Ninawodhe Dhavi Oddiginya Mirima dha Anamasunza Ehu
1. Esile dhasunziha Yezu dhikosile eni mmirimani mwa anamewa aye?
1 Yezu Kristu oddiginya mirima dha anameewa aye. Mudhidhi dhahi watapulela Yezu Malebo anamafara aye mirima dhawa ‘dhahiwala’. (Luka 24:32) Vowi omwiwelela Mulugu onofanyeela odheela mmirimani, ninawodhe dhavi oddiginya mirima dha abale anasunziha iyo mowiwanana na esile dhinawaddelihu wi asaddule egumi yawa?—Rom. 6:17.
2. Ttotto na etanaalelo dhinnikamihedha dhavi oddiginya mirima dha attu?
2 Kalabihedha Etanaalelo na Ttotto: Mwa attu enjeene, wawaddela ejile eli yaderetu na eli yabure, kinattukulela okosa matxinjo. Mwebaribari, oganonelamo esile dhinrumeela iyene okapela waye vina omulagiha malebo modheela dhorumeela dhaye, iyene onela ononelamo. Wi nimulibihe muttuya, vamaromo ninofanyeela otanaalela ejile enrumeeleliye vina banttittimiha. Ttotto, na olabihedha mavuzo ootanalela, enomulibiha namasunza ologa ejile enubuweliye. (Gano 20:5) Omamalelowa ninofanyeela osakula Mazu a Mulugu anawodhe oddiginya murima waye. Dhahene, ninofanyeela olagiha efunelo na muttuya vina nikale ovilela. (Gano 25:15) Wubuwele wi wunuwa omuyani wa muttu-muttu onottiyana. Noona kattiya wi muya wa Yehova opatte merelo vamodha na dhubuwelo dhawa.—Marko 4:26-29.
3. Ninakamihedhe dhavi abale anasunziha iyo okaana mikalelo dhapama?
3 Kakamihedhe wi Akaane Mikalelo Dhaderetu: Mpaddi dha malebo a Bibilia dhinloga opama vina okwela wa Yehova, dhinowakamihedha attu anasunziha iyo okaana mikalelo dhaderetu. Ninofanyeela ottiddihedha mabasa malebo ninga aba: Masalmo 139:1-4 obe Luka 12:6, 7 wi nilagihe mukalelo onimuzuzumela Mulugu muttu-muttu wa iyo. Otamaalela na murima wotene mahala okwela a Yehova enowakosiha attu wunuwiha omukwela vina omwebedha wawa Mulugu. (Rom. 5:6-8; 1 Joau 4:19) Vina awene agasunza wi mikalelo dhawa dhinowiwanana na omuttu wa Yehova, anele okaana merelo animuttittimiha.—Masal. 78:40, 41; Gano 23:15.
4. Nigasunzihaga mmabasani a olaleya, ninawodhe dhavi olagiha nttittimiho mwa yosakula ya muttu-muttu?
4 Yehova kanimukokela muttu wiwelela malamulo aye. Ottiya ejuwene, iyene onoziveliwa na muttu ole onlagiha wiwelela malamulo aye na eziweloya. (Iza. 48:17, 18) Wi nimutagihe Yehova ninofanyeela wasunziha attu na mukalelo onwodha awene okosa masakulo anyene. Muttu yeka aganonelamo yawila onofanyeela okosa matxinjo mwigumini mwaye, yopurelamoya enokala yogoneela vaddiddi. (Rom. 12:2) Ejo vina enomukosiha iyene okala vakuvi va ‘ole onnona eli mmirimani mwa muttu-muttu,’ Yehova.—Gano 17:3.