“Vyaka Zana Banigalaleya Omwene!”—Epaddi eji eburutxiwe mu nivuruni na Testemunhas de Jeová—Proclamadores do Reino de Deus
Makuku 259-260
Muvirile vyaka ttaru, yaka ya 1922 matugumano meena a kwatti ahindduwaliwa akosiwe o Cedar Point. Ali masasanyedho a malabo matanu na manai, aromile labo 5 mpaka 13 mweri wa Setembro. Mottiya matugumano a kwatti a elabo ya Estados Unido vina Yokanadá, eena adhile elabo ya Europa. Ahikalawo matugumano a dhilogelo kumi. Muttengo wa Anamewa wa matugumano engesiwa labo-labo ahifiyedha 10.000; vina mwa diskursu ya vattaddo ekosiwe na musorho “matxikwi na matxikwi a attu ankalawo ovanene kanaakwe vina”attuya alivo labona ntto ahinjiva mpaka okala dila bili 10.000.
Anamasunza a Bibilia kadhile vamatugumanoni apo obuwelaga wila akosiwa masasanyedho a okosiwa mabasa velaboni ya vati mwa masaka a musogorho mwebaribari ahiloga wi matugumano abale a kwatti ali omariha “ofuruliwa wa relijiau mwa yogana ya Omwene wa odhulu wa Mulugu vina na ebaribari ya odha wa nabuya wehu vina wa Mulugu” ohinafiya. Mbwenye, mwakwanile mudhidhiya mug’onovi okosa efunelo ya Mulugu yali nipara na dhofuna dhawa.
Na ejuwene muyubuweloni, sikwa ishano labo na 8 na mweri wa Setembro, mbali Rutherford ohikosa diskursu yoziweya vaddiddi yana musorhoya “Omwene”.
Ejuwoya ehinatti, vahikiwa makome otene a mburo wa mutugumano majangarha manddimuwa aana mulebo ADV. Mudhidhi wakosiwa diskursuya, etapulelo ya dholeba esi yanoneliwamo mudhidhi ologile namakosa mpaddi: “Mukale Anamoona ororomeleya ebaribari a nabuya. Mudhowevi muwanaga mpaka dhilobo dhotene dha Babilonia otolowa. Kalaleyani muselu orugunuwa elabo yotene. Elabo enofanyeela oziwa wi Yehova ddi Mulugu vina Yezu Kristu ‘Mwene wa amwene, Nabuya wa anabuya’. Aba malabo a malabo. Joziweya wi mwene onela olamulela! Nyuwo muli attu onvuwiha iyene. Mwa dhawene mulaleye, mulaleye, mulaleye Omwene na mweneya”. Mudhidhene obule njangarha nimodha nalapela muttengo wa meturu 11 nahitapuliwa osogorho wa anamewa. Venevo vahikala mutoma wozivela mmirimani “Mulaleye [na engelezi Advertise, yatonyihedha Anamoona] Mwene na Omweneya”. Wali mudhidhi wowagalala. Anamoona ahiba mada na oziveliwa vaddiddi mbali wa munddimuwa watxemerhiwa Pfannebecker, nameeba wa dhipano dha jibo dha matugumano a murudda wahithukulela epano yaye vadhulu va musorho baloga na lizu nowiweya na elogelo yaye ya alemão: “Acb, Ya! Und now ve do it no (Ah! indde. Ovano ninela okosa ejuwene, kayo mwenemo)?” vina mwebaribari ahikosa.
Muvirile malabo manai, mutugumano wa kwatti bugadhowavi mbali Rutherford wahilaba mwinyene na eena ali vamatugumanoni olaleya Omwene numba na numba mmamiruddani mwali olapela wa makilometuru 72 wi ofiye vamatugumanoni. Mbwenye esodha kadhimalile venevo. Olaleyiwa wa Omwene ogahivahiwa guru enddimuwa vaddiddi egewiwe orugunuwa elabo yotene. Yakeene ejile wakwana wa 17.000 wa anamalaleya aderetu a dhilabo 58, ahilaba mwa ovaha onamoona. Masaka avirile, George Gangas, walivo vamatugumanoni abale a kwatti vina mudhidhi ovira bakala nikuru na nningo na olamulela wahiloga modhela porogarama ejile o Cedar point: “yali elobo yohidduwaleya-wene yalebeyile muyubuweloni mwaga na mmirimwani mwaga, ehinadduwale miyo vina mudhidhi wotene wa egumi yaga.”