Merelo a Arumiwi
15 Alobwana dhahi adhana o Judeya, aroma wasunziha abali, alogaga: “Nyuwo mugahitxetteliwe dhahene ninga munrumela nlamulo na Mizé kamunawodhe ovuneya.” 2 Mmalele Paulo vamodha na Barnabé opambihana venjene na alobwana abale, abaliya alaganela wi Paulo na Barnabé vamodha na ena adhowe o Jeruzalemi alogele makaniyá aba na abali vina na arumiwi.
3 Mmalelani mulogo owavelela vang’ono, Paulo na Barnabé vamodha na abali ena adhowanavi oleddo wawa aviraga o Fenisiya na o Samariya, awaddelelagamo mwaha wa attu a malogo meena arumelile omwebedha Mulugu; dhahene abali otene ewa miselu eso anziveliwa venjene. 4 Mfiyedhani o Jeruzalemi, mulogo, arumiwi vamodha na anddimuwa a mulogo ahawakela pama; vina awene ahawaddelelamo dhilobo dhinjidhene dhakosile Mulugu, na mada awa. 5 Venevo, attu ena a nikuru na Afarizi arumelile omfwara Kristu, avenya mmipaddoni mwawa vina aloga: “Jofuneya watxetteliha vina waruma wi ewelelege Nlamulo na Mizé.”
6 Venevo, arumiwi vamodha na anddimuwa atugumana wi alogele makani aba. 7 Mvirele mudhidhi mwinjene apambihagana vaddiddi, Pedro ovenya vina ohalogana: “Alobwanani, abali, nyuwo muziwa wi vamaromo Mulugu oddisakula vari venyu wila ddalaleyele miselu dhapama attu a malogo meena. 8 Mulugu, onziwa mirima dha attu otene ohoniha wi wannarumela, àvahaga muya wokoddela dhahene ninga mwanivaheliye. 9 Iyene kanittiyanihile na awene, mbwenyi okoddeliha mirima dhawa sabwa ya nroromelo. 10 Ovano nyuwo munimwehelani Mulugu mwamagelelaga anamasunza ovijela muttorho* ohiwodhile ovijela makolo ehu nne vina ohinwodha iyo ovijela? 11 Ottiya ejo iyo nikaana nroromelo nawi ninovuniwa na mahala a Nabuya Yezu dhahene ninga awene.”
12 N’eji otene amaala vina aroma onvuruwana Barnabé na Paulo aloga matikiniho na vizinddiyelo dhinjene dhikosile Mulugu na mada awa vari va attu a malogo meena. 13 Mmalelani wawaddelelamo, Tiago oroma ologa vina: “Alobwanani, abali, kaddivuruwaneni. 14 Simeau* otapulelamo dhotedhene dhikosile Mulugu, wi ovano ohawubuwela attu a malogo meena, vina ohasakulamo ena wi akuweliwege na nzina naye. 15 Dhologa esi dhinowiwanana na mazu a Anamavuhulela anloga: 16 ‘Dhotedhene esi dhigamala ddinele wiyela ddimage nyumba ya Davidi egwile, ddinele omaga wili dhibuwadhá vina ddinele ovenyihedha, 17 wila abale anhalavo amwiwelelege Yehova, vamodha na attu a malogo otene abuwene anakuweliwege na nzina naga, onloga ddi miyo Yehova, onkosa dhotedhene esi, 18 dhiziwiwe oromana walene.’ 19 Nona yofuna yaga ja ohatotela makattamiho attu abo a malogo meena anrumela omwebedha Mulugu, 20 mbwenyi nalebele wi atadhe nama dhikutteliwe amulugu, ogonihana wonyakuwa,* nama dhohogiwa vina nikami. 21 Ovenyana masaka awale akalawo attu anlaleya sidadi ji sidadi dhilebiwe mmanivuruni a Mizé; sabwani awene anowengesa na lizu nowiweya mmasinagoga masabuddu otene.”
22 Venevo arumiwi, anddimuwa vamodha na mulogoyá, alaganela waruma o Antiokiya alobwana asakuliwe vari vawa, aveleliwaga na Paulo na Barnabé; amurumawo vina Juda wakuweliwa Barsaba vina Sila, alobwana asogorhela vari va abali. 23 Awene aleba karta eji ahaperhekela:
“Iyo arumiwi na anddimuwa nili abali enyu ninouperhekelani malejelo nyuwo abali a malogo meena, munkala o Antiokiya, o Síria na o Silísia. 24 Nihiwa ologa wi akalawo abudduwile vari vehu bautotelani makattamiho na dhilogilani vina ahitamela ouzuzumihani, mbwenyi warumile kahiyo iyo, 25 nona nilaganela mumodhani ourumelani alobwana àsakulilehu aveleliwaga na abalihu okweleya Barnabé na Paulo, 26 alobwana aba aperheka egumi yawa mwaha wa nzina na Nabuya wehu Yezu Kristu. 27 Vano nihimuruma Juda na Sila wi auwaddeleni dhakakene. 28 Sabwani muya wokoddela onikamihedha ononelamo wi kahiyo yapama oupwattelihani muttorho mwina dhihili dhilobo esi dhofuneya: 29 odidela otadha nama dhikutteliwe amulugu, nikami, nama dhohogiwa* vina ogonihana wonyakuwa,* mugarabela dhilobo esi, munokana egumi yapama. Muhale na murenddele!”
30 Dhahene mmalelani opaganyiwa, alobwana aba adhowa o Antiokiya, atugumaniha nikuru notene vina ahaperhekela kartayá. 31 Abayá mmalelani wengesa kartayá, attaba vaddiddi na mazu olibiha àlimo. 32 Ninga Juda na Sila àli anamavuhulela, ahapangarhaza abali na diskursu dholibiha. 33 Wavira mudhidhi bali wenewo, mmalelani abaliyá aharuma odhowa ajedhelaga wi afiye o Jeruzalemi na murenddele 34* —— 35 Venevo Paulo na Barnabé ahala o Antiokiya; wenewo vamodha na ena enjene ansunziha vina anlaleya miselu dhapama dha mazu a Yehova.
36 Mvirele masiku mangasi, Paulo ohiloga na Barnabé: “Ovano ndhowe niyele nawone abali a sidadi dhotedhene mulaleyilihu nzu na Yehova, wi niziwe dhinapadduwela.” 37 Barnabé wafuna amuttukule Joau, wakuweliwa Marko. 38 Mbwenyi Paulo kafuna wi Marko adhowe na awene sabwani iyene wahattiya o Panfiliya vina kadhowile okosa mabasa a olaleya na awene. 39 Vahikala opambihana onddimuwa ofiyedha aweneya ogawana, venevo Barnabé omuttukula Marko awela mmwanddiyani ahabuwela o Xipre. 40 Paulo omusakula Sila wi adhowe vamodha, nomala abali amulobelela Yehova amukumbirhaga wi amulagihe Paulo mahala aye. 41 Iyene ovira o Síria na o Silísia, alibihaga milogo.