NIPADDUWO 51
Ruti Na Noemia
MBIBILIANI weyo onela ofanyamo nivuru nintxemerhiwa Ruti. Nthi nipadduwo mwaha wa murala wakalilewo mudhidhi wana Aizraeli anamathonga. Ruti muzombwe wa elabo ya Moabe; iyene kayo wa nlogo na Mulugu Izraeli. Mbwenye Ruti musunzeliye mwaha wa Mulugu webaribari Yehova, iyene ohifiyedha omukwela vaddiddi. Noemia muyana munddimuwa oddwene wamukamihile Ruti osunza mwaha wa Yehova.
Noemia muyana wa Muizraeli. Iyene vamodha na mamuni waye vina na ana awa a alobwana eeli aahimwalela elabo ya Moabe mudhidhi watuweyile dhoja mu Izraeli. Mumalelani siku nimodha mamuni wa Noemia wahikwa. Vasogorhova ana a Noemia ahaatela anayana eeli a akudda Moabe aatxemerhiwa Ruti na Orpa. Mbwenye muvireli othamagela vyaka 10, ana eeli a Noemia aahikwa. Okubanya gani wana Noemia na anayana abale eeli! Ovanene Noemia onakose eni?
Siku nimodha Noemia ohigana okosa oleddo onddimuwa wowiyelela mmudhi wa nlogo naye. Ruti na Orpa anfuna akale na iyene, noona awene ahidhowa vina vamodha. Mbwenye mweddelani vañgonovi mu dila, Noemia ohizugunuwa nanda ohiloga wa anayana abale dhahi: ‘Keyelelani mmudhi mwakale na amai enyu.’
Noemia ohasosona anayana aba mowapaganya. Venevale awene ahiroma olila, sabwani awene anomukwela Noemia vaddiddi. Awene ahiloga dhahi: ‘Nne! Iyo ninela odhowa na weyo wa nlogo nawo.’ Mbwenye Noemia ohakula: ‘Nyuwo munofanyeela wiyela, anaaga. Enakaletxe deretu nyuwo okala mmudhi.’ Venevo Orpa ohithukula dila yaye ya odhowana mmudhi. Mbwenye Ruti kadhowile.
Noemia ohizugunuwa nanda ohiloga na iyene dhahi: ‘Orpa ohiyela. Weyo vina kadhowa mmudhi na iyene.’ Mbwenye Ruti ohakula dhahi: ‘Kutagihe oddikosiha miyo wuthiya weyo! Kaddithiye ddidhowe na weyo. Wenewo ondowa weyo miyo ddinela odhowawo, nanda wenewo onakaliwe miyo ddinela okalawo. Nlogo nawo ninakale nlogo naga, nanda Mulugu wawo onakale Mulugu waga. Wenewo onakwiwe miyo ddinela okwawo, vina ku wenewo oneyiwimi.’ Ruti mulogeliye eji, Noemia katagihile viina omukosiha iyene wiyelela mmudhi.
Omagomelowa ayana abale eeli ahifiya o Izraeli. Veneva awene ahisama wila akalege veneva. Mohigoneela Ruti ohiroma olaba mminddani, sabwani nthi nsaka na osinanga mayele. Mulobwana ontxemerhiwa Boaji ohimuthiya Ruti osinanga mayele mminddani dhaye. Weyo onomuziwa bani wali mai wa Boaji? Wali Raabe wa sidadi ya Jeriko.
Siku dhahi Boaji ohimpanga Ruti: ‘Ddihiwa dhotene mwaha wa weyo, vina mukalelo onimuzuzumeligiwe Noemia. Ddihiziwa mukalelo wamuthiyiliwe babi wawo na mai wawo vina elabo yawo ya obaaliwa nanda mukalelo wadhiliwe okala vari va nlogo nakooddiliwe oziwa. Yehova akale waderetu na weyo!’
Ruti ohakula dhahi: ‘Nyuwo fumu muhiddizuzumela vaddiddi. Muhiddikaliha deretu sabwa ya mukalelo wofanyeelela ologile nyuwo na miyo.’ Boaji ohiziveliwa vaddiddi na Ruti, nanda kavavirile mudhidhi mwinji ofiyedha awene otelana. Eji emuhagalalihile dhavi Noemia! Mbwenye Noemia ohagalalitxi mukaaneli Ruti na Boaji mwana wawa woroma, watxemerhiwa Obede. Vasogorhova Obede ohidha okala bibi wa Davidi, oddwene onamusunzihu vaddiddi musogorho mpo.
Nivuru na Bibilia na Ruti.