Okwela Ononivaha Ezinddiyelo—Dhologa esi dhiburutxiwe mu Anuário das Testemunhas de Jeová 2014
Afrika
Nikuku 48, ddima 1, mpaka nikuku 49, ddima 2
“Yehova Vamodha na Angelo Anele Okala Amarho Aga”
Mary wa vyaka 70 dhobaaliwa onkala elabo y’oKeniya wankosa mpaddi wa kapela ya presbiteriana vina wanivilibihedha na egumi yaye yotene. Iyene wali muttu wakokomeza attu osokela kobiri yinjene vina wahikamihedha omaga kapela ya mmuruddani mwaye. Mwanaye mmodha mukaleliye munamoona wa Yehova, iyene kaziveliwe. Mwanayeya wannimuwobela woona matugumano, mbwenye iyene wankodda, alogaga wi afuna ewe miselu dha Bibilia na elogelo yaye bahi ya Kikuyu, ottiya Esuwayili. Mmalelani, Mary wahirumeela woona matugumano a kwatti agakosiwe na elogelo ya Kikuyu. Vamatugumanoniva iyene wagilatile mburo wasasanyedhiwe akalaba. Venevo wahikala wotikina na mukalelo wattittimihiwiye. Mwadhahene Mary wahiloga yawila txipo kanattittimihiwaga vina kanakeliwaga na mukalelo ninga obo mukapela mwaye. Venevo iyene okalela txenjewa dhipaddi dhotene vina wahiziveliwa vaddiddi dhiwaliye venevale. Mudhidhi ovahiwe iyene nsunzo na Bibilia na brochura Kanvuruwane Mulugu, momaguva iyene orumeela.
Vasunzileyi myeri dhing’onovi, Mary wahigana okala munamoona wa Yehova venevo iyene ottiya kakamwe kapela yaye. Anddimuwa a mukapela mwaye ahisilidhiwa vaddiddi. Awene amukuwela munddimuwa wa kapela wakala okwatti y’oNairobi wi alogena. Munddimuwaya wahimukwekwetta vaddiddi wi ahibudduwemo mukapelamwa, mbwenye iyene wali wowimelene txitti. Dhahene, munddimuwaya ohinvuza: “Amarho awo anakale ani weyo ogattiya kapelaya?” vina owenjedhedha. “Weyo okana amarho vina anamwanddamani enji a mwenemwale.”
Venevo iyene ohakula “Yehova vamodha na angelo anele okala amarho aga. “Vina na Anamoona a Yehova.”
Mohiwodha omukwekwetta Mary, munddimuwaya ohidhowa. Iyene onodhowavi vasogorho na nsunzo na Bibilia vina onowona matugumano otene a Anamoona a Yehova masiki akalaga wolapela na Numba ya Omwene. Mudhidhi wahaniyena kobiri yowelana mukukutta oheedda wora bili muzogwe bagarubwa wi adhowe omatugumanoni. Masiki na ofarafariwa na anamwanddamani aye, Mary ohigana obatiziwa.
Europa
Nikuku 69, ddima 1, mpaka nikuku 70, ddima 2
“Mburo Obu Odhile Weyo Bwafuniwe?”
Muyana dhahi w’Osomalia wakala elabo ya Suesia wahobeliwa wona matugumano Onumbani ya Omwene vina wahigana odhowa. Mbwenye dhilobodha kadhakalile deretu. Kavo muttu wammoyele, otene ela omwang’ana bahi. Iyene wahinyoonyeya vaddiddi. Wahikalawo muttu wamoonile wi iyene ohinyonyeya vaddiddi, venevo onvuza: “Mburo obu odhile weyo bwafuniwe?”
“Txibarene ddinoonamo dhahene!” iyene ohirumeela. Venevo iyene ohidhowa. Musogorhomwa mudhidhi wagumaniliyena Anamoona a Yehova amuwobile, iyene wahawaddela wi txipo kageyelelewo. Venevo abali wubuwela txini yapadduwile, vowi awene kamoonile Onumbani ya Omwene. Mmalelani ologa vang’onovi, otene ononelamo wi iyene wela onyengetteya vina wavolowile kapela-kapelavi!
Venevo abali omulibiha odhowa Onumbani ya Omwene dila yanawili. Iyene wahirumeela odhowa, mbwenye wahiloga wi kagajeedhile mitala kumi kohiziveliwa. Mudhidhi ovolowile iyene mu Numbani ya Omwene, otene mmulogoni ahimmoyela na okwela! Venevo iyene oziveliwa vaddiddi na matugumanoya vina okala womariha obudduwamo mu Numbani ya Omwene. Iyene oroma wona matugumano otene vina ovano omala obatiziwa.
[Foto vanikukuni 4]
DHILABO
47
ATTU
741.892.871
ANAMALALEYA
1.601.915
MASUNZO A BIBILIA
862.555