Oleveleliwa Dhottega Yobolo Ehinatti

Oleveleliwa dhottega dhehu enwodheya bahi sabwa ya yobolo epitxile Yezu na nikami naye. (Ef. 1:7) Masiki dhawene, Bibilia onologa wi: Mulugu na ovilela waye, wale wanalevelela attu amuttegela, kuloga, wale Yezu ahinapitxa mukutto wa yobolo. (Rom. 3:25) Mulugu wawodha dhavi olevelela dhottega yobolo ehinapitxiwa, masiki dhawene akalaga Mulugu woligana?

Yehova wahipikirhela omuruma nvuni àgavunile attu agamuroromele Mulugu vina mazu aye. Mukoseliye nipikirhelo ntti yakala ninga yobolo yahimala opitxiwa. (Wita 3:15; 22:18) Yehova kaana waganyedha wi nsakana nigafiya, Mwanaye agahileva egumi yaye ninga yobolo. (Gal. 4:4; Aheb. 10:​7-10) Yezu bali velaboni ya vati ninga murumiwi wa Yehova, Mulugu wahinvaha owodha wa olevelela dhottega, ahinatti oleva egumi yaye ninga yobolo. Yezu wanalevelela attu amuroromela mowiwanana na mukutto wa yobolo ogakosiliye musogorho.—Mt. 9:​2-6.