NIPADDUWO 26
Jobi Onomuroromela Mulugu
WEYO onomweddela thagaraga mulobwana oddu oli muredda? Nzina naye ddi Jobi, nanda muyana oddu ddi mwadhiye. Weyo onoziwa txini enimpangiye Jobi? ‘Kamuulumele Mulugu nanda okwe.’ Ndoweni noone sabwa elogeliye wene elobo ninga ejene, vina sabwa yatabuweli Jobi vaddiddi.
Jobi wali muthu wororomeleya wamwiwelela Yehova. Iyene wakala murudda wa Uzi, vohilapelana na Kana. Yehova wannimukwela Jobi vaddiddi, mbwenye wahikalawo wamwiddile iyene. Weyo onomuziwa bani?
Oddu wali Satana Ddiabo. Kobuwela, Satana ddi mungelo wabure oddwene onimwidda Yehova. Iyene wahiwodha omukosiha Adamu na Eva onvanya Yehova, nanda iyene wobuwela wila agahiwodha wakosiha athu ena otene onvanya Yehova vina. Kito iyene wahiwodha okosa ejene? Nne. Ovanene kawubuwele alobwana na ayana enjene oororomeleya abene amalilihu wasunza. Onwodha waromola angasi?
Mumaleli okwa Yakobi na Zuze mu Ejipito, Jobi wali muthu wamuroromeletxa Yehova velaboni yotene ya vati. Yehova wafuna amuthiye Satana aziwe wila iyene kagawodhile wakosiha athu otene okala abure, noona iyene wahiloga dhahi: ‘Kamwañgane Jobi. Koona mukalelo onddiroromeliye.’
Satana ohimpambiha wila ‘Iyene ddororomeleya sabwani weyo ohimureeliha iyene nanda ohikaana dhilobo dhinjidhene dhaderetu. Mbwenye weyo ogamwakiha esi, iyene onela wuwuulumela.’
Noona Yehova ohiloga dhahi: ‘Kadhowa. Kamwakihe. Kamukosele dhilobo dhotene dhabure dhininfuniwena Jobi. Ninela woona akala iyene onela odduulumela. Mbwenye kumpe.’
Voroma, Satana wahikosiha wila athu eye ñgombe na akamelo a Jobi, nanda mabila aye aahipiwa. Mumalelani iyene wahaapa ana aye a alobwana na ayana 10 na pevo ya mutokora. Vasogorhova, Satana wahimusothotha Jobi na eredda eji yowopiya vaddiddi. Jobi wahitabuwa vaddiddi. Ji sabwa ya ejene yampangeli mwadhiye wila: ‘Kamuulumele Mulugu nanda okwe.’ Mbwenye Jobi kagakosile eji. Vina, amarho a othambi araru aahidha nanda bampanga iyene wila wahikaanaga egumi yabure. Mbwenye Jobi wahikalavi wororomeleya.
Eji yahimuhagalaliha Yehova vaddiddi, nanda vasogorhova iyene wahimureeliha Jobi, ninga munimooneliwe va nladdanihoni nthi. Iyene wahinvulumutxa mwa eredda yaye. Jobi wahikaana ana ena 10 ookoddela, nanda wahikaana wilimo ñgombe, mabila na akamelo opitha esile dhakaaniligiye.
Weyo onela omuroromelavi Yehova dila dhotene ninga Jobi? Akala onela okosa dhaene, Mulugu onela wureeliha weyo vina. Weyo onela owodha okalawo na mukalakala mudhidhi onfuna osadduliwa elabo yotene ya vati bikala yokoddela ninga mundda wa Edeni.
Jobi 1:1-22; 2:1-13; 42:10-17.