Kakalawo Na Mukalakala Mosanzaya Velaboni Ya Vati!
Nivuru nthi nilebeliwe wila nukamihe omuziwa bani othanddile elabo ya vati na dhilobo dhotene dhilivo. Onela osunza wila Mulugu, oddwene othanddile elabo ya vati, ohikana nzina. Mpu ninotapulelamo vina sabwa emuthanddeli Mulugu muthu nanda weyo onawodhe dhavi okalawo na mukalakala mosanzaya velaboni ya vati.
Ninjedhela wila maladdaniho menjene alimo okamihe wona deretu dhilobo esi. Wila opuretxemo vaddiddi mwa esi, onofanyela wengesa malebo a Bibilia atonyihedhiwe nikome na maladdaniho menjiya. Dhaene onela wengesa wamwinya dhilobo dhina dhaderetu dhilibelile Mulugu, dhili mBibiliani, vina esile dhinloga Mulugu dhinfanyeliwe okosa wila wone osoriheya wa dholibela esi.
Ogafuna kalabihedha nivuru nthi wila wakamihe athu ena. Akala ohikana ana, onela olabihedha wila wakamihena osunza dhilobo dha Mulugu. Akala onkala mwilaboni muli anddimuwa enjene ahinziwa wengesa, kalabihedha maladdaniho aba wila wakamihena ononelamo dhifunelo dha Mulugu, wila awene, mpaddi wawa, akamihe vina amwanddamani awa.
Ninjedhela na murima wotene wila osunza wa muselu obu wufugulele musuwo wa wakela maruryo menjene, mpaka vina walagiha athu ena mukalelo onawodhanina okalawo na mukalakala mosanzaya velaboni ya vati.