Dhilebiwe na Mateu
23 Yezu ohiloga dhahi na muttitti vamodha na anamasunza aye: 2 “Anamasunziha magano na Afariziyá ahala vamburoni va Mizé. 3 Nona mukose vina muvirihemo dhotedhene dhinlogani, mbwenyi kamukose dhinkosani, vowi awene anologa, vano kanvirihamo. 4 Awene anomaga mittorho dholemela bavijeliha attu vetturini, mbwenyi aweneyá kanwodha nne-wene opizurha na ebuno yawa. 5 Anokosa mabasa awa otene na efunelo ya woniwa na attu; wila avite merelo awa abure, anowunuwiha makasha a malebo vina guwo dhawa. 6 Anoziveliwa mimburo dhottittimiheya agakala vamattangani vina ogilati mipaddo dhoroma agakala mmasinagoga, 7 vina anoziveliwa olejeliwa na nttittimiho vanamwinjini vina okuweliwa Rabi.* 8 Vano nyuwo kamukuweliwege Rabi, vowi mmodha bahi ddili Namasunziha wenyu, nyuwo motene muli abali. 9 Vina kammukuwele muttu wa vati apano, Baba; sabwani Babinyu ddi mmodha bahi wa wirimu. 10 Nne kamukuweliwe asogorheli; sabwani Musogorheli wenyu ddi mmodha bahi, Kristu. 11 Nona munddimuwayá vari venyu, akale mudhari wenyu. 12 Ole onvittukulela onele okurumutxiwa, vina onvikurumutxa onele ottukuwihiwa.
13 “Ntowa nugweleni nyuwo anamasunziha magano na Afarizi, agwarhagwambi! Sabwani munowabarela attu anfuna ovolowa Mumweneni wa wirimu, vano nyuwoyá kamumvolowamo vina munowakoddiha ovolowa abale antamela. 14* ——
15 “Ntowa nugweleni nyuwo anamasunziha magano na Afarizi, agwarhagwambi! Sabwani munowedda munyaza na mwilaboni mwetemwene mmutamelaga muttu wi avolowe munikuruni mwenyu; muganfwanya, munomukaliha muttu onfwanyelela mu Jehena* dila bili opitta nyuwo.
16 “Ntowa nugweleni nyuwo aliba ohona, munaweddiha akwinyu mulogaga, ‘Muttu agaddubelela mparha, ejo kahiyo elobwene; mbwenyi agaddubelela woru wa mumparhani, onokokeliwa ovirihamo eddubeleliye.’ 17 Azimorha, attu ohona nyuwo! Koddi ennetxa ttima txini, woru obe mparha onttittimiha woruyá? 18 Ottiya ejo, nyuwo munologa dhahi, ‘Akala muttu onoddubelela ebuwa, ejo kahiyo elobwene; vano agaddubelela mvaho oli vebuwaniva, onokokeliwa ovirihamo eddubeleliye.’ 19 Aliba ohona nyuwo! Koddi elitxi yattimayá jivi, bu mvaho obe ji ebuwa enttittimiha mvahoyá? 20 Nona onddubelela ebuwa, kanddubelela ebuwavi, onoddubelela vina dhotedhene dhilivo; 21 onddubelela mparha, kanddubelela mparhavi onomuddubelela vina Mulugu onkalamo. 22 Onddubelela wirimu, onddubelela mpaddo wa Mulugu na Oleya ogilatile vampaddoniva.
23 “Ntowa nugweleni nyuwo, anamasunziha magano vina Afarizi, agwarhagwambi! Sabwani munomperheka n’ekumi wa ortela,* wa endru na wa kominyu,* oku mpwazaga dhinddimuwadha dhinruma Nlamulo, ninga oligana murima, ttagaraga na ororomeleya; sisene dhali dhofuneya okosiwa mbwenyi muhipwazaga dhina. 24 Aliba ohona nyuwo munaweddiha akwinyu, munokuwari ebu, oku nyuwo mmedhaga kamelo!
25 “Ntowa nugweleni nyuwo, anamasunziha magano na Afarizi, agwarhagwambi! Sabwani munosuwa kopo na parato otakuluvi, oku mwarimwa mwawa pudhalile osirira dhilobo dhinji na ofuna ovihagalaliha bahi. 26 Mfarizi wé wohona, karoma okuputta mwari mwa kopo na mwa paratoyá wi otakuluwa okale vina wokoddelene.
27 “Ntowa nugweleni nyuwo anamasunziha magano na Afarizi, agwarhagwambi! Sabwani munkala ninga dhikutta dhizirhimiwe dhinoneya otakuluvi ninga dhokoddela, oku mwarimwa pudhalile magogoddo a attu okwa na dhotakala dhotedhene. 28 Yakakene, nyuwo vina, otakuluvi munoniwa na attu ninga apama, oku mwari mwenyu pudhalile ogwarhagwambi na dhotedhene dhingudulana na nlamulo.
29 “Ntowa nugweleni nyuwo anamasunziha magano na Afarizi, agwarhagwambi! Sabwani munomaga dhikutta dha anamavuhulela vina munokoddeliha dhikutta dha aligani, 30 munologa, ‘Kowiliwa iyo nel’okalawo masaka a azamani ehu, kanigaakamihedhile okuttula nikami na anamavuhulela.’ 31 Vano, nyuwo mwanyene, munowoniha na merelo enyu wi muli ana a abale àpile anamavuhulela. 32 Txibarene, kapulihani mabasa aromile azamani enyu.
33 “Nyuwo nowa, ziza na dhivili; munawodhe dhavi ottawa ottongeliwa mu Jehena?* 34 Nona jijene enurumelani miyo anamavuhulela, aziwitxi na anamasunziha vattaddo. Enaya, nyuwo munele wapa vina wakomela vapingirhizini; enayá munele wawasula mmasinagoga mwenyu vina munele wafwara-fwara sidadi ji sidadi, 35 wila mpwattele muladdu wa nikami na attu oligana, nikuttuleliwe vati apano; oromana nikami na Abeli, ofiyedha nikami na Zakariya mwana Barakiya, ompilenyu vari-vari oku santuwariyu oku ebuwa. 36 Ddinoupangani, dhotedhene esi dhinele wagwela attu a nsaka nttino.
37 “Jeruzalemi wé, Jeruzalemi wé, onapa anamavuhulela vina onaponyedha malugu abale anrumeliwa weyo—dila ngasi dhifunile miyo watugumaniha anawo, dhahene ninga mwanaku onakubatta anaye mmakapwani mwaye! Vano nyuwo kamufunile. 38 Ovano, nyumba* yenyu enele omwaliwa.* 39 Miyo ddinouwaddelani, oromana ddabuno kamunaddone vina ofiyedha siku ninaloginyu, ‘Worurihiwa ddule ondha na nzina na Yehova!’”