NIPADDUWO 64
Salomoni Ohimaga Mparha
DAVIDI ahinathi okwa, iyene wahinvaha Salomoni masasanyedho adheeli wa Mulugu a omagana mparha wa Yehova. Mu yaka yanonai ya olamulela waye, Salomoni ohiroma omaga mparhaya, nanda obu ohigoneela vyaka tanu na biili na jiddiga wila ogome. Makumi a matxikwi a alobwana ahilaba va mparhani, nanda numbaya ehinonga kobiri gwe vaddiddi. Eji sabwani vahilabihedhiwa nddarhama na parata dhinjidhene.
Mparhaya ona kambirhinya biili dha makamaka, ninga mwakaaneli tabernakulu. Mbwenye kambirhinya esi dhinddimuwa wilimo opitha esile dha mu tabernakulu. Salomoni ohikiha kasha ya nipagano mu kambirhinya ya mwari mwa mparha, nanda dhilobo dhiina dhaakoyiwa mu tabernakulu dhihikiwa mu kambirhinyani yina.
Mparhaya mumarihedhiwani, vahikala mathanga manddimuwa. Salomoni ohikokora osogorho wa mparha nanda ohilobela, ninga munooneliwe va nladdanihoni. Salomoni ohiloga wa Yehova: ‘Masiki odhulu onddimuwa wotene nyuwo kamunakwanawo, nne wene mparha obu kamunakwanamo. Mbwenye, O, Mulugu waga, ddinowuthiddani myeddo kavuruwanani nlogo nenyu nigalobelaga monyaalela mburo obu.’
Salomoni mumarihedhiye nlobelo naye, ohimotha motho ovenyedha odhulu. Obu ohiddumeya mikutho dha dhinama dhakosiwe. Vina txeza yoñganimela yovenyedha wa Yehova ehidhaala mparhaya. Eji enlagiha wila Yehova onovuruwana, vina yawila iyene ohiziveliwa mparhaya vamodha na nlobelo na Salomoni. Ovanene mparha obu, vamburoni va tabernakulu, ohikala mburo onda nlogo webedha.
Mwari mwa mudhidhi mwinjene Salomoni ohilamulela na zelu, nanda nlogona nihiziveliwa. Mbwenye Salomoni ohatela ayana enjene a dhilabo dhiina abene ahinimwebedha Yehova. Onowodha omoona mmodha bagamwebedha mulugu wosemiwa? Omagomelowa awadhiye ahimukosiha vina Salomoni wawebedha amilugu ena. Salomoni mukoseliye ejene weyo onoziwa txini epadduwile? Iyene kazuzumeli viina nlogona. Iyene ohidha okala mutabala, nanda nlogona kanihagalali viina.
Eji ehimukosiha Yehova omuludduwela Salomoni, nanda iyene ohimpanga dhahi: ‘Ddinela wuwakiha omweneya nanda ddinela onvaha muthu mwina. Kaddinakose eji mu nsaka nawo na okalawo, mbwenye vari va olamulela wa mwana wawo wa mulobwana. Mbwenye kaddinamwakihe mwana wawo athu otene a mu omweneni.’ Ndoweni noone mukalelo opadduwile eji.
1 Mapadduwo 28:9-21; 29:1-9; 1 Amwene 5:1-18; 2 Mapadduwo 6:12-42; 7:1-5; 1 Amwene 11:9-13.