NIPADDUWO 75
Analobwana Anai Mbabilonia
MWENE Nabukoddonozori ohathukulela o Babilonia Aizraeli otene abale asunzile vaddiddi. Mumaleliye mwari mwa awene mwene ohasakulamo azombwe abale akoddelilitxe vina atxenjerhiletxe. Anai mwa analobwana aba ba abene anawooniwe apa. Mmodha ddi Danieli, nanda enagu araru akudda Babilonia anatxemerha Sadraki, Mezaki, na Abedenego.
Nabukoddonozori onfuna aasunzihe azombwe aba wila alabege mu numba yaye ya mwene. Dhigavira vyaka tharu dha osunzihiwa iyene onela wasakula abale atxenjerhiletxe bahi wila amukamihege othonga miladdu. Mwene onfuna wila azombwe aba akale a guru vina a egumi oku bagasunzihiwa. Noona iyene ohigwiha malamulo wila adhari aye aavahege awene otene dhoja dhakakene dhonuna vina vinyu envahiwa iyene na murala waye.
Kamwañgane muzombwe Danieli. Weyo onoziwa txini enimpangiye Aspenaji mudhari munddimuwaya wa Nabukoddonozori? Danieli onompanga wila iyene kanfuna oja dhoja dhonuna va meza a mwene. Mbwenye Aspenaji onokubanya. Iyene ohiloga dhahi: ‘Mwene ohilamula txini enfanyeela nyuwo oja vina omwa. Nanda nyuwo mugahikaane mooneyelo wa egumi ninga azombwe ena, iyene onela oddipa.’
Noona Danieli ohidhowa wa mwañganeli othomiwe na Aspenaji wila amwañganelege iyene na akwaye araru. Iyene ohiloga dhahi: ‘Ddinowukumbirhani wila munehe mwari mwa masiku 10. Munivahege mikwani nijege na manje nimwege. Mugamala muniladdanihe na azombwe ena abale anja dhoja dha mwene, nanda moone bani ona mooneyelo okaliletxe.’
Mwañganeliya ohirumeela okosa eji. Nanda mugomeli masiku 10, Danieli na akwaye araru ahikaana mooneyelo wa egumi vaddiddi opitha azombwe ena otene. Noona mwañganeliya ohathiya awene ojagavi mikwani othiya esile dhavaha mwene.
Omamalelo wa vyaka tharu azombwe otene ahithukuleliwa wa Nabukoddonozori. Mumaleliye ologa na awene otene, mwene ohizinddiyela wila Danieli na akwaye araru batxenjerhiletxe. Noona iyene ohathukula awene wila amukamihege mu numba ya mwene. Nanda dila dhotene mwene agamukosa mavuzo Danieli, Sadraki, Mezaki na Abedenego obe agavaha miladdu dhorutxa, awene anoziwa dila 10 opitha anamakutha aye obe aziwi.
Danieli 1:1-21.