Munowaziwa Monaga Merelo Awa—Dhologa esi dhiburutxiwe mu Anuário das Testemunhas de Jeová de 2013
Nikuku 47, ddima 1 vina 2—Afrika
“Mulugu Onimwebedha Weyo ddwa Guru”
Muyana dhahi watxemerhiwa Caro, onkala elabo ya Uganda. Wahiroma omusunza Bibilia, nvirele mweri mmodha bahi, mamunaye, Martin, wali mukwiri, wahiroma ofarafara. Iyene wahiloga “Sabwa ya manivuru awo, muya dha azamani kadhinvolowa vina mbamwa mpu.” Iyene wanimusottotta vina wanimutxutxa mwadhiye, alogaga wi agahimpa kohimuttiya omusunza Bibilia. Ottiya ejuwene iyene wahittiya wasapela anamudhi. Caro wahikala wofaseyene, vina wahiroma oguliha milima dha mundda waye wi akaane muhaku vina wi adhowevi bagakaana eziwelo yebaribari. Musogorhomwa, mooniliye wi egumi yaye yali mwari a makattamiho, Caro wahittawa vatakulu. Iyene wahikosa guru wi awodhe ovisapela. Mbwenye, vaziwileye wi anaye ali aredda iyene wahittukula kobiri eg’onovi yana iyene nanda bagulana mirobwe wi avahe awene.
Muvirile mudhidhi mug’onovi, mamuni wa Caro wahimukuwela na muttitto alogaga. “Ddinofuna vaddiddi wi wiyelele vatakulu. Ddimala oziwa wi Mulugu onimwebedha weyo ddwa guru vina wi iyeneya oli na weyo. Ddinottidda meddo wakumbirhe attuya abo anosunziha wi adhe addisunzihe miyo vina. Miyo txibarene ddinfuna dditxinje egumi yaga.” Martin waloga ebaribari. Ovano anamudhi bowiwanana vina bohagalala. Martin vamodha na Caro aviperhekela obatiziwa vamutugumanoni wa kwatti wa Agosto 2012.
Nikuku 52, ddima 1 mpaka 53 ddima 1
‘Iyene Wahiddivaha Poso naye na Txapewa’
Va matugumanoni a kwatti a yaka ya 2010 elabo ya Chile, Marcelo wa yaka kumi dha obaaliwa, wahifiyedha woona wi mulobwana wagilatile vakuvi vaye kaana nivuru nne nimodha wene.
“Iyene kaana Bibilia,” iyene wamunog’onela mamayaye.
“Kattiya wi iyene afare malebo vamodha na weyo,” wahakula mamayaye. Venevo Marcelo wahimwaddamela vina wahimwengesa Bibilia na mulobwana, watxemerhiwa Victor, engesaga malebo otene vamodha na iyene. Varomile mudhidhi wovuma, Marcelo wahiloga na mamayaye eraga, “Iyeneya kaana poso.” Mamayaye wahiloga wi iyene agawane poso naye vamodha na Victor. Mbwenye Marcelo wahinvaha iyene sandi vamodha na kopo modha ya txaya yoviha. Mudhidhi waja Victor poso naye, Marcelo wahimutonyihedha iyene malebo a Bibilia afanyeeliye wubuwela.
Mudhidhi wa txiguwo, nzuwa nanaviha vaddiddi awene. Marcelo wahimuzugunuwela mamayaye dila yina vina wahiloga, “Iyene kaana txapewa.”
Mamayaye wahakula, “Kanvahe iyene wawo.” Venevo iyene wahikosa ejuwene. Mumalile porograma, Marcelo vamodha na Victor ahipaganyana.
Vamatugumanoni a kwatti a yaka yina, Marcelo wahag’ana dhipaddi dhotene atamelaga woona akala Victor wahidha. Mwa ohagalala waye, iyene wali wenewale, vina dila eji iyene wahimala wabala garavata! Victor vamooniliye Marcelo, iyene wahivuwiha: “Miyo ddili veneva ddabuno sabwa ya muzombwe oddu. Yaka ejile evirile, miyo ddahittambirha muwobo wa matugumano a kwatti, vina miyo ddahidha. Muzombwe oddu wahimwengesa Bibilia waye vamodha na miyo vina wahiddivaha poso naye vamodha na txapewa. Ovano miyo ddimmusunza Bibilia!” Victor ohidha okala namalaleya ohinatti obatiziwa.