Mianmar

Makuku 104-105

Yehova Ohiddivaha Muya wa Omuttu Oswa

WILSON THEIN

OBAALIWE YAKA YA 1924

OBATIZIWE YAKA YA 1955

DHOLOGA DHA MWIGUMINI MWAYE Wali mbava nanda wahivilibihedha vaddiddi wi asaddule mweddelo waye ovano onlaba ninga pionero wa vawoka mwari mwa vyaka 54.

VALI MIYO muzombwe, ddahisunza masoko, kani enwaniwa s’dhipano, vina kani entxemerhiwa judo. Mwadhahene ddali muwali ddihirutxiwaga okaana rayiva. Baddina vyaka 19, ddankosa epaddi ya nikuru na atimbwini ddanasopolaga attu dhilobo dhawa ddatxutxaga na futti. Vamalelani ddahittiddiwa baddifugeliwa vyaka tanu na ttaru, venevo ddahubuwela vaddiddi mwaha wa egumi yana miyo vina ddahilobela vaddiddi. Mwari miyo ddanfuna oziwa vaddiddi modheela Mulugu.

Vafuguleliwe miyo, ddahimwalela o Yangon wenewo ddahiroma woona matugumano a Anamoona a Yehova. Vamalile, miyo ddahiviperheka baddibatiziwa, modheela nikamihedho na abali okwela.

Vamalile miyo obatiziwa, ddannivilibihedhavi wi ddilagihe mweddelo wa Mukristu. (Ef 4:24) Miyo ddahikaana ekalelo ya ovuza wa okattamiha, nanda kaddarutxiwa onyonyeya na attu. Ddanfuna okala muttu waderetu, mbwenye ddanrutxiwa wag’anela etanaalelo yaga. Ddanivoona ninga muttu wowobana vaddiddi dila dhiina ddandowa mpaka wali mwinje nanda baddigagonelawo ofiyedha mudhidhi mwinjene baddigonla.

Yaka ya 1957, ddihittomiwa ninga pionero wavawoka. Murudda woroma warumiwe miyo wali o Mandalay. Wenewale ddahilabawo na misionario Robert Richards. Wali ninga babaga. Iyene wahiddisunziha ozuzumela mikalelo dha attu vina ononelamo na oviyeviha sabwa ya ohiligana waga. (Gal 5:22, 23) Mudhidhi wakala miyo wosilidhiwa , ddannimulobelela Yehova wi addivahe muya wa omuttu oswa, woliba vina wa murenddele. (Masal 51:10) Yehova wahakula malobelo aga, mmalelani ddahiwodha wogolela omuttu waga.

Musogorhomwa, dhahimusunziha mulobwana wa vyaka 80 wali wa kapela Batista. Alabeli a kapela ejile ahisilidhiwa na miyo baddimageedha “ombava” wi ddahiya mabila awa. Mwadhahene mulobwana mmodha wahika mbeni okoveni waga nanda bagaddivuza na lizu na otxutxa, “Ompa muttu dabi?” Venevo ddahoona osilidhiwa wunuwaga mmirimani mwaga. Momaguva baddilobela mwari-mwari wa Yehova baddimwakula na okurumuwa vina na oliba murima, “Weyene kaakula nivuzo nawo wamwinya.” Vamalelani mulobwanaya kakosile elobo, olovenyavo badhowa. Baddimutamaalela Yehova sabwa ya oddikamihedha owodha okala wokurumuwa ologa. Mudhidhi mug’onovi musogorho namasunza waga wa Bibilia wahibatiziwa, nanda bakalavi na nroromelo mpaka okwa waye.

Movira vyaka, ddihilaba mburo dhowakwana 17 mwenemwale mwarumiwa miyo ddahifiyedha wakamihedha attu owakwana 64 osunza ebaribari. Ddigobuwela mukalelo onlagiha Yehova oderetu wa miyo, mento anodhaleliwa mintori. Iyene wahimukamihedha muttu wowali, munyakani, wosilidhiwa mpaka ottukula muya wa omuttu oswa vina wa murenddele.

[Mutoma wa nikuku 4]

Miyo ddavona ninga muttu wowobana dila dhiina ddandowa wali mwinje baddigonla mudhidhi mwinjene