NIPADDUWO 2
Mundda Wokoddela
KAÑGANA elabo ya vati apa! Dhilobo dhotene dhikoddelilani! Kañgana mani na miri, marhuwa na dhinama dhotene. Onowodha omutonya thebo vina apoddogoma?
Mundda obu wokoddela odhile okalawo dhavi? Ndoweni noone mukalelo onisasanyeli Mulugu elabo ya vati.
Voroma, Mulugu wahikosa mani mangiti wila akuneele mathaka. Nanda iyene wahikosa mukalelo wotene wa dhoomela dhiñgono na makupu vina miri. Dhilobo esi dhinunuwa dhinokamiha okoddeliha elabo ya vati. Mbwenye esidha dhinokosa opitha ejene. Dhinjidha dhinonivaha vina dhoja dhoziva vaddiddi.
Vasogorhova Mulugu wahikosa oba wila dhihabelelege mmanjeni vina balame wila dhivavege odhulu. Iyene wahakosa anabwa na apaka vina akavalo; dhinama dhinddimuwa vina dhinama dhiñgono. Dhinama gani dhinkala na waddamana vatakulu vawo? Kaninfanyeela ohagalala wila Mulugu wahinikosela dhilobo esi dhotene?
Omagomelowa, Mulugu wahikosa mpaddi mmodha wa elabo ya vati okala mburo wa va woka vaddiddi. Iyene wahitxemerha mburo obu mundda wa Edeni. Mundda obu wali wowakwana kakamwe. Dhilobo dhotene dha mundda obu dhali dhokoddela. Nanda Mulugu wafuna wila elabo yotene ya vati ekale ninga mundda obu wokoddela wakosiliye.
Mbwenye kañgana wili nladdaniho na mundda obu. Weyo onoziwa txini yoonile Mulugu wila yanjombamo? Ndoweni noone.
Wita 1:11-25; 2:8, 9.