NIPADDUWO 11
Musilibo Woroma
WEYO onoziwa elobo yoroma yakosile Noe na murala waye mwabudduwelani mpangayani? Iyene wahimperhekela Mulugu mvaho. Weyo podi omoona iyene bagakosa eji va nladdanihoni mutxiddo mpu. Noe wahiperheka mvaho obu wa dhinama wila amutamaalele Mulugu sabwa ya ovuna murala waye va mpuloni munddimuwa.
Weyo onoona ninga Yehova wahiziveliwa mvahoya? Indde, iyene wahiziveliwa. Nanda vina wahimuroromeliha Noe wila txipo kagatolotxile viina wili elabo na mpulo.
Mohigoneela mathaka otene aahimala wuma, nanda Noe na murala waye aahiroma egumi eswa otakulu wa pangaya. Mulugu wahareeliha awene nanda wahapanga dhahi: ‘Munofanyeela okaana ana enjene. Munofanyeela winjivana mithengo gwe mpaka athu okalaga velaboni yotene ya vati.’
Mbwenye vasogorhova, athu agewa mwaha wa mpulo munddimuwa, txino awene agannova opadduwa wili mpulo ninga obule. Noona Mulugu wahivaha elobo wila yawubutxedhege athu olibela waye wawila txipo mpulo kunadhe viina velaboni yotene ya vati. Weyo onoziwa txini yavahiliye wila awubutxedhege awene? Obu wali musilibo.
Dila dhinjidhene musilibo onooneya odhulu muzogwe agamala orubwa nanda nzuwa nigoobaga. Misilibo podi okaana kore dhinjidhene dhokoddela. Wahiromaga woona? Weyo onowoona obu oli va nladdanihoni?
Eji jilogile Mulugu: ‘Ddinolibela wila txipo athu otene vamodha na dhinamadha kanda atolotxiwaga wili na mpulo. Ddinotomeya musilibo waga mmiraboni. Nanda musilibo obu ogoobuwa, miyo ddinela woona nanda ddinela wubuwela yolibela eji yaga.’
Noona weyo ogoona musilibo obu, onfanyeela wuwubutxedha eni? Indde, yolibela ya Mulugu yawila iyene txipo kanatolotxe wili elabo na mpulo munddimuwa.
Wita 8:18-22; 9:9-17.