NIPADDUWO 36
Mwana Ñgombe Wa Nddarhama
O,O! OVANENE athu aba ankosa eni? Awene anomulobelela mwana ñgombe! Ankosela eni ejene?
Moize mukaleliye omwangoni nanda bagoneelawo, athu ahiloga dhahi: ‘Kaninziwa txini empadduweli Moize. Noona ndoweni nimusasanyeni mulugu wila anisogorhele obudduwa mwilaboni mpu.’
Arau mbali wa Moize ohiloga dhahi: ‘Ehikala, karulani vithunddu dhenyu dha nddarhama, nanda muddivahe.’ Athu mukoselani ejene, Arau ohinyugulutxa bamukosa mwana ñgombe wa nddarhama. Nanda athuya ahiloga dhahi: ‘Oddu ddi Mulugu wehu, oddwene onisogorheli obudduwa mu Ejipito!’ Mumalelani Aizraeli ahikosa mathanga manddimuwa, vina ahimwebedha mwana ñgombe oddu wa nddarhama.
Yehova mooneliye eji, iyene ohiludduwa vaddiddi. Noona iyene ohiloga na Moize: ‘Kamaguva nanda katita. Athu anokosa elobo yabure vaddiddi. Awene ahimala odduwala malamulo aga nanda anomukokorela mwana ñgombe wa nddarhama.’
Moize ohitita va mwangoni na omaguva. Nanda mufiyeliye vakukuvi, ji ejene enooniye. Athu anowiba vina anotxetha mwa omurija mwana ñgombe wa nddarhama! Moize ohiludduwa vaddiddi mpaka ovokedha vati myarha esile mili dhopepeya dhina malamulo, nanda esi dhihitweya, badhikala makarhipathi gwe. Mumaleliye iyene ohimuthukula mwana ñgombeya wa nddarhama nanda bamunyugulutxa. Mumaleliye ohimutxila bakala mbwebwe.
Athu aahikosa elobo yabure vaddiddi. Noona Moize ohapanga alobwana ena wila athidde masupadda awa. Moize ohiloga dhahi: ‘Athu abure abene amwebedhile mwana ñgombe wa nddarhama anofanyeela okwa.’ Nanda dhaene alobwana abale ahaapa athu 3.000! Eji kinlagiha wila ninofanyeela okala txenjewa wila nimwebedhege Yehova bahi, nanda nikooddege wawebedha amilugu ahili a ebaribari?
Obudduwa 32:1-35.