NIPADDUWO 46
Marhinga A Jeriko
EMMOTHIHA marhinga aba a Jeriko txini? Ankala ninga amotheliwe bomba enddimuwa. Mbwenye masaka abale awene kaana bomba; awene kaana nne ngafuna futhi. Nthi ntikiniho niina na Yehova! Ndoweni nisunze mukalelo wapadduwile eji.
Kewa ejile empangile Yehova Josue: ‘Weyo na anyakoddo awo munofanyeela okosa muddonddo ozugunuwa sidadi. Mukose muddonddo ozugunuwa sidadiya dila modha kadda siku mwari mwa masiku matanu na nimodha. Muvijele kasha ya nipagano. Anamakutha atanu na eeli anofanyeela weedda vasogorho va kasha eji vina awobege aparhaza awa.
‘Siku nanotanu na wili munofanyeela okosa muddonddo ozugunuwa sidadiya dila tanu na biili. Mugamala mwaarumihe aparhazaya na ogoneela, nanda motene mukuwe na okuwa onddimuwa wa koddo. Venevo marhingaya anela omothela vati kakamwe!’
Josue na nlogona nihikosa ejile yalogile Yehova. Oku bagakosa muddonddoya, otene ali omaalene noo. Kavo onloga nne nzu nimodha. Elobo eniweya ku oruma wa aparhaza na siddo dha manyalo bahi. Amwiddani a athu a Mulugu mu Jeriko aahova. Onowoona kabala ejile yofila etomeyiwe va janelani? Janela nthile thaani? Indde, Raabe ohikosa ejile yampangile anamareza abale eeli. Murala waye wotene oli mwari bugañgana vamodha na iyene.
Omagomelowa, siku nanotanu na wili, mumalelani okosa muddonddo ozugunuwa sidadiya dila tanu na biili, aparhaza ahiruma, anyakoddo ahikuwa, nanda marhingaya ahimotha. Venevo Josue ohiloga: ‘Kampeni muthu wotene mu sidadimwa nanda muddumeye sidadiya. Muddumeye dhilobo dhotene. Kathiyani bahi parata, nddarhama, safurhi na mijila, nanda muperheke esi mpule munkoyiwa muhaku mmusasani wa Yehova.’
Wa anamareza abale eeli, Josue ohiloga: ‘Kadhowani mu numba ya Raabe, nanda mumburutxedhe otakulu iyene na murala waye wotene.’ Raabe na murala waye ahivuneya, txibarene ninga mwaroromelihedhi anamareza abale.
Josue 6:1-25.