NIPADDUWO 14
Mulugu Oheha Nroromelo Na Abramu
ONOWOONA eji enkosa Abramu apa? Iyene ohithidda mbeni, nanda onkala ninga onfuna ampe mwana waye. Sabwa gani egakoseliye wene ejene? Voroma, ndoweni noone mukalelo wakaanile Abramu na Saara mwana wawa wa mulobwana.
Kobuwela, Mulugu wahaaroromeliha awene wila agaahikaana mwana wa mulobwana. Mbwenye eji yooneya ninga yohiwodheya, sabwani Abramu na Saara aahuluvala. Dhaenevi, Abramu ohikuluvela wila Mulugu agahikosa elobo enkala ninga yohiwodheya. Kito txini yapadduwile?
Mulugu mumaleliye okosa nlibelo naye, ehivira yaka yotene. Vasogorhova, Abramu bana vyaka 100 dha obaaliwa nanda Saara bana vyaka 90 dha obaaliwa, awene ahimbaala mwanamulobwana watxemerhiwa Izaki. Mulugu ohisoriha nlibelo naye!
Mbwenye Izaki munuweliye, Yehova waheha nroromelo na Abramu. Iyene wahimutxemerha: ‘Abramu!’ Nanda Abramu wahakula dhahi: ‘Miyo apano!’ Venevo Mulugu ohiloga dhahi: ‘Kamuthukule mwana wawo, mwana wawo mmodha, Izaki, nanda kadhowa omwangoni obuwene onfunimi wulagiha. Wenewo kampe mwana wawo nanda kamperheke ninga mukutho.’
Mazu aba ahimukubanyiha Abramu vaddiddi, sabwani Abramu wannimukwela mwana waye vaddiddi. Nanda kobuwela wila Mulugu wahiroromeliha wila ana a Abramu agahikala mwilaboni ya Kana. Kito eji egapadduwile dhavi Izaki kokwa? Abramu kaanonelimo wene, mbwenye iyene wahimwiwelelavi Mulugu.
Mwafiyeliye omwangoni, Abramu wahimmaga Izaki nanda bamwika va ebuwani yakungiliye. Venevo wahithukula mbeni wila ampe mwana waye. Mudhidhene obule mungelo wa Mulugu wahimutxemerha: ‘Abramu, Abramu!’ Nanda Abramu wahakula dhahi: ‘Miyo apano!’
Mulugu wahiloga: ‘Kunvoreye mwanamulobwana obe kumukosele elobo txilobo. Ovanene ddihiziwa wila weyo onoddiroromela, sabwani weyo kuddikooddihile mwana wawo, mwana wawo mmodha bahi.’
Munuwelo gani wa nroromelo waana Abramu mwa Mulugu! Iyene wahikuluvela wila kuli elobo ehinwodha Yehova, yawila vina Yehova agahinvenyiha Izaki mukwani. Mbwenye eji kayali txibarene efunelo ya Mulugu wila Abramu ampe Izaki. Noona Mulugu wahikosiha nibila oparamela vanikupuni waddamana na apa vaalani, nanda iyene wahimpanga Abramu wila aperheke nthene ninga mukutho vamburoni va mwana waye.