NIPADDUWO 59
Davidi Onfanyeelela Eni Othawa
MUMALELI Davidi ompa Golias, Abineri kazembe wa nikuru na anyakoddo na Izraeli ohimudhana wa Sauli. Sauli ohiziveliwa vaddiddi na Davidi. Iyene ohimuthoma bakala kazembe wa nikuru naye na anyakoddo vina ohimuthukula iyene wila akalege vatakulu va mwene.
Vasogorhova, nikuruna na anyakoddo mwiyelelani okoddoni na akudda Filistia, ayana ahiba: ‘Sauli waapile matxikwi, mbwenye Davidi waapile makumi a matxikwi.’ Eji ehimukaaniha Sauli aje, sabwani Davidi onovahiwa nthithimiho venjivene opitha Sauli. Mbwenye Jonatani mwana wa Sauli kana aje. Iyene onomukwela Davidi vaddiddi, nanda Davidi onomukwela vina Jonatani. Noona oheeli ahilagana muthu na mukwaye wila dila dhotene anela okala amarho.
Davidi namooba waderetu vaddiddi wa bangwe, nanda Sauli onoziveliwa jibo dhinoobiye. Mbwenye siku nimodha aje ya Sauli ehimutotela okosa elobo yowopiya. Oku Davidi bagamooba bangwe, Sauli ohithukula mwalago waye nanda ohivoka, bagaloga dhahi: ‘Ddinfuna ddimukomele Davidi va eruguni!’ Mbwenye Davidi ohirebetha, nanda mwalagoya ohinvonya. Vasogorhova Sauli ohinvonya wili Davidi na mwalago waye. Dhaene Davidi ohiziwa ovanene wila onofanyeela okala txenjewa.
Weyo onowubuwela olibela wakosile Sauli? Iyene walogile wila agahinvaha mwana waye wila akale mwadhi mulobwana agampile Golias. Omamalelowa Sauli ohimpanga Davidi wila iyene podi omuthukula mwana waye Mikali, mbwenye voroma iyene onofanyeela waapa amwiddani 100 akudda Filistia. Kobuwela eji! Mwa ebaribari Sauli onjeedhela wila akudda Filistia ampe Davidi. Mbwenye awene kampile, noona Sauli ohinvaha Davidi mwana waye wila akale mwadhiye.
Siku nimodha Sauli ohimpanga Jonatani vina adhari aye otene wila onfuna ampe Davidi. Mbwenye Jonatani ohiloga na babi waye dhahi: ‘Kamunvoreye Davidi. Iyene kanokoselegeni elobo yabure. Othiya eji, dhilobo dhotene dhikosiliye dhinkalaga nikamihedho nddimuwa vaddiddi wa nyuwo. Iyene wahika egumi yaye mowopiya mwampeliye Golias, nanda nyuwo moonelinyu eji mwahiziveliwa.’
Sauli ohinvuruwana mwana waye, vina ohilibela okoodda onvoreya Davidi. Davidi ohiyihiwa, nanda iyene ohilaba wili vatakulu va Sauli ninga mwakoseligiye. Masiki dhaene siku nimodha, oku Davidi bagooba jibo, wili Sauli ohinvokedha Davidi mwalago. Davidi ohirebetha, nanda mwalagoya ohilata erugu. Eji ji dila yanoraru! Na ejene Davidi ohiziwa wila onofanyeela othawa!
Omathiyu obule Davidi ohidhowa vatakulu vaye. Mbwenye Sauli oharumawo alobwana wila ampe. Mikali ohiziwa txini enfuna okosa babi waye. Noona iyene ohimpanga mamuni waye dhahi: ‘Weyo ogahithawe mathiyu abano, mangwana onela okwa.’ Omathiyu obule Mikali ohimukamiha Davidi oviluwa va janelani. Othamagela vyaka tanu na biili Davidi wanfanyeela ovitala mburo na mburo wila Sauli ahiwodhe onfanya.
1 Samueli 18:1-30; 19:1-18.