NIPADDUWO 72
Mulugu Ohimukamiha Mwene Ezekia
WEYO onoziwa sabwa enlobelela mulobwana oddu wa Yehova? Othukuthedhelini makarta aba vasogorho va ebuwa ya Yehova? Mulobwana oddu ddi Ezekia. Iyene ddi mwene wa omwene wa maziza meeli a ogusini a Izraeli. Nanda iyene oli mmakathamihoni menjene. Sabwa yani?
Sabwani makuru a anyakoddo a akudda Asiria ahimala otolotxa maziza 10 a omadhulu. Yehova ohithiya eji opadduwa sabwani athuya abale aali abure vaddiddi. Nanda ovanene makuru a anyakoddo a akudda Asiria ahidha wila arabe koddo na omwene wa maziza meeli.
Mwene wa Asiria ohimala omperhengezela makarta Mwene Ezekia. Makartaya ba aba ekile Ezekia vamentoni va Mulugu. Makartaya anonvevutxa Yehova, nanda anompanga Ezekia wila anyimuwe. Noona ji sabwa ya ejene enlobelela Ezekia dhahi: ‘O, Yehova, kanivuneni mmadani mwa mwene wa Asiria. Agamala dhilabo dhotene dhinela oziwa wila nyuwo mokinyu muli Mulugu.’ Yehova onela onvuruwana Ezekia?
Ezekia mwene waderetu. Iyene kayo ninga amwene abure a maziza 10 a omwene wa Izraeli, obe ninga babi waye wabure Mwene Akaz. Ezekia onowiwelelaga deretu malamulo otene a Yehova. Noona, Ezekia mumaleliye olobela, namavuhula Izaia ohimperhengezela mpaganyo obu wa Yehova: ‘Mwene wa Asiria kanavolowe mu Yeruzalemi. Nne munyakoddo mmodha waye kanaddamelemo. Awene kanoobelemo nne muvi mmodha mu sidadi eji.’
Kañgana nladdaniho nthi va nikuku nthi. Weyo onowaziwa bani anyakoddo aba otene akwile? Awene akudda Asiria. Yehova ohimuruma mungelo waye, nanda omathiyu omodha mungeloya ohaapa anyakoddo a akudda Asiria 185.000. Venevo mwene wa Asiria ohinyimuwa nanda ohiyelela mmudhi.
Omwene wa maziza meeli ohivuniwa, nanda nlogona nihikaana murenddele mudhidhi muñgonovi. Mbwenye mukweli Ezekia mwana waye Manase ohikala mwene. Manase mumaleliye mwana waye Amoni oheeli aali amwene abure vaddiddi. Noona elaboya ehidhaala wili opanga na otimbwini. Mwene Amoni mupeliwiye na adhari aye, mwana waye Jozia ohikala mwene wa omwene wa maziza meeli.
2 Amwene 18:1-36; 19:1-37; 21:1-25.