswa, yatopileyi vamaluguni. Mmaleliye opigiritxelawo nlugu ninddimuwa omavolowelo wa ekuttayá, odhowa. 61 Mbwenyi Maria Madalena na Maria mwina, ahikalavi venevale ogilatene, omavolowelo wa ekuttayá.

62 Siku nina, nakuweliwa siku na Sabuddu, anddimuwa a anamakutta na Afarizi adhowa otugumana vatakulu va Pilato, 63 ahiloga dhahi: “Nabuya, ninoubuwela wi mvanyi ole ahinatti okwa, wanloga dhahi: ‘Agavira malabo mararu ddinele ovenyihiwa mukwani.’ 64 Nona, kalamulani wi ekutta yaye yang’aneliwege ofiyedha malabo mararu, wi anamasunza aye anadhowe amwiye agamalaga awaddele attu a nlogo dhahi: ‘Iyene ohivenyihiwa mukwani!’ N’eji, ozivala oku womariha ogali wottabwawa opitta woroma.” 65 Pilato ohawaddela dhahi: “Kattukuleni anyakoddo mudhowena, adhowe ang’anelegewo ninga munfunelinyu.” 66 Novenya, awene adhowa olibiha ofuga ekuttayá na malugu meena, vina ahattiyawo anyakoddo ang’anelaga.